Ma Te Jọ Akpọ-Soso Whowho Okokohọ Ubrotọ “Lele Kristi!” Na Iwhowho-Uvie A Te Wariẹ kẹ Ahwo Obe-Uzizie Obọdẹ
1 Usi-uwhowho akpọ-soso ukpe nukpo nọ a ro whowho Okokohọ Ubrotọ “Esiwo Ọ Kẹlino!” na u duobọte ahwo nọ a wo isiuru wowoma. Ahwo jọ nọ a jẹ uzizie nana rehọ nọ e nyaze, onana o jọ orọ ọsosuọ nọ a rọ reawere obọdẹ emu abọ-ẹzi kugbe Isẹri Jihova. (Aiz. 65:13) A wo omaweromẹ usu osasa evaọ udevie okugbe-inievo Ileleikristi mai. (Ol. 133:1) Re ma sai fiobọhọ kẹ ahwo buobu kpohọ Okokohọ Ubrotọ “Lele Kristi!” na, ma te wariẹ ghale obe-uzizie obọdẹ evaọ akpọ na soso.
2 Iyẹrẹ Obe-uzizie Nọ A Gghale Ukpe n’Ukpo: Ro no iyẹrẹ nọ i t’omai obọ no akpọ na soso ze, ewhowho Okokohọ Ubrotọ “Esiwo Ọ Kẹlino!” na o wha emamọ iyẹrẹ ze. Evaọ eria buobu, ahwo nọ a dhesẹ isiuru a jọ buobu gaga. Wọhọ oriruo, evaọ ẹwho jọ, a kere uzoẹme jọ fihọ obe-usi jọ kpahe ewhowho na, inọ: “Re a sai zizie ahwo kpobi evaọ ẹruoke, Isẹri Jihova a be jọ ẹwho na daoma gaga—ta usiuwoma kri vi epaọ ọsosuọ, nya ugbothabọ, jẹ tẹme vẹrẹ vẹrẹ.” Ẹghale obe-uzizie na evaọ edhere ọkpakpatiẹ o kpare isiuru utu ahwo ekwakwa awhusi evaọ ẹwho ọfa, onana o wha riẹ ze nọ a rọ rehọ ekwakwa rai fiobọhọ whowho ei ziezi. O tẹ kawo, utu ebe-awhusi esa sa-sa i whowho obe-uzizie mai na taure okokohọ na o te ti te. Iyẹrẹ nọ ohwo awhusi jọ o kere kpahe omai evaọ ukere Ẹdoka rai i bu vrẹ ewẹ-ebe ivẹ. O kere kpahe ẹrọwọ mai, okugbe-inievo mai, ẹghale obe-uzizie na, gbe okokohọ na. Nọ owhowho-uvie jọ ọ jẹ kẹ ohwo jọ obe-uzizie na evaọ uwou jọ, ohwo na o te bru ẹme dhei unu inọ: “Mẹ riẹ. Uzizie rai na mẹ jẹ nwani se kpahe evaọ obe-awhusi na!” Omọfa jọ nọ a nyaku ọ ta nọ: “Whai mẹ be nwani se kpahe na, yọ whọ nwane nyaze no! Kọ ẹkẹ obe-uzizie mẹ oye?” O te fibae nọ, “Oware nana nọ Isẹri Jihova a bi ru na u woma kẹhẹ.”
3 A ruẹ ahwo buobu nọ a dhesẹ isiuru nọ a wha obe-uzizie rai lele oma ziọ okokohọ na. Ahwo jọ nọ a wo isiuru a no ugbo thabọ ze re a sae kezọ kẹ eme okokohọ na. Uvi omodawọ mai nọ ma ro zizie amọfa u ru rie nọ ahwo buobu a rọ nyaze, wọhọ oriruo, evaọ orẹwho jọ, a nẹ iyẹrẹ inọ ahwo ọkpokpọ nọ e ziọ okokohọ na a rọ abọvo abane bu vi ahwo nọ a nyaze ukpe nukpo.
4 Ẹpanọ Wha re ro Ru Ekwotọ Rai: Wha sai mu obe-uzizie na họ ẹrọ kẹ ahwo eka esa taure oke okokohọ rai o te ti te. Wha rẹ daoma ziezi re wha ru ẹkwotọ ukoko rai kpobi re. Evaọ ikoko nọ i wo ẹkwotọ ologbo, iwhowho-uvie e sae rọ areghẹ nya siọ obe-uzizie na ba iwou nọ a di ahwo họ họ evaọ oka urere taure okokohọ na o te ti te. Ukoko kpobi o rẹ daoma re a ghale ebe-uzizie nọ a vi se ai re, je ru ẹkwotọ rai kpobi te epanọ o rẹ lọhọ te kpobi. Ekobaro nọ e rrọ ukoko na a sae wha enọ i te kiọkọ kpohọ usiuwoma ota.
5 Ẹme nọ Whọ rẹ Ta: Whọ sae ta ẹme wọhọ: “Ma be ghale obe-uzizie nana wariẹ akpọ-soso họ ro zizie ahwo kpohọ omakugbe obọdẹ jọ. Ẹkẹra ọna. Sei, whọ te jariẹ ruẹ eware efa nọ a jariẹ dhesẹ.” Nọ ma te ru ẹmeọta mai kpẹre u ti ru ei nọ ma jẹ sae ghale obe-uzizie na kẹ ahwo buobu. Rekọ, otẹrọnọ ohwo na o wo enọ, roma totọ kẹ iyo na. Nọ ohwo jọ o te dhesẹ isiuru, kere odẹ riẹ fihotọ je zihe bru ohwo na ababọ oke-oraha.
6 O rrọ oware nọ u wuzou gaga re ma daoma lele Kristi! (Jọn 3:36) Okokohọ ubrotọ mai nọ ọ be tha na o ti fiobọhọ k’omai nwani ru ere. Ma sai gine rẹro inọ obe-uzizie nana nọ ma ti ro whowho Okokohọ Ubrotọ “Lele Kristi!” na o te wariẹ jọ isẹri ilogbo kẹ amọfa. Fikiere, rehọ ajọwha zizie ahwo bu te epanọ o rẹ lọhọ te kpobi. Jọ Jihova ọ ghale omodawọ ra nọ who ti wobọ evaọ usi-uwhowho akpọ-soso nana.