Ta Usiuwoma na Ziezi Evaọ Ighẹ nọ Iviuwou Sa-sa E be Rria
1. Eme u dhesẹ re ma ta usiuwoma na ziezi?
1 Wọhọ Pọl ukọ na, o rrọ isiuru mai re ma whowho emamọ usi na ziezi. (Iruẹru 20:24) Fikiere ma rẹ daoma rehọ ovuẹ Uvie na nyate ahwo ẹkwotọ mai oma te epanọ o rẹ sae lọhọ te kpobi. Onana o kẹre te ahwo nọ a be rria ighẹ nọ iviuwou sa-sa e rrọ. Ẹsejọ o rẹ sae jọ bẹbẹ re a rueva ighẹ itieye na. Dede na, nọ orọnọ ahwo buobu a rẹ jọ ighẹ itieye na, u re rovie uvẹ fihọ nọ ma rẹ rọ ta usiuwoma kẹ ahwo buobu.
2. Fikieme areghẹ gbe orimuo e jẹ r’oja nọ ma tẹ be ta usiuwoma evaọ ighẹ nọ a diogba wariẹ họ nọ ahwo a rrọ buobu?
2 Fiki iji gbe otu-ugbarugba, a be ma ogba wariẹ ighẹ buobu enẹna jẹ be kare ethẹ-ogba na avọ ohwo jọ nọ o re rou ighẹ na, hayo a re fi ekamẹra nọ a re ro rri ighẹ na wariẹ họ oria jọ. (2 Tim. 3:1, 2) O sae jọnọ a fi uzi họ evaọ ighẹ na inọ erara nọ a zizie he e rẹ rueva ighẹ na ha. Ohwo nọ o wuzou ighẹ na ọ sai le omai no ighẹ na, maero otẹrọnọ ohwo jọ nọ ọ be rria ighẹ na ọ ta nọ ọ gwọlọ omai hi. Fikiere, u wuzou re ma ru eware avọ areghẹ gbe orimuo.
3. Okevẹ o mai woma nọ ma rẹ rọ nyae ta usiuwoma evaọ iwou nọ ahwo a be rria, kọ fikieme?
3 Okenọ U Fo: Wọhọ epanọ o rẹ jọ evaọ ekwotọ usiuwoma ota efa na, o rẹ mai woma re ma nyae jọ iwou nọ ahwo a be rria ta usiuwoma evaọ okenọ ma re ro di ai họ. Ma tẹ nya evaọ okenọ a rrọ uwou hu, amọfa a sai viẹro ku omai. Iwhowho-uvie buobu a be hai di ahwo họ iwou evaọ akọ owọwọ, gbe uvo Ẹdẹ-Ọmaha avọ Ẹdoka. Ma tẹ rọ ohiohiẹ gaga kpohọ iwou nọ ahwo a be rria, maero evaọ urere-oka, o sae lẹliẹ eva dha ahwo nọ e be rria uwou na.
4, 5. Ẹvẹ ma sae rọ rueva iwou hayo ighẹ nọ a rẹ kare ethẹ rai?
4 Epanọ A Sae rọ Rueva: U du gwọlọ nọ iwhowho-uvie a rẹ vuẹ ohwo nọ o wuzou ighẹ na taure a te mu usiuwoma họ họ. Otẹrọnọ a kare ẹthẹ-ogba ighẹ na yọ etẹlifonu e rrọ otofa ugbẹhẹ ogba na, ma sae rehọ iẹe se sọ ohwo jọ ọ te rọwo nọ ma rueva re ma lele iei t’ẹme. Ma te lele ohwo nọ ọ k’omai uvẹ rueva na tẹme no, ma sae rọ uvẹ yena no ẹthẹ-ruọ-ẹthẹ evaọ ighẹ na, lele oghẹrẹ nọ a bọ uwou na. Rekọ evaọ ẹsejọ, u re woma re who zihe ruọ otafe ighẹ na re whọ wariẹ rọ ifonu na se amọfa nọ a rrọ ighẹ na. Nọ o tẹ rrọ ere, ma rẹ rọ areghẹ jiroro unu ahwo nọ ma rẹ rọ ifonu na se.
5 Ahwo jọ a sae gwọlọ nọ whọ jọ ifonu na vuẹ ae ẹjiroro nọ who bi ro weze bru ai. O tẹ via ere, rọ uvou uwowolẹ dhesẹ oma ra. Rehọ odẹ ohwo na sei, otẹrọnọ o rrọ obe edẹ ahwo nọ a rrọ ighẹ na nọ a fihọ kugbe ifonu na. Fodẹ uzoẹme ra kpẹkpẹe. Oware nọ ahwo jọ a ru no họ, a se eme-emuhọ rai no obe Reasoning na ze ovavo.
6. Eme ma re ru nọ ma tẹ be ta usiuwoma evaọ ighẹ nọ i wo ohwo nọ o bi rou rie?
6 Otẹrọnọ ohwo jọ o bi rou ighẹ na, yọ ọ kẹ omai uvẹ inọ ma rueva ighẹ na ta usiuwoma ha, ma rẹ daoma ta usiuwoma kẹe. O rẹ were ibuobu ahwo nọ i bi rou ighẹ re a se ebe mai. Ma sae to obe-uwuhrẹ Ebaibol họ kugbei je ru uwuhrẹ na evaọ oria nọ ọ rẹ jọ na. Otẹrọnọ ohwo nọ o bi rou ighẹ na ọ kẹ omai uvẹ rueva re ma ta usiuwoma kẹ ugogo ohwo jọ nọ o dhesẹ isiuru, u re woma re ma siọ ethẹ amọfa nọ a rrọ ighẹ na ba ekporo.
7. Eme u fo nọ ma wo họ iroro kpahe ẹkpa nọ ma rẹ wha kpohọ usiuwoma?
7 Eware nọ Ma rẹ Wha, gbe Uruemu Mai: Ma tẹ wha ẹkpa ologbo, o sae lẹliẹ ahwo kpobi tova vi omai. Fikiere, ma rẹ sae wha ẹkpa ọsese hayo siọ ẹkpa ba ẹwha. Iwhowho-uvie jọ a re fi ebe nọ a ti fihọ ada họ ẹkpa ọsese ọkpakpala a ve kru Ebaibol rai họ obọ hayo fi iei họ ẹkpa ewu rai.
8. Ẹvẹ a rẹ ghale itu nọ e rẹ jọ uwou ologbo ta usiuwoma?
8 O rẹ mai woma re ahwo buobu a siọ oria ovo ba ekokohọ, maero evaọ oria nọ a rẹ rọ ruọ uwou na hayo nọ a rẹ dhẹ imoto fihọ, keme o rẹ lẹliẹ ahwo gale aro vi omai. Ma rẹ yọroma ziezi nọ ma tẹ be ta usiuwoma evaọ iwou nọ e rrọ eria nọ otu-ugbarugba a rẹ jọ kpokpo gaga. (Itẹ 22:3) Wọhọ oriruo, otẹrọnọ uwou-ehru wha be jọ ta usiuwoma, itu-imimava eko ivẹ hayo esa a sae jọ edhe ọvona ta usiuwoma kẹle ohwohwo, nọ utu jọ u te bi kporo ẹthẹ, enọ i kiọkọ a vẹ hẹrẹ tao.
9. Uruemu woma jọ vẹ ma rẹ sai dhesẹ, kọ fikieme onana u ro wuzou?
9 Nọ wha tẹ be ruọ iwou nọ ahwo a be rria, wha re ririe ẹkpẹ no eviẹ rai, je si ẹthẹ uwou na họ nọ wha tẹ rueva no. Nọ ma te bi dhesẹ uruemu utioye, o rẹ whai ze nọ ahwo nọ a be rria uwou na a gbẹ ta eme iyoma kpahe omai tere he. Nọ wha tẹ rueva no, wha nya ovavo kpohọ oria nọ wha gwọlọ jọ ta usiuwoma na viukpenọ wha re dikihẹ unuẹthẹ na. Onana u re ru nọ amọfa a gbe viẹro ku omai hi.
10. Ẹvẹ ma sae rọ whaha edo oruo evaọ ekọridọ uwou na?
10 Evaọ iwou ilogbo buobu nọ ahwo a be rria, edo ọ rẹ jọ ekọridọ uwou na rua gaga. Fikiere, whọ rẹ ta ẹme do vievie he re ahwo nọ a rrọ eva iwou rai a siọ uvou ra ba eyo. Nọ whọ tẹ be ta ẹme kẹ iwhowho-uvie efa, ta ẹme na kpotọ, re ahwo nọ a rrọ uwou na a siọ ẹro ba evi ku owhai. Re o siọ edo ba ẹjọ kẹ ahwo nọ a be rria uwou na, iwhowho-uvie jọ a re kporo ethẹ uwou na unọjọ utọjọ họ, rekọ a tẹ jọ oka jọ ta no, a vẹ nya kpohọ oka ọdekọ nyae ta, a ve je zihe ze, ere a re ru bẹsenọ uwou na u re reno. Ofariẹ, nọ ma te kporo ẹthẹ na gahrọ o rẹ sae lẹliẹ ozọ mu ahwo nọ a rrọ eva uwou na.
11. Eme ma rẹ sai ru nọ ma te kporo ẹthẹ nọ o wo eghogho nọ a re ro rri ruọ otafe?
11 Otẹrọnọ ẹthẹ na o wo eghogho nọ a re ro rri ruọ otafe, whẹ avọ ọrivẹ ra wha dikihẹ oria nọ a jẹ sae rọ eghogho na ruẹ owhai. Tẹrovi eghogho na, nọ whọ tẹ ruẹ nọ ohwo jọ ọ be rọ eghogho na rri owhai, yere iei sasasa, who ve mu ẹme ra họ. Nọ ohwo na ọ tẹ nọ inọ, ‘Whẹ yọ ono?’ u re woma re who se odẹ ra gbe orọ ọrivẹ ra. Ẹsiẹe o sae mae rọ ruọ ohwo nọ o wo uwou na oma rovie ẹthẹ na. Nọ ohwo na o gbe rovie ẹthẹ hẹ, jọ oria nọ who dikihẹ na ta usiuwoma kẹe.
12. Ẹvẹ ma sae rọ whaha ẹbẹbẹ nọ ma tẹ be nyasiọ ebe ba unuẹthẹ ahwo nọ ma dihọ uwou hu?
12 Nọ Ahwo A Gbẹ Rrọ Uwou Hu: Oware jọ nọ ahwo nọ a wuzou ighẹ a be hai gu unoma kpahe họ, ma be hai gbolo ebe mai fihọ inuẹthẹ gbe otọ ighẹ rai. Ebe nọ ma nya seba unuẹthẹ e sai gine kie fihotọ je ru oria na fihọ whọhọ whọhọ. Fikiere, obe kpobi nọ ma be nya seba unuẹthẹ ahwo nọ ma dihọ uwou hu, ma re dhei họ obeva re amọfa a siẹe ba ẹruẹ.
13. Eme ma re ru nọ ma tẹ nyaku ohwo nọ eva e be dha?
13 Ohwo nọ Eva E Be Dha: Ma tẹ nyaku ohwo nọ eva e be dha nọ ọ gwọlọ se ohwo nọ o wuzou ighẹ na fiki mai, u re woma re ma nya no ofẹ yena uwou na kpohọ ofẹ ofa riẹ, re ma zihe oke ofa. Evaọ ẹsejọ, re o siọ ẹwhọ ba ẹwha se omai avọ ọnọ o wuzou ighẹ na, u re woma re ma no ighẹ na no riẹriẹriẹ. Ohwo na ọ gbẹ make ta nọ ma gbe zihe bru ei oke ofa ha, u re woma re ma kere inọmba ofẹ nọ ohwo na ọ be rria evaọ uwou na fihotọ, a ve kpoka họ iẹe evaọ ekade ẹkwotọ ukoko na inọ a rẹ jariẹ ta usiuwoma ha. Nọ etoke jọ o tẹ vrẹ no, a re kpohọ eria hayo iwou nọ a kpoka họ nọ a rẹ jọ ta usiuwoma ha, re a riẹ sọ ahwo na a nwene iroro no.
14, 15. Eme ma re ru otẹrọnọ ohwo nọ ọ be sẹro ighẹ ọ ta k’omai nọ ma no ighẹ na no?
14 Nọ A tẹ Ta k’Omai nọ Ma No Ighẹ na No: Otẹrọnọ epanọ ma be rọ ta usiuwoma na ọnọ o wo ighẹ na, hayo omọfa nọ a mu ighẹ na họ obọ, hayo ọnọ o bi rou ighẹ na, ọ tẹ ta kẹ omai nọ ma no eva ighẹ na no, ma re ru ere ababọ oke-oraha. Ma rẹ daoma evaọ oke kpobi re ma whaha ẹwhọ nọ o rẹ sai su kpohọ ẹdhoguo hayo ẹme iporisi. Evaọ ẹsibuobu orọnikọ fiki epanọ ahwo nọ a be sẹro ighẹ a mukpahe Isẹri Jihova a je le ai hi, rekọ iruo rai a bi ru.
15 Nọ ohwo nọ ọ be sẹro ighẹ ọ tẹ ta kẹ omai nọ ma no ighẹ na no, eva ẹsejọ uvẹ o sae jariẹ nọ ma rẹ rọ ta ẹjiroro nọ ma rọ nya kẹe avọ unu uwowolẹ. (1 Pita 3:15) Ma riẹ nọ o wo owha-iruo nọ o re ro ru ahwo ighẹ na wereva jẹ sẹro ighẹ na. Rekọ ma tẹ ta ẹme wolẹ, ẹsejọhọ ọ te kẹ omai uvẹ gbẹ jọ ighẹ na. Ọ gbẹ kẹ omai uvẹ hẹ, ma nya vrẹ tou. Otẹrọnọ o lọhọ, ma sai mi ei uvẹ re ma nyase ebe mai jọ ba eria nọ ahwo nọ a be rria uwou na a sae jọ rue rai. (Kọl. 4:6) Ma rẹ vuẹ ọsẹro usiuwoma ota na kpahe eware itienana.
16. Eme ma re ru otẹrọnọ ma gwọlọ jọ ighẹ jọ ta usiuwoma rekiyọ o be lọhọ họ?
16 Nọ omoke jọ o tẹ vrẹ no, iwhowho-uvie a sae daoma wariẹ kpohọ ighẹ itieye na. Rekọ, otẹrọnọ ẹbẹbẹ na o gbẹ rrọ otọ, ekpako na a vẹ jọ uwou ogha riẹ kẹ obufihọ viukpenọ ae ọvo a rẹ gwọlọ ku ẹbẹbẹ na họ. Otẹrọnọ o gbẹ lọhọ kẹ iwhowho-uvie re a jọ ighẹ na ta usiuwoma ha, a rẹ dao idhere usiuwoma ota efa, wọhọ isẹri ise ifonu hayo ileta i kere. Iwhowho-uvie jọ a rẹ jọ iyẹrẹ hayo okegbe nọ ighẹ itieye e rrọ na ta usiuwoma evaọ ohiohiẹ nọ ahwo a bi ro kpohọ iruo gbe owọwọ nọ a bi no iruo ze.
17. Fikieme usiuwoma nọ ma rẹ ta evaọ iwou ilogbo nọ ahwo buobu a be rria u ro wuzou?
17 Urere eyero omuomu nana o kẹle no. Enọ i bi se odẹ Jihova ọvo a re ti siwi. “Rekọ kẹvẹ ahwo a re ti ro se odẹ ohwo nọ a re rọwo ho? Jegbe ẹvẹ a rẹ te rọ rọwo ohwo nọ a ti yo usi riẹ hẹ?” (Rom 10:13, 14) Ibuobu ahwo nọ ‘i wo eva ezi kẹ uzuazọ ebẹdẹ bẹdẹ’ a be rria iwou ilogbo nọ ahwo buobu a be rria. (Iruẹru 13:48) Ẹkwoma onaa gbe orimuo nọ ma re wo, ma sae rọ emamọ usi na nyate ai oma.