Ẹkpẹti Onọ

◼ Kọ u fo re ohwo nọ ọ rrọ omọvo Isẹri Jihova o kpohọ usiwo evaọ ẹsipito hayo nyae rria uwou nọ a rẹ jọ rẹrote enọ e kpako no nọ ẹko egagọ jọ u wo?

Egagọ sa-sa i wo esipito hayo iwou nọ a rẹ jọ rẹrote ahwo nọ a kpako no. Yọ ẹsibuobu, orọnikọ re a wha iruẹru Babilọn ologbo na haro a rọ bọ eria itieye na ha. (Evia. 18:2, 4) O sae jọnọ egagọ jọ a bọ oria utioye na re a hẹ sae rọ ere wo ugho. Nẹnẹ, esipito jọ i wo odẹ egagọ jọ gheghe ọvo, rekọ efa jọ i wo isu egagọ rai nọ e be jọ etẹe ru iruo.

Otẹrọnọ ohwo nọ ọ rrọ omọvo Isẹri Jihova ọ tẹ gwọlọ kpohọ ẹsipito hayo oria nọ a jẹ rẹrote ahwo, ọye ọvo ọ rẹ jiroro na kẹ omobọ riẹ sọ o re kpohọ oria nọ ẹko egagọ jọ u wo. Obroziẹ-iroro ahwo jọ ọ sae kẹ ae uvẹ kpohọ oria utioye, rekọ ọrọ ahwo jọ ọ rẹ kẹ ae uvẹ kpohọ oria utioye he. (1 Tim. 1:5) Iyero jọ sa-sa e riẹ nọ e rẹ sai kpomahọ iroro nọ ohwo ọ be jẹ, yọ u fo re ma roro kpahe ae.

Wọhọ oriruo, o sae jọ nọ ẹsipito hayo oria nọ a jẹ rẹrote ekpako na nọ a rọ odẹ egagọ jọ se ọvo họ onọ o kẹle oma. Hayo, o sae jọ nọ efa e riẹ, rekọ ọnọ a rọ odẹ egagọ jọ se na ọvo a be mae jọ riẹ iruo ru. O sae jẹ jọ nọ ẹsipito nọ a rọ odẹ egagọ jọ se ọvo họ onọ a jẹ sae kẹ oghẹrẹ usiwo-imu nọ whọ gwọlọ, hayo o sae jọ nọ etẹe ọvo edọkita ra o je wo udu nọ ọ sai ro ru iruo. Ofariẹ, evaọ ẹsejọ o sae jọ nọ esipito egọmeti hayo erọ amọfa gheghe a wo adhẹẹ kẹ eriwo Oleleikristi ra kpahe eroruiruo azẹ hẹ, rekọ ẹsipito nọ a rọ odẹ egagọ jọ se a sai wo adhẹẹ kẹ eriwo Oleleikristi ra kpahe eroruiruo azẹ. Fikiere, enana yọ eware jọ nọ whọ rẹ sai roro kpahe nọ whọ tẹ be jiroro ẹsipito nọ whọ rẹ nya.

Whọ tẹ jiroro nọ who re kpohọ ẹsipito hayo oria nọ a jẹ rẹrote ekpako na nọ a rọ odẹ egagọ jọ se, whọ sae rehọ iẹe nọ ugho nọ whọ be hwa na o rrọ rọkẹ iruo nọ a ru k’owhẹ. Whọ sae rehọ iẹe wọhọ ẹsenọ ẹko egagọ yena a be zẹ oghẹrẹ eki jọ, yọ whọ tẹ jọ eki nọ a be ze na dẹ oware jọ orọnikọ o te nwani dhesẹ nọ whọ be rọ unevaze zọhọ ugho kẹ ae re a rọ wha egagọ erue haro ho. Ugho oware nọ whọ dẹ hayo iruo nọ a ru k’owhẹ whọ be wha.

Rekọ, evaọ iyero itieye, whẹ wọhọ Oleleikristi, whọ rẹ daoma ruẹ inọ who wobọ evaọ egagọ erue vievie he. Ofariẹ, whọ rẹ rehọ odẹ egagọ nọ a be hai ro se ahwo jọ na, wọhọ “Efada” hayo “Isista,” ro se uvumọ ohwo egagọ na nọ ọ rrọ etẹe ruiruo hayo ọnọ o ti weze ze oria na ha. (Mat. 23:9) Who re muẹrohọ nọ ugogo oware nọ o wọ owhẹ kpohọ etẹe na ọvo who re ru, koyehọ fiki usiwo imu.

Nọ a te bi fi owhẹ họ ehwa evaọ ẹsipito na, whọ rẹ ta vevẹ kẹ enọ i bi ru iruo na inọ whẹ yọ omọvo Isẹri Jihova, yọ whọ te gwọlọ nọ ekpako ukoko ra a re weze bru owhẹ ze. Onana u ti ru ei lọhọ nọ ekpako na a te rọ k’owhẹ obufihọ abọ-ẹzi evaọ okenọ whọ te jọ ẹsipito na.—1 Tẹs. 5:14.

Otẹrọnọ a rọ ọkpako soso kpohọ uwou nọ a rẹ jọ rẹrote ahwo nọ a kpako no, ahwo uviuwou riẹ nọ e rrọ Isẹri Jihova, ekpako ukoko riẹ, gbe amọfa evaọ ukoko na a rẹ rẹrote ẹgwọlọ abọ-ẹzi riẹ, maero otẹrọnọ ẹko egagọ jọ u wo rie. Ẹruorote abọ-ẹzi nọ a rẹ kẹ ekpako itieye kẹse kẹse o rẹ jọ uduotahawọ ulogbo kẹ ai, je fi obọ họ nọ a gbe se ai hi nọ a te bi ru iruẹru egagọ, ehaa, hayo iruẹru itieye efa nọ a rẹ jọ oria na ru.

Rọ kpahe eme nọ ma jọ obehru ta na, ohwo kpobi o re roro kpahe iyero nọ e ware riẹ họ, ọ vẹ jiroro na kẹ omobọ riẹ kpahe ẹsipito hayo uwou nọ a jẹ rẹrote ekpako na nọ ọ rẹ nya.—Gal. 6:5.