Dhesẹ Uvi Isiuru—Ẹkwoma Ejiri nọ Who Re Jiri Amọfa
1 Ejiri nọ a re jiri amọfa n’eva ze o rẹ kẹ ae uduotahawọ gbe ọwhọ, jẹ wha oghọghọ se ai. Iwhowho-uvie buobu a ruẹ no inọ umutho eme ujiro nọ a rẹ ta kẹ ahwo o be hai fiobọhọ nọ a be rọ gaviezọ kẹ ae evaọ odibọgba na. Ẹvẹ ma sai ro jiri amọfa nọ ma be daoma re ma vuẹ ae emamọ usi na?
2 Mu Ẹro Hotọ: Jesu Kristi nọ a kẹ oruaro no na o muẹrohọ iruo iwoma nọ ikoko nọ e jọ Esia Minor a ru. (Evia. 2:2, 3, 13, 19; 3:8) Ere ọvona re, uvi isiuru nọ ma re wo kpahe ahwo nọ ma jọ odibọgba na nyaku o te w’omai gwọlọ idhere nọ ma re ro jiri ai. Wọhọ oriruo, ighẹ nọ a ru fihọ fuafo jẹ rrọ kpatiẹ, ọsẹ hayo oni nọ o bi dhesẹ uvi uyoyou kẹ emọ riẹ, hayo ohwo nọ ma nyaku nọ o yere omai sasasa, i re rovie uvẹ fihọ k’omai nọ ma re ro jiri ai. Kọ whọ be ginẹ hai mu ẹro hotọ jẹ rehọ uvẹ itieye na ruiruo?
3 Jọ Ohwo nọ Ọ rẹ Gaviezọ Ziezi: Nọ whọ tẹ be ta usiuwoma kẹ amọfa, ru ai re a tẹme nọ ọ rrọ ae eva ẹkwoma enọ nọ i fo nọ whọ rẹ nọ ae. Dhesẹ adhẹẹ kẹ ae ẹkwoma ezọ nọ whọ rẹ gaviẹ ziezi kẹ ẹme nọ a be ta. (Rom 12:10) Ababọ avro, whọ te jọ ẹme nọ a ta ruẹ oware jọ nọ o te lẹliẹ owhẹ jiri ai ziezi, whọ vẹ rọ ere ta kpahe oware jọ nọ whai imava wha jọ rọwo kugbe.
4 Rehọ Areghẹ Ruiruo: Eme ma re ru otẹrọnọ ohwo nọ ma be t’ẹme kẹ ọ ta oware jọ nọ o rọwo kugbe Ebaibol ho? Ukpenọ who re lele iei vro-avro, yere ohwo na kẹ ẹme nọ ọ ta na, re whọ t’ẹme na haro ẹkwoma ẹme wọhọ “mẹ ruẹ nọ who gine wo isiuru kpahe ẹme nana ziezi.” (Kọl. 4:6) O tẹ make rọnọ ohwo na o bi sikẹ, ma rẹ sai jiri ohwo na noke ruoke fiki uvi isiuru nọ o wo kpahe ẹme na. Eme iwowolẹ itieye na e rẹ sai ru udu ohwo nọ o wọhọ nọ ọ wọso emamọ usi na lọhọ.—Itẹ 25:15.
5 Re o sae kẹ uduotahawọ, eme ọ ujiro nọ ma rẹ ta kẹ amọfa e rẹ jọ enọ i gine no omai udu ze. Eroruiruo eme ọbọga itieye na o rẹ wha orro se Jihova, je ru amọfa gaviezọ kẹ ovuẹ Uvie na.