Uzizie nọ Emamọ Iyẹrẹ I ti No Ze
Eka esa taure oke okokohọ rai u te ti te, ukoko kpobi u ti zizie ahwo kpohọ okokohọ na wọhọ epanọ ma be hai ru anwẹdẹ na. U wo obọdẹ ẹjiroro nọ ma be hai ro zizie ahwo kukpe kukpe. Ahwo nọ ma zizie nọ a nyaze ikokohọ mai no a wo evawere nọ a gaviezọ kẹ eme nọ a ru, nọ a ruẹ inievo nọ e fialoma via kẹ iruo sa-sa evaọ Ọgwa Okokohọ na, gbe emamọ uruemu avọ okugbe nọ inievo na a wo. (Ol. 110:3; 133:1; Aiz. 65:13, 14) Otẹrọnọ Ọgwa Okokohọ na o thabọ kẹ ahwo nọ ma bi zizie na, kọ a rẹ sae nya ghele?
Nọ okokohọ ubrotọ ọrọ 2011 o kuhọ no, aye jọ nọ ọ ruẹ obe-uzizie okokohọ na evaọ unuẹthẹ riẹ o kere ileta se uwou ogha. Nọ aye na ọ tẹ ruẹ Isẹri Jihova nọ e be nya ziọ uwou riẹ, ọ jẹ hai dhere. O kere nọ: “Me wo emamọ uwou, gbe emamọ ọzae, yọ me je roro nọ me wo oware kpobi nọ o rẹ sae kẹ omẹ evawere. Rekọ eva e jẹ were omẹ ghele he, yọ me wo ẹruore ọvuọvo ho evaọ uzuazọ. Fikiere mẹ tẹ dhẹ emaele egba ivẹ (200) kpohọ okokohọ na evaọ Ẹdẹ-Ọmaha.” Eware nọ a wuhrẹ e were riẹ te epanọ ọ rọ rehọ ifonu se ọzae riẹ inọ ọ be daji obei re ọ nwani kpohọ okokohọ na evaọ Ẹdoka taure o te zihe kpo. Ọ ta nọ: “Mẹ gaviezọ kẹ eme nọ a ru na kpobi, me lele Isẹri Jihova buobu ta ẹme, mẹ tẹ gbae mu nọ usu nana u re kuhọ họ.” Nọ o te uwou no, a te mu Ebaibol họ ewuhrẹ kugbei. Nọ emerae ene e vrẹ no, o te te owhowho-uvie. “Eva e were omẹ gaga inọ mẹ ruẹ obe-uzizie na evaọ unuẹthẹ mẹ keme enẹna me wo uvi evawere no evaọ uzuazọ.”
Ahwo buobu nọ ma zizie a te nyaze. Fikiere, daoma w’obọ evaọ uzizie nana nọ u wuzou gaga na. Wha ebe-uzizie kpobi nọ i kiọkọ owhẹ obọ kpohọ okokohọ na, re whọ rehọ ae zizie amọfa nọ whọ nya ku.
[Ẹkpẹti nọ o rrọ ẹwẹ-obe avọ 3]
Ẹvẹ Ma te rọ Kẹ Ahwo Obe-Uzizie Na?
Re ma sae kẹ ahwo kpobi nọ a rrọ ẹkwotọ mai, ma rẹ ta ẹme na kpẹkpẹe. Ma te yere ohwo na no, ma sae ta nọ: “Ma be ghale obe-uzizie nana. Ọra ona. Whọ te jariẹ ruẹ oke gbe oria nọ ma te jọ ru okokohọ na.” Ta ẹme na sasasa. Whọ tẹ be ghale obe-uzizie na evaọ Ẹdẹ-Ọmaha gbe Ẹdoka, whọ rẹ sae jẹ rọ emagazini kẹ ahwo nọ i dhesẹ isiuru.