Kọ Whọ Ruẹrẹ Oma Kpahe no Kẹ Usiwo Idudhe?

Ẹyao hayo omonwa idudhe o rẹ vuẹ uwou se ohwo ho. (Jem. 4:14) Fikiere, ohwo owareghẹ ọ rẹ daoma ruẹrẹ oma kpahe. (Itẹ 22:3) Kọ whọ jiroro oghẹrẹ usiwo-imu nọ whọ te salọ, je kere ai fihọ otọ no? A ru ividio na Transfusion-Alternative Health Care—Meeting Patient Needs and Rights, gbe abọ avivẹ riẹ Transfusion-Alternatives—Documentary Series, re u fi obọ họ k’owhẹ. Rri ividio na otẹrọnọ who re yo Oyibo. Fikinọ ividio na u wo eria jọ nọ a jo dhesẹ oma-obẹrọ sa-sa kpẹkpẹe, esẹgbini a rẹ yọroma nọ a tẹ gwọlọ riwi ividio na kugbe emọ rai.

(1) Fikieme otu usiwo-imu jọ a be rọ wariẹ roro kpahe azẹ osefihọ oma? (2) Fodẹ iriruo esa erọ obẹrọ ogaga nọ a sai ru no ababọ azẹ osefihọ oma. (3) Fikieme edọkita gbe ewena oma-obẹrọ buobu evaọ akpọ na soso a rọ gwọlọ nọ a re siwi ahwo ababọ azẹ osefihọ oma? (4) Eme ekiakiẹ kpahe usiwo imu evaọ ẹsipito nọ a ru kẹle na i dhesẹ via no kpahe eroruiruo azẹ? (5) Enwoma vẹ i bi no azẹ osefihọ oma ze? (6) Eme ewena buobu a ta no kpahe irere ona usiwo imu nọ a re ro nwene azẹ osefihọ oma? (7) Eme ọ rẹ lẹliẹ azẹ re no ohwo oma? (8) Eme a re ru re azẹ nọ ọ rrọ ohwo oma o bu viere? (9) Ona vẹ a be rọ bẹre ahwo re azẹ ọ seba ehwẹ hrọ? (10) Kọ usiwo imu nọ u re nwene azẹ osefihọ oma o sai ruiruo eva oma emaha gbe eva etoke idudhe nọ ohwo ọ tẹ rrọ uyero uwhu-gbe-azọ? (11) Ovẹ họ ugogo ehri-uzi jọ ọrọ oghẹrẹ nọ edọkita i re ru ohwo nọ a bi siwi re o tẹ jọ emamọ usiwo?

Nọ orọnọ eghẹrẹ usiwo nọ a dhesẹ evaọ ividio na yọ enọ ohwo ọ rẹ salọ otẹrọnọ i kiehọ obroziẹ-iroro riẹ na, who du hẹrẹ bẹsenọ whọ rẹ jọ uyero uwhu-gbe-azọ re whọ tẹ te salọ họ. Uzou avọ 7 obe ọ “Uyoyou Ọghẹnẹ” na avọ eria efa nọ a jariẹ fodẹ, gbe uko-obeva ọ Odibọgba Uvie Mai ọrọ December 2006, i ti fi obọ họ kẹ owhẹ jẹ iroro egbagba. Otẹrọnọ whọ họ-ame no, kere usiwo-imu nọ whọ salọ fihọ ekade DPA, jẹ hae whae lele oma ẹsikpobi.

[Uwoho nọ o rrọ ẹwẹ-obe avọ 3]

Kọ whọ salọ eghẹrẹ usiwo-imu nọ e were owhẹ kpahotọ no je kere ai fihọ ekade DPA ra no?