Ividio nọ I Fi Elo họ Oghẹrẹ Usiwo Imu jọ nọ U Wuzou Nẹnẹ
Eriẹ-izi gbe egba usiwo imu a be tẹrovi eriwo ohwo gbe udu nọ ohwo ọ rẹ rọ salọ usiwo nọ ọ gwọlọ enẹna vi epaọ anwẹdẹ. Onana o wha oghẹrẹ usiwo imu gbe idhere usiwo imu ekpokpọ ze no enọ Isẹri Jihova a rẹ sai wo erere no ze. (Iruẹru 15:28, 29) Onana họ oware nọ ividio na Transfusion-Alternative Health Care—Meeting Patient Needs and Rights, o tẹro vi. Rri rie, re whọ jẹ kiẹ oware nọ who wuhrẹ riwi.—Muẹrohọ: Fikinọ ividio na o wo eria jọ nọ a jo dhesẹ oma-obẹrọ sa-sa kpẹkpẹe, esẹgbini a rẹ yọroma evaọ eriwi ividio na kugbe emaha.
(1) Fikieme otu usiwo-imu jọ a be rọ wariẹ roro kpahe eroruiruo azẹ osefihọ oma? (2) Fodẹ iriruo esa erọ obẹrọ ogaga nọ a rẹ sai ru ababọ azẹ osefihọ oma. (3) Bro edọkita gbe ewena oma-obẹrọ evaọ akpọ na soso i dhesẹ no nnọ u no rai eva ze re a siwi ahwo ababọ azẹ osefihọ oma? Fikieme u je no ai eva ze nnọ a re ru ere? (4) Eme ekiakiẹ kpahe usiwo imu evaọ ẹsipito nọ a ru kẹle na i dhesẹ via no kpahe eroruiruo azẹ? (5) Enwoma vẹ i bi no azẹ osefihọ oma ze? (6) Eme ewena buobu a ta no kpahe irere ona usiwo imu nọ a re ro nwene azẹ osefihọ oma? (7) Eme ọ rẹ lẹliẹ azẹ re no ohwo oma? Ẹvẹ azẹ o re no ohwo oma te re ọ gbẹ jọ uzuazọ? Eme a rẹ sai ru re azẹ na ọ wariẹ bu? (8) Eme a re ru re azẹ nọ ọ rrọ ohwo oma o bu viere? (9) Ona vẹ a be rọ bẹre ahwo re azẹ ọ seba ehwẹ hrọ? (10) Kọ usiwo imu nọ u re nwene azẹ osefihọ oma o sai ruiruo eva oma emaha gbe eva etoke idudhe nọ ohwo ọ tẹ rrọ uyero uwhu-gbe-azọ? (11) Ovẹ họ ugogo ehri-uzi jọ ọrọ oghẹrẹ nọ edọkita i re ru ohwo nọ a bi siwi re o tẹ jọ emamọ usiwo? (12) Fikieme u ro wuzou kẹ Ileleikristi re a jiroro usiwo ababọ-azẹ kpahotọ? Ẹvẹ ma sai ro ru onana?
Ọjẹrehọ usiwo jọ nọ a jọ ividio na dhesẹ yọ ẹjiroro omobọ ohwo rọwo kugbe iroro-oziẹobro ohwo nọ a rehọ Ebaibol wuhrẹ no. Kọ whọ jiroro usiwo imu nọ a re ro nwene azẹ osefihọ oma no, onọ whẹ avọ emọ ra wha rẹ sae rehọ? U re woma re whọ vuẹ ahwo uviuwou ra nọ e rrọ Isẹri hi vevẹ kpahe ẹjiroro ra gbe oware nọ o wha ẹjiroro na ze.—Rri “Enọ Ahwo nọ A s’Ebe” evaọ Uwou-Eroro ọ June 15, 2004, gbe October 15, 2000, (erọ Oyibo).