Kareghẹhọ Enọ E Rrọ Iwou Ẹruorote
1. Fikieme o rọ gwọlọ nọ ma rẹ wha emamọ usi na te enọ e rrọ uwou ẹruorote oma?
1 No ẹdẹ te ẹdẹ owho u bi si nyẹ ahwo buobu. (Ọtausi. 12:1-7) Ahwo jọ nọ e kpako no a be rria iwou nọ a rẹ jọ rẹrote ahwo nọ a kpako no, fikiere o lọhọ tere he re ma ruẹ e rai nọ ma tẹ rrọ usiuwoma n’uwou ruọ uwou. O rrọ enẹ re makọ evaọ erẹwho nọ esẹgbini nọ e kpako no a rẹ jọ nyae rria kugbe emọ rai hayo imoni rai. Ekpako buobu gbe amọfa nọ e be rria iwou ẹruorote a rẹ gbẹ sai wuhrẹ kpahe Ọghẹnẹ je kurẹriẹ ziọ ukoko na, dede nọ a gbẹ be sae ruẹ awọ nya jẹ sae kareghẹhọ oware tere he na. Ẹvẹ ma sae rọ wha emamọ usi “ẹruore” na te ai oma?—Tait. 2:13.
2. Ọruẹrẹfihotọ vẹ ọsẹro usiuwoma ota o re ru?
2 Epanọ A re ro Mu Ei Họ: Ọsẹro usiuwoma ota ukoko na ọ rẹ sai ru ọruẹrẹfihotọ re inievo nọ i wo onaa ziezi a nyabru ahwo nana. Ma te wo emamọ omaa je fievahọ Jihova, ma te sai mu obe-uwuhrẹ Ebaibol utu họ kugbe ahwo nana.—Itẹ 21:5; 1 Jọn 5:14, 15.
3, 4. (a) Ono u fo nọ ma re lele ta ẹme taure ma te mu obe-uwuhrẹ utu họ kugbe ahwo nọ e kpako no? (b) Ọruẹrẹfihotọ vẹ ma re ru?
3 Oghẹrẹ nọ oria na o rrọ gbe epanọ ahwo na a bu te u re kpomahọ oghẹrẹ nọ ma ti ro mu uwuhrẹ họ kugbe ahwo nana. Evaọ iwou ẹruorote nọ e rrọ ruaro nọ ahwo buobu a be jọ ru iruo, u re woma re ma nyabru ọnọ o re dede erara rehọ sọ ma sae ruẹ ọnọ o wuzou oria na re ma mi ei uvẹ tao. Rekọ evaọ eria nọ e rro tere he, ẹsejọhọ nọ imava hayo imasa ọvo a be jọ ru iruo, o rẹ mai woma re ma ruẹ ọnọ o wo oria hayo uwou na dẹẹ.
4 Whọ rẹ ta kẹ ọnọ o wuzou oria na hayo ọnọ o wo uwou na nọ whọ be daoma rọ oke ra fiobọhọ kẹ ahwo nọ i wo isiuru kpahe Ebaibol na. Nọ ohwo na sọ ejọ evaọ usu ekpako nọ e be rria etẹe na a te rọwo nọ a wuhrẹ Ebaibol na kugbe ae iminiti 30 koka koka. Ma wo ebe buobu nọ whọ sai ro ru uwuhrẹ na, rekọ inievo buobu a vuhumu no nọ Obe Ikuigbe Ebaibol Mẹ gbe Ọzae nọ Ọ Mae Rro nọ Ọ Rria No e rẹ were ahwo otiọnana gaga. Whọ sai dhesẹ ebe na kẹ ọnọ o wuzou oria na. Whọ rẹ sae ruẹrẹ ẹdẹ, oke gbe oria nọ wha te hae jọ ru uwuhrẹ na họ kugbe ọnọ o wuzou oria na, o ve kere iei kugbe omaa iruo oria na. Jọ ozọ u mu owhẹ hẹ re who dhesẹ omara kẹe nọ whẹ yọ Osẹri Jihova. Evaọ oke ovona, vuẹ ọnọ o wuzou oria na nọ orọnọ whọ be te hae jọ etẹe ru egagọ họ rekọ Ebaibol whọ gwọlọ wuhrẹ kugbe ahwo na.
5. Eware jọ vẹ ma rẹ sai kugbe ro ru uwuhrẹ na re o jọ sasasa?
5 Oghẹrẹ nọ A re ro Ru Uwuhrẹ Na: U fo nọ whọ rẹ riẹ uyero ahwo na gbe oria nọ whọ be jọ ru uwuhrẹ na, fikiere o gwọlọ orimuo avọ areghẹ. Ọnọ o bi ru uwuhrẹ na ọ rẹ wha obe nọ o bi ro wuhrẹ ahwo na buobu ze re ọ rọ kẹ ae, nọ uwuhrẹ na u je kuhọ no, o ve mi ai. Whọ sae wha erọ ibieme ikpokpoko lele oma nọ o tẹ gwọlọ ere. Wọhọ epanọ ma be hai ru kugbe amọfa na, whọ rẹ sae rọ enọ gbe iyo ru uwuhrẹ na nọ a te se edhe-ẹme no. Otẹrọnọ ejọ e riẹ obe ese yọ a gwọlọ se, whọ sae ta kẹ ae re a se idhe-eme hayo eria Ebaibol na. Daoma ruẹ nọ uwuhrẹ na o rrọ sasasa, jẹ whẹtiẹ ae họ oma. Ẹsejọ, whọ sai mi ọnọ o wuzou oria na uvẹ re who dhesẹ ividio ukoko na jọ kẹ ai nọ o rẹ lẹliẹ ai fievahọ eyaa Ebaibol hayo onọ u re fiobọhọ kẹ ai wuhrẹ eware jọ no ikuigbe Ebaibol ze. O tẹ lọhọ, whọ sae rọ olẹ okpẹkpẹe muhọ je ku uwuhrẹ na họ. Iwhowho-uvie jọ a rẹ tubẹ so ile ukoko na jọ dede.
6. Eme whọ rẹ sai ru otẹrọnọ ohwo jọ ọ gbẹ rọwo fihọ ẹme jọ họ?
6 Kọ otẹrọnọ ohwo jọ evaọ usu enọ who bi wuhrẹ na ọ rọwo ẹme jọ nọ wha se hayo oware jọ nọ who wuhrẹ hẹ? Rọ orimuo avọ areghẹ za uyo na. (Kọl. 4:6) Whọ sai se oria Ebaibol jọ ro ru ẹme na vẹ kẹe. Otẹrọnọ who rri nọ o te lẹliẹ ahwo nọ i kiọkọ na reghe no uwuhrẹ na, who ve yere iei jẹ ta kẹe nọ wha te ku uwuhrẹ na họ no, whẹ avọ iẹe wha te keria re wha ta ẹme na.
7. Eme whọ rẹ sai ru otẹrọnọ ohwo jọ ọ nọ onọ hayo otẹrọnọ ọ gwọlọ gbe wuhrẹ haro?
7 Evaọ ẹsejọ, omọvo jọ evaọ usu ahwo na ọ rẹ sai gbolo onọ jọ fihotọ hayo gwọlọ wuhrẹ haro. Oniọvo-ọmọtẹ jọ ọ fodẹ oware nọ o re ru, ọ rẹ ta nọ: “Onọ nọ whọ nọ na o rrọ ziezi. Rekọ nọ orọnọ ma gbe bi ru uwuhrẹ na, ma te kuhọ no mẹ avọ owhẹ ma te ta kpahe iẹe.” Whọ sai fi oke họ nọ who re ro wuhrẹ kugbe ohwo otiọye na sa.
8. Ẹvẹ a re kele oke ahwo nọ a bi wuhrẹ ẹsiẹvo gbe orọ omọvo?
8 O rẹ mai woma otẹrọnọ inievo nọ i mu uwuhrẹ na họ na ae a rẹ ruabọhọ iẹe. Owhowho-uvie kpobi nọ o bi w’obọ evaọ uwuhrẹ utioye na, ọ rẹ sai kele oke na. Nọ uwuhrẹ na o tẹ da owọ muotọ no, oniọvo nọ o bi ru uwuhrẹ na ọ rẹ sai kele ozihebro ọvo ẹsikpobi nọ o wuhrẹ kugbe ai, ọ vẹ niyẹrẹ obe-uwuhrẹ Ebaibol ọvo evaọ amara. Otẹrọnọ o mu uwuhrẹ Ebaibol họ kugbe ohwo jọ evaọ usu rai, ọ rẹ sai kele ozihebro ọvo kẹse kẹse nọ o wuhrẹ i rie jẹ niyẹrẹ obe-uwuhrẹ ọvo evaọ amara.
9, 10. Emamọ uruemu vẹ u fo nọ inievo nọ i bi ru uwuhrẹ na a re wo? Ru ei vẹ.
9 Ruabọhọ Uwuhrẹ Na: O rẹ mai woma re a fi ẹdẹ gbe oke nọ a re ro ru uwuhrẹ na họ. Ahwo nọ who bi wuhrẹ kugbe na gbe enọ e rrọ etẹe ru iruo a ti rẹro ra evaọ ẹdẹ gbe oke nọ wha fihọ na, yọ a te gwọlọ nọ wha muhọ je kuhọ evaọ ẹruoke. (Mat. 5:37) Fikiere daoma nya ẹsikpobi jẹ rehọ oma kẹ uwuhrẹ na. Iyẹrẹ i dhesẹ no inọ o rẹ mai woma re iwhowho-uvie ivẹ nọ i wo onaa ziezi a ru uwuhrẹ na. (Ọtausi. 4:9, 10) Evaọ iwou ẹruorote nọ e rrọ ruaro, o te gwọlọ vi iwhowho-uvie ivẹ.
10 U fo nọ whọ rẹ whẹtiẹ ahwo na họ oma je dhesẹ nọ whọ gwọlọ ewoma rai. (Fil. 2:4) Daoma nya te omomọvo nọ e jọ uwuhrẹ na oma evaọ ẹdẹ ọsosuọ na. Kere eme jọ fihotọ kpahe ae jẹ riẹ edẹ rai fihọ uzou taure who te ti zihe. Rekọ kareghẹhọ nọ o rẹ dha ekpako jọ eva nọ a tẹ be kaunu họ odẹ rai. Ma te wo odiri gbe ọdawẹ kẹ ahwo nọ e kpako no na, o te were ae.
11. Ẹvẹ inievo na a sai ro dhesẹ adhẹẹ kẹ enọ i bi ru iruo evaọ etẹe gbe ahwo uviuwou enọ e kpako no na?
11 O gwọlọ nọ who re wo adhẹẹ je dhesẹ uwowou kẹ ahwo nọ i bi ru iruo evaọ etẹe gbe ahwo iviuwou enọ e be rria etẹe na. Wha te fi oke gbe ẹdẹ uwuhrẹ na họ no, o rẹ mai kiehọ re whọ ta kẹ ọnọ o wuzou oria na taure who te ti nwene oke hayo ẹdẹ na. N’oke t’oke, hae nọ ohwo nọ o wuzou oria na re ọ ta oghẹrẹ nọ o rri uwuhrẹ na. Nọ ahwo uviuwou rai a tẹ nyaze evaọ etoke uwuhrẹ na, daoma lele ae ta ẹme. Vuẹ ae ẹjiroro nọ who bi ro wuhrẹ ae Ebaibol na. Dhesẹ kẹ ae vevẹ nọ whọ gwọlọ ewoma ohwo uviuwou rai. Ta kẹ ae re a keria gaviezọ nọ who bi ru uwuhrẹ na.
12, 13. Gbiku irere nọ i no uwuhrẹ uwou ẹruorote na ze no.
12 Iyẹrẹ nọ I re Noi Ze: Esẹro ọnyawariẹ gbe ikoko buobu a nẹ emamọ iyẹrẹ no kpahe oghẹrẹ uwuhrẹ nana. Evaọ ọjọ nọ a ru, ahwo nọ e jariẹ evaọ uwuhrẹ ọsosuọ na a bu te 20. Onana u su kpohọ obe-uwuhrẹ Ebaibol omomọvo nọ a je ru kugbe imazeza evaọ usu rai. Uwhremu na, omọvo jọ evaọ usu rai ọ tẹ họ-ame. Uwuhrẹ utionana nọ a je ru evaọ oria ofa u ru nọ ọkpọkuaye nọ ọ kpako te ikpe 85 no, o ro mu iwuhrẹ ukoko họ ẹnya, tube te epanọ ọ rọ ta nọ ọ gwọlọ họ-ame. Nọ uwou ẹruorote jọ u je bru eware jọ nọ a je ru vẹre no iruo rai, a te si uwuhrẹ nọ Isẹri Jihova a je ru na no re, rekọ ahwo na a te bo se ọnọ o wuzou oria na. Fikiere, a tẹ wariẹ mu uwuhrẹ na họ, yọ ahwo nọ a jẹ hae jariẹ a jẹ hai bu te 25 hayo tube te 30 dede.
13 Uyoyou nọ ma bi dhesẹ kẹ ahwo nọ e kpako no nọ e be rria uwou ẹruorote, u re sisẹri kẹ amọfa re. Wọhọ oriruo, enọ e be rẹrote ai na a rẹ sai kuomagbe uwuhrẹ na ẹsejọ jẹ kpahe fihọ iẹe re. Omadawọ mai re ma fiobọhọ kẹ enọ e kpako no na, u re je sisẹri kẹ ahwo ẹwho na. (1 Pita 2:12) Nọ a vuẹ ọnọ o wuzou oria utiọye jọ kpahe ẹjiroro uwuhrẹ na, ọ tẹ ta nọ: “Eme wha gbe ri ro mu oware utiona họ anwẹdẹ hẹ? Kọ ẹdẹ vẹ wha ti muhọ?” Ọnọ o wuzou oria ofa jọ o kere nọ: “O te were omẹ gaga otẹrọnọ a rẹ sai ru uwuhrẹ nana evaọ iwou ẹruorote efa nọ e rrọ ẹwho na. Isẹri Jihova a bi ru uwuhrẹ nana ọvọvẹ kugbe ahwo wọhọ abọjọ usiuwoma ota rai evaọ ẹwho na.” Uwou ẹruorote jọ evaọ Hawaii o kẹ Isẹri Jihova obe-erae nọ a jọ ta nọ inievo nana yọ “okẹ oghaghae” rọkẹ ahwo uwou ẹruorote na.
14. Fikieme o rọ gwọlọ nọ ma daoma wuhrẹ obe kugbe enọ e rrọ uwou ẹruorote hayo enọ e kpako no nọ e be sai no uwou ze he?
14 Jihova ọ gwọlọ nọ enọ e kpako no a re jiri ei. (Ol. 148:12, 13) Onana u kugbe enọ e rrọ iwou ẹruorote re. Kọ iwou ẹruorote hayo ahwo nọ e kpako no nọ e be sai no uwou ze he a rrọ ẹkwotọ ra? Ekpako ukoko gbe enọ i wuzou eria ẹruorote a rẹ sai fiobọhọ re a wuhrẹ obe kugbe ahwo otiọnana. Nọ ma tẹ be hae kareghẹhọ ekpọkuezae gbe ekpọkueyae na, yọ ma be rọ aro kele Jihova.—Ol. 71:9, 18.