Daoma Wo Emamọ Omaa Iruẹru Abọ-Ẹzi, Re Who Wo Irere Buobu
1 Nọ who kurẹriẹ ruọ Oleleikristi obọ, ababọ avro whọ daoma gaga re who wo emamọ omaa orọ iruẹru abọ-ẹzi nọ o kẹre te uwuhrẹ Ebaibol, iwuhrẹ Ileleikristi enya, usiuwoma ota, gbe olẹ. Yọ fikinọ Jihova ọ ghale omodawọ ra, who te wo ẹnyaharo abọ-ẹzi. Ẹsejọhọ, anwẹnọ whọ rọ họ-ame no, ikpe buobu e vrẹ no. Kọ whọ be yọrọ emamọ omaa iruẹru abọ-ẹzi nọ who wo nọ whọ họ-ame no obọ?
2 Rọ Oma Totọ Kiẹ Omaa Ra Riwi: Kọ o rrọ uruemu ra re who se oria jọ Ebaibol na kẹdẹ kẹdẹ? Eghale nọ i re t’omai evaọ ere oruo e rro kẹhẹ! (Jos. 1:8; Ol. 1:2, 3) Evaọ Izrẹl oke anwae, ovie kpobi o re se obe Izi Ọghẹnẹ evaọ “edẹ uzuazọ riẹ kpobi.” Irere vẹ i re noi ze? O rẹ lẹliẹe wo udu omarokpotọ, je wuhrẹ epanọ ọ rẹ rọ dhozọ Jihova re ọ siọ ijaje riẹ ba ẹjẹkufiẹ. (Izie. 17:18-20) Ere ọvona nẹnẹ re, isase Ebaibol ikẹdẹ kẹdẹ u re fiobọhọ k’omai kare afuẹwẹ evaọ akpọ nana nọ umuomu u gbeku no na. U re je fiobọhọ k’omai thomakpahe ziezi kẹ odibọgba na.—Fil. 2:15; 2 Tim. 3:17.
3 Jesu o wo uruemu nọ o re ro kpohọ uwou egagọ-ode, oria nọ a je se jẹ ta kpahe Ikereakere na. (Luk 4:16) Ababọ avro, onana o kẹ riẹ ẹgba rẹriẹ ovao dhe edawọ nọ i te rie. Ithubro abọ-ẹzi nọ a be jọ iwuhrẹ ukoko k’omai gbe omakugbe ‘omosasọ’ efa nọ ma bi wo e be bọ omai ga re. (Rom 1:12) Inievo mai nọ ma re kuomagbe u re fiobọhọ k’omai thihakọ ebẹbẹ edẹ urere enana. (Hib. 10:24, 25) Kọ o gbẹ rrọ uruemu ra re who kpohọ iwuhrẹ ukoko kpobi?
4 Ikuigbe Ebaibol e ta k’omai inọ ikọ na a jẹ ta usiuwoma ‘kẹdẹ kẹdẹ eva uwou egagọ-ode, je no uwou ruọ uwou.’ (Iruẹru 5:42) Dede nọ ma te sae nwane ta usiuwoma kẹdẹ kẹdẹ hẹ, kọ ma sai ru ei fihọ uruemu mai re ma jọ abọ odibọgba na jọ wobọ koka koka? Ẹkwoma ere oruo, ma ti wo onaa vi epaọ ọsosuọ nọ ma rẹ rọ ta Ẹme Ọghẹnẹ, yọ ma te ruẹ emamọ iyẹrẹ nọ ma be rọ uzẹme Ebaibol wuhrẹ amọfa na.
5 A ghale Daniẹl ọruẹaro na fikinọ ọ gọ Jihova “ẹsikpobi” evaọ edẹ uzuazọ riẹ kpobi. Onana o kẹre te uruemu riẹ nọ ọ jẹ hae rọ lẹ se Jihova ẹsikpobi. (Dan. 6:10, 16, 20) Ere ọvona re, nọ ma be lẹ se Jihova ẹsikpobi na, ọ te rọ ẹzi ọfuafo riẹ ghale omai. (Luk 11:9-13) Ofariẹ re, Jihova o ti si kẹle omai, ọ vẹ te lẹliẹ omai reawere usu okpekpe kugbei. (Ol. 25:14; Jem. 4:8) Osaohwa riẹ o rro kẹhẹ! Fikiere, joma ruiruo ziezi re ma yọrọ emamọ omaa iruẹru abọ-ẹzi, re eghale Jihova i te omai obọ.
[Study Questions]
1. Fikieme u je wuzou re whọ kiẹ omaa iruẹru abọ-ẹzi ra riwi?
2. Ẹvẹ ma re ro wo erere no isase Ebaibol ikẹdẹ kẹdẹ ze?
3. Eghale vẹ i re t’omai nọ ma te bi kpohọ iwuhrẹ ẹsikpobi?
4. Ẹvẹ usiuwoma ota nọ ma rẹ nya koka koka o rẹ rọ k’omai erere?
5. Fikieme u je wuzou re ma lẹ se Jihova ẹsikpobi?