Fi Obọ họ kẹ Emọ-Uwuhrẹ Ebaibol re A Te Iwhowho-Uvie
1 Iruo nọ Jesu ọ kẹ ilele riẹ nọ a kere fihọ Matiu 28:19, 20 na e jọ iruo ilogbo. Ọ ta kẹ ilele riẹ inọ a ru ilele efa, enọ e te ruabọhọ iruo na. A vẹ te rọ ere fi otọhotọ họ kẹ ewhowho urere ọrọ emamọ usi Uvie Ọghẹnẹ wariẹ akpọ-soso họ eva etoke urere nana nọ ma rrọ na.—Mat. 24:14.
2 Emọ-uwuhrẹ Ebaibol mai a sae jọ emọ obọmai hayo amọfa nọ a rọwo inọ ma uwuhrẹ Ebaibol kugbe ai. Ma gwọlọ fiobọhọ kẹ ahwo otiọye na re a vuhumu inọ ai omarai a wo owha-iruo nọ a re ro fiobọhọ kẹ amọfa re a zihe ruọ ilele Jesu Kristi.—Luk 6:40.
3 Ruẹrẹ Ae Kpahe re A Se Isẹri: Tuduhọ enọ who bi wuhrẹ awọ re a hae ta eware nọ a bi wuhrẹ kẹ amọfa. Gbiku eware isiuru nọ whọ jọ usiuwoma ota nyaku kẹ ae. Jọ emaha muọ emọ ra họ ewuhrẹ re a jọ odibọgba na wobọ ziezi wọhọ epanọ ẹgba rai o te. (Ol. 148:12, 13) Rọ ẹmeunu gbe oriruo ra dhesẹ epanọ who wo ovuhumuo kẹ odibọgba na te.—1 Tim. 1:12.
4 Ahwo nọ e jẹ izi riẹ rehọ je bi koko ai ọvo Jihova o re ro ruiruo. Uzẹme o rrọ inọ iwhowho-uvie ekpokpọ a rẹ nwani wo eriariẹ wọhọ iwhowho-uvie nọ e họ-ame kri no nọ i wo onaa ziezi hi, rekọ o gwọlọ nọ iwhowho-uvie ekpokpọ a rẹ jọ enọ e rọwo jẹ sai ru igogo iwuhrẹ Ebaibol vẹ kẹ amọfa. (Rri A Koko Omai Họ ẹwẹ. 79-82.) A rẹ jọ ahwo nọ a siomano “Babilọn ologbo” na gbe iruẹru isuẹsu akpọ na no riẹriẹriẹ, je bi kpohọ iwuhrẹ ukoko kẹse kẹse.—Evia. 18:2, 4; Jọn 17:16; Hib. 10:24, 25.
5 Nọ u te mu owhẹ ẹro inọ ọmọ-uwuhrẹ Ebaibol ra o te ọnọ ọ rẹ jọ owhowho-uvie nọ ọ re họ-ame he no, whọ rẹ vuẹ ọsẹro ukoko na. O ti ru ọruẹrẹfihotọ nọ ekpako ivẹ jọ a ti ro lele owhẹ avọ ọmọ-uwuhrẹ Ebaibol ra na ta ẹme re a riẹ sọ o te epanọ ọ rẹ rọ jọ owhowho-uvie nọ o re họ-ame he evaọ ukoko na. Kẹsena o vẹ te jọ uvẹ-ọghọ k’owhẹ nọ who re ro wuhrẹ iẹe evaọ iruo odibọgba na.