Ẹkpẹti Onọ

◼ Kọ u fo re ogbotu ọ tehe abọ nọ ohwo kpobi nọ o wo ẹme evaọ Isukulu Odibọgba Esuo-Ọghẹnẹ gbe Ewuhrẹ Odibọgba na o te ru ẹme riẹ no?

Nọ Ọmemama na, Jihova, ọ ma akpọ na no, ‘isi ohiohiẹ e so unu ovo, emọ Ọghẹnẹ kpobi a tehe abọ je do edo oghọghọ.’ (Job 38:7) Oma o wọ ikọ-odhiwu nana jiri Jihova kẹ iruo emama igbunu riẹ, nọ o jọ edhere ọkpokpọ nọ o ro dhesẹ areghẹ, ewoma, gbe ogaga riẹ via.

O rrọ emamọ oware re ma dhesẹ ovuhumuo nọ u gine no omai udu ze kẹ omodawọ inievo mai gbe ẹme nọ a ru. Wọhọ oriruo, ma be hae tehe abọ kẹ eme gbe idhesẹvia nọ a ru evaọ ikokohọ esese gbe ilogbo. O rẹ rehọ oke gaga gbe omodawọ mi inievo nọ e be hai ru eme na re a sae ruẹrẹ ẹme rai họ. Abọ tehe mai orọnikọ u re dhesẹ nọ ma wo ovuhumuo kẹ omodawọ oniọvo nọ o ru ẹme na ọvo ho rekọ rọ kẹ ithubro nọ Jihova ọ be rọ ẹkwoma Ẹme gbe ukoko riẹ kẹ omai.—Aiz. 48:17; Mat. 24:45-47.

Kọ ẹvẹ kpahe abọ nọ a rẹ tehe kẹ eme nọ a ru evaọ Isukulu Odibọgba Esuo-Ọghẹnẹ na gbe Ewuhrẹ Odibọgba? Uvumọ uzi o riẹ hẹ nọ u mukpahe iẹe nọ oma o tẹ wọ ahwo tehe abọ, wọhọ oriruo evaọ okenọ ọmọ-uwuhrẹ o te ru ẹme ọsosuọ riẹ. Rekọ, abọ tehe o sai zihe ruọ orọ sidhenọ a tehe abọ, fikiere u gbe wo ọghọ họ. Onana o wha riẹ ze nọ ma gbẹ tehe abọ evaọ kẹme kẹme nọ a ru hu.

Nọ ma gbẹ make tehe abọ kẹ eme nọ a ru evaọ Isukulu Odibọgba Esuo-Ọghẹnẹ gbe Ewuhrẹ Odibọgba na ha, idhere efa e riẹ nọ ma sai ro dhesẹ ovuhumuo mai kẹ ithubro na gbe omodawọ inievo nọ i ru eme na. Ma rẹ sai ru onana ẹkwoma aro nọ ma rẹ jaja vi jẹ gaviezọ ziezi kẹ ohwo nọ o bi ru ẹme na. Yọ nọ ewuhrẹ na o te kuhọ no, ma rẹ sae nyabru oniọvo nọ o ru ẹme re ma yere iei kẹ omodawọ riẹ.—Ẹf. 1:15, 16.