Kọ Whọ be Vae?
Va eme? Eme nọ a re kere fihọ ekade ọ DPA na (durable power of attorney) nọ a ruẹrẹhọ kẹ Isẹri Jihova nọ e họ-ame no. Nọ ohwo ọvo ọ ‘riẹ oware nọ o rẹ sae via kẹe odẹ notha ha’ na, u wuzou re whọ jiroro kpahe oghẹrẹ usiwo-imu gbe edhere nọ a re ro siwi owhẹ nọ oware idudhe o tẹ via, je kere iroro nọ whọ jẹ na fihotọ. (Jem. 4:14; Iruẹru 15:28, 29) Oyejabọ nọ a je ru ividio na Transfusion-Alternative Health Care—Meeting Patient Needs and Rights, re u fiobọhọ k’owhẹ. Rri rie jẹ lẹ kpahe iẹe, re whọ jẹ rọ enọ nọ e rrọ obotọ na rọ kiẹ oware nọ who wuhrẹ riwi.—Muẹrohọ: Fikinọ ividio na o wo eria jọ nọ a jo dhesẹ oma-obẹrọ sa-sa kpẹkpẹe, esẹgbini a rẹ yọroma evaọ eriwi ividio na kugbe emaha.
(1) Fikieme otu usiwo-imu jọ a be rọ wariẹ roro kpahe azẹ osefihọ oma? (2) Fodẹ iriruo esa erọ obẹrọ ogaga nọ a sai ru no ababọ azẹ osefihọ oma. (3) Bro edọkita gbe ewena oma-obẹrọ evaọ akpọ na soso i dhesẹ no inọ u no rai eva ze re a siwi ahwo ababọ azẹ osefihọ oma? Fikieme u je no ai eva ze inọ a re ru ere? (4) Eme ekiakiẹ kpahe usiwo imu evaọ ẹsipito nọ a ru kẹle na i dhesẹ via no kpahe eroruiruo azẹ? (5) Enwoma vẹ i bi no azẹ osefihọ oma ze? (6) Eme ewena buobu a ta no kpahe irere ona usiwo imu nọ a re ro nwene azẹ osefihọ oma? (7) Eme ọ rẹ lẹliẹ azẹ re no ohwo oma? Ẹvẹ azẹ o re reno ohwo oma te nọ ọ jẹ sae gbẹ jọ uzuazọ? Eme a rẹ sai ru re azẹ na ọ wariẹ bu? (8) Eme a re ru re azẹ nọ ọ rrọ ohwo oma o bu viere? (9) Ona vẹ a be rọ bẹre ahwo re azẹ ọ seba ehwẹ hrọ? (10) Kọ usiwo imu nọ u re nwene azẹ osefihọ oma o sai ruiruo eva oma emaha gbe eva etoke idudhe nọ ohwo ọ tẹ rrọ uyero uwhu-gbe-azọ? (11) Ovẹ họ ugogo ehri-uzi jọ ọrọ oghẹrẹ nọ edọkita i re ru ohwo nọ a bi siwi re o tẹ jọ emamọ usiwo? (12) Fikieme u ro wuzou kẹ Ileleikristi re a jiroro usiwo ababọ-azẹ kpahotọ? Ẹvẹ ma sai ro ru onana?
Ẹjẹrehọ eghẹrẹ usiwo jọ nọ a jọ ividio na dhesẹ yọ iroro-ejẹ obọra rọwo kugbe obroziẹ-iroro ra nọ whọ rehọ Ebaibol wuhrẹ no. Kọ whọ jiroro na mu no kpahe oghẹrẹ imu gbe idhere usiwo imu nọ whọ gwọlọ nọ a ro siwi owhẹ gbe emọ ra? Rọkẹ evuẹ ikokodo efa kpahe ẹme nana, rri “Enọ Ahwo nọ A s’Ebe” evaọ Uwou-Eroro ọ June 15, 2004, gbe October 15, 2000, (erọ Oyibo), gbe uko-obeva Odibọgba Uvie Mai ọrọ December 2006 nọ u wo uzoẹme na: “Didi Iroro Mẹ rẹ Jẹ Kpahe Eroruiruo Egẹgẹ-Esese Azẹ gbe Oghẹrẹ Usiwo-Imu nọ U Kpomahọ Eroruiruo Azẹ Obọmẹ?” U re woma re whọ vuẹ amiunugu ra gbe ahwo uviuwou ra nọ e rrọ Isẹri Jihova ha kpahe iroro nọ whọ jẹ na vevẹ.