Fi Obọ họ kẹ Amọfa re A Jọ Egbẹnyusu Ọghẹnẹ
1 Nẹnẹ, a bi wuhrẹ ahwo erẹwho kpobi idhere Jihova. (Aiz. 2:2, 3) Rekọ, re ahwo otiọye na a sae “rehọ odiri mọ ibi,” o gwọlọ nọ a re you Jihova. (Luk 8:15; Mak 12:30) Ababọ uyoyou utioye, a sai wo ẹgba nọ a rẹ rọ dadamu wọso otunyẹ eyoma oruo ho hayo wo udu nọ a re ro ru oware uwoma ha. Edhere jọ nọ ma sai ro fiobọhọ kẹ amọfa re a mu emamọ usu kugbe Jihova họ ẹkwoma ekwakwa-aghae riẹ nọ ma rẹ t’ẹme kpahe ziezi. Tuduhọ ae awọ re a roro ziezi kpahe evuẹ nọ e rrọ obe ọ Si Kẹle Jihova na.
2 Oriruo Ra: Oriruo ra ọ rẹ sai duobọ te udu emọ obe-uwuhrẹ Ebaibol ra ziezi. Nọ a tẹ ruẹ nọ who rri usu ra kugbe Jihova ghaghae, jẹ ruẹ epanọ oyena u bi ro dhesẹ oma via evaọ uzuazọ ra, oma o rẹ sae wọ ae re a mu usu okpekpe utioye na kugbe Jihova. (Luk 6:40) Evaọ uzẹme, oriruo mai o re kpomahọ amọfa vi ẹmeunu mai evaọ ẹsibuobu.
3 Ugogo edhere jọ nọ esẹgbini a re ro wuhrẹ emọ rai re a you Jihova họ ẹkwoma oriruo rai. (Izie. 6:4-9) Ọzae avọ aye jọ a gwọlọ jọ ukoko na yọrọ emọ rai, fikiere, a ta kẹ esẹgbini nọ e yọrọ emọ rai ziezi re a kẹ ae ohrẹ. Ọzae na ọ ta nọ: “Ugogo oware jọ nọ enwenọ ahwo kpobi nọ ma nọ a ta họ oriruo ọsẹgboni na.” Fikiere, esẹgbini e rẹ sae rọ ẹkwoma oghẹrẹ nọ a bi yeri uzuazọ rai ro fi oriruo họ otọ kẹ emọ rai kpahe oware nọ u dhesẹ re a jọ “ogbẹnyusu Ọghẹnẹ.”—Jem. 2:23.
4 Olẹ nọ U No Udu Ze: Whọ sai je fiobọhọ kẹ amọfa re a mu usu kugbe Jihova ẹkwoma ewuhrẹ nọ who re wuhrẹ ai re a lẹ no udu rai ze. Whọ sai si iroro rai kpohọ olẹ oriruo nọ Jesu o wuhrẹ ilele riẹ na, gbe elẹ efa nọ e rrọ Ebaibol na. (Mat. 6:9, 10) Whọ sae rọ ẹkwoma olẹ nọ whọ be jọ iraro emọ ra gbe emọ-uwuhrẹ Ebaibol ra lẹ ro wuhrẹ ai epanọ a rẹ lẹ. Nọ a bi yo eme nọ whọ be ta no udu ze na, a rẹ sae riẹ epanọ who you Jihova te. Tuduhọ ae awọ re a “lẹ kẹse kẹse” nọ a tẹ rẹriẹ ovao dhe edawọ. (Rom 12:12) Nọ a be ruẹ obufihọ Jihova evaọ oke ẹbẹbẹ na, a ve ti fi eva họ iẹe je you rie wọhọ uvi ogbẹnyusu.—Ol. 34:8; Fil. 4:6, 7.