Kọ Ọmọ Ra Ọ Sae Jẹ Iroro Egbagba nọ E Wọhọ erọ Ọkpako?
1 Iroro egbagba kpahe eme? Azẹ osefihọ-oma. Wọhọ epanọ a dhesẹ evaọ uzoẹme na “Walk as Instructed by Jehovah” (Nya Lele Ọkpọvio Jihova) eva Uwou-Eroro ọ June 15, 1991 (ọrọ Oyibo), emọ Isẹri Jihova a dikihẹ gaga no ro dhesẹ inọ isiuru rai re a yoẹme kẹ uzi Ọghẹnẹ kpahe azẹ u wuzou kẹ ae gaga wọhọ epanọ o rrọ kẹ esẹgbini rai na. Kọ a sai rẹro oyena mi ọmọ ra re?
2 Eme Uzi O Ta? Evaọ obọ United States, Okọto Ukpehru ubrotọ Illinois họ okọto nọ o mai kpehru nọ o whobọhọ udu nọ ọmọ nọ ọ rẹ sae jiroro wọhọ ọkpako ọ rẹ rọ se azẹ. Nọ a jẹ kiẹ ẹme ọmọtẹ ikpe 17 jọ nọ ọ rrọ osẹri Jihova riwi, okọto na u juzi nọ: “Otẹrọnọ imuẹro na i vẹ inọ ọmọ na o te epanọ o re ro wo otoriẹ oware nọ u re no owojẹ riẹ ze [jẹ] sae jẹ iroro egbagba wọhọ ọkpako, kiyọ ehri-uzi nọ o rehọ udu ẹsalọ kẹ ọmọ nọ ọ rẹ sae jiroro egbagba wọhọ ọkpako na o kẹ riẹ uvẹ nọ ọ rẹ rọ rehọ hayo se oghẹrẹ usiwo-imu nọ u je rie.” Fikiere, re a riẹ sọ ọmọ o te ohwo nọ ọ rẹ jiroro obọriẹ no, edọkita hayo enọ e rrọ ọkwa iruo na a rẹ kiẹ ọnọ ọ be mọ na riwi re ọ ta ẹkẹunu riẹ kpahe ẹsiọ azẹ. U fo nọ ọmoha na o gine wo otoriẹ oghẹrẹ nọ ẹyao riẹ ọ ga te gbe oware nọ u re no usiwo nọ ọyeọvo ọ be salọ na ze, ọ vẹ rọ unu riẹ ta orọwọ riẹ kpahe uzi Ọghẹnẹ kpahe azẹ, yọ o re ru ere avọ imuẹro jẹ tae vevẹ.
3 Eme Ọmọ Ra Ọ Te Ta? Kọ emọ ra e sae ta ẹkẹunu rai evaọ ẹme uzi Ọghẹnẹ kpahe azẹ? Kọ a rọwo no udu rai ze inọ re a ‘si oma no azẹ’ yọ ujaje Ọghẹnẹ? (Iruẹru 15:29; 21:25) Kọ a sae rehọ Ikereakere na ro dhesẹ ẹrọwọ rai vevẹ? Kọ a te rọ aruọwha dhesẹ edikihẹ ọwhawha rai kpahe azẹ otẹrọnọ edọkita ọ ruẹ nọ uzuazọ rai o rrọ awa, o tẹ make rrọ nọ esẹgbini rai a rrọ kugbe ai hi? Nọ ‘oke gbe eware idudhe e rẹ via kẹ [omai] kpobi’ na, ẹvẹ whọ sae rọ thọ emọ ra kpahe kẹ use-abọ idudhe jọ kpobi nọ o rẹ sae dawo ẹgbakiete rai?—Ọtausi. 9:11; Ẹf. 6:4.
4 Esẹgbini, Eme Wha Rẹ Sai Ru? Wha wo owha-iruo nọ wha re ro wuhrẹ emọ rai eriwo Ọghẹnẹ kpahe azẹ. (2 Tim. 3:14, 15) A re duku oruvẹ ovevẹ evaọ obe ọ Reasoning na, ẹwẹ-obe avọ 70-74. Wha wuhrẹ iẹe kugbe wọhọ uviuwou. Rehọ abọ ẹme nọ ọ ta nọ “If Someone Says” (Otẹrọnọ Ohwo Jọ Ọ Ta Nọ)—evaọ ẹwẹ-obe avọ 74-76, ro ru abọ omaruẹrẹ kpahe kugbe emọ ra ro fiobọhọ kẹ ae wo ona nọ a rẹ rọ ta oware nọ a rọwo gbe ẹjiroro nọ a rọ rọwo iẹe. (1 Pita 3:15) Eware efa nọ i re fiobọhọ wuhrẹ omai kpahe ẹme azẹ họ ibroshọ na How Can Blood Save Your Life? gbe Uwou Eroro ọ July 1, 2004, ẹwẹ-obe avọ 3-13. Fibae, ividio na Transfusion-Alternative Health Care—Meeting Patient Needs and Rights gbe No Blood—Medicine Meets the Challenge, enọ e rrọ DVD enẹna nọ uzoẹme riẹ o rrọ Transfusion Alternatives—Documentary Series, o kẹ ovuẹ nọ u muẹro kpahe epanọ imu gbe oma-obẹrọ orọ ababọ-azẹ o rọ rrọ oware iroro gbe oware nọ u re ruiruo. Kọ uviuwou ra a riwi ividio nana jẹ jiroro kpahe eme nana no kẹle na?
5 Fiobọhọ kẹ emọ ra re a ‘dhesẹ kẹ omobọ rai onọ u woma, nọ a jẹrehọ, gbe oware nọ oreva Ọghẹnẹ’ o rrọ kpahe azẹ. Kẹsiẹe a vẹ sae jẹ emamọ iroro nọ Jihova ọ rẹ ghale.—Rom 12:2.
[Study Questions]
1. Edikihẹ vẹ izoge Ileleikristi a yọrọ no kpahe eroruiruo azẹ? Kẹ oriruo jọ.
2. Edikihẹ abọ-uzi vẹ okọto jọ u fihọ iruo kpahe ọmọ jọ nọ ọ se azẹ ose-fihọ oma, kọ eme esẹgbini Ileleikristi avọ emọ esese rai a re wuhrẹ no onana ze?
3. Didi enọ esẹgbini a re roro kpahe ziezi, kọ fikieme?
4, 5. (a) Didi owha-iruo esẹgbini a wo, kọ ẹvẹ a sai ro ru ei gba? (b) Eware vẹ e riẹ nọ i re fiobọhọ kẹ esẹgbini?