Dhesẹ Uvi Isiuru—Ẹkwoma Ẹromuhotọ
1 Jihova Ọghẹnẹ avọ Kristi Jesu a mae viodẹ evaọ evuhumu igogo eware nọ e rrọ ahwo oja gbe obọ nọ a re fihọ kẹ ae. (2 Irv. 16:9; Mak 6:34) Nọ ma te vuhu isiuru gbe eware nọ e rrọ ọdawẹ ahwo nọ ma nyaku evaọ odibọgba na mu, ẹsejọhọ ma te sai nwene edhere usiuwoma ota mai lele oghẹrẹ otioye.
2 Mu Ẹro họ Otọ Ziezi: Jesu o muẹrohọ otọ. (Mak 12:41-43; Luk 19:1-6) Ere ọvona re, nọ ma tẹ nya ruọ ighẹ ohwo je muẹrohọ iwoho hayo eware efa nọ i dhesẹ egagọ nọ ohwo na ọ rrọ, eme nọ a kere họ imoto, hayo eware nọ emaha na e rẹ rọ zaharo evaọ ighẹ na, ma sae rọ eware yena mu usiuwoma ota họ evaọ edhere nọ o kiehọ.
3 Oghẹrẹ nọ ovao ohwo o rrọ gbe oghẹrẹ nọ ọ rọ kpahe ẹme k’owhẹ u re dhesẹ oghẹrẹ nọ iroro riẹ e rrọ. (Itẹ 15:13) Ẹsejọhọ ọ gwọlọ omosasọ fiki uwhu ohwo jọ nọ o you hayo iyero ebẹbẹ efa. Ikere nọ e ta kpahe ẹbẹbẹ riẹ na nọ a re se kẹe e rẹ sae were iẹe. (Itẹ 16:24) Kọ ohwo nọ o wo uwou na ọ be variẹ oma kpohọ oria jọ manikọ o wọ ọmọ nọ ọ be viẹ? Otẹrọ ere, o sai woma re who ru ọruẹrẹfihotọ nọ who re ro zihe okiofa. Ẹkwoma amọfa nọ ma re roro kẹ je ‘weri kẹ,’ o sae wọ ohwo na nọ ọ jẹ gaviezọ nọ ma te zihe.—1 Pita 3:8.
4 Hai Nwene Eme Ra: Pọl ukọ na o muẹrohọ inọ okpẹwho Athẹns u wo umukpẹ aruẹri nọ a ruẹrẹ họ kẹ “Ọghẹnẹ nọ A Riẹ Hẹ.” Onana o tẹ lẹliẹe nwene oghẹrẹ nọ ọ rọ ta usiuwoma na, ọ ta nọ: “Whaọ ọnọ wha bi mu gọ ogbogbori na, ọye me bi dhesẹ kẹ owhai na.” Edhere areghẹ nọ Pọl o ro mu ẹmeọta riẹ họ o lẹliẹ ibuobu jẹ ovuẹ Uvie na rehọ je kurẹriẹ.—Iruẹru 17:23, 34.
5 Evaọ edhere ọvona, ẹro nọ ma re muhotọ o re fiobọhọ k’omai vuhu oware nọ o rrọ isiuru ohwo, o vẹ jẹ lẹliẹ omai nwene ẹmeọta mai lele ere. Rehọ enọ nọ e rẹ sae lẹliẹ ohwo na ta oware nọ o riẹ eva ro ruiruo. Roro kpahe ikereakere nọ e rẹ sae lẹliẹ isiuru riẹ rro haro, re whọ rehọ ai ruiruo. (Itẹ 20:5) Ẹro nọ ma re muhotọ gbe uvi isiuru nọ ma re dhesẹ kpahe amọfa u ti fiobọhọ k’omai ta usiuwoma na avọ ona.