Evaọ okenọ Ọghẹnẹ o je su ahwo-akpọ, okugbe gbe udhedhẹ o jọ udevie emama riẹ kpobi

Fikieme Ma rọ Gwọlọ Uvie Ọghẹnẹ?

Evaọ okenọ a ma ohwo-akpọ obọ, Jihova ọvo họ ọnọ ọ jọ Osu. Yọ ọ jẹ rọ edhere oyoyou su. Ọ ma ọgbọ owowoma nọ a re se Idẹn kẹ ahwo-akpọ re a rria. Ọ ma oghẹrẹ emu sa-sa fihọ iẹe. Ọ tẹ jẹ kẹ ahwo-akpọ emamọ iruo nọ a re ru. (Emuhọ 1:28, 29; 2:8, 15) Ahwo-akpọ a hai ti gbe wo udhedhẹ o hae jọnọ a daji otọ esuo oyoyou Ọghẹnẹ.

Adamu nọ o kru ubi-ure nọ Ọghẹnẹ ọ ta nọ a re he na nọ aye riẹ ọ kẹ riẹ. — Ahwo-akpọ ọsosuọ a rọwo nọ Ọghẹnẹ ọ jọ Osu rai hi

Ebaibol na o dhesẹ nọ ukọ-odhiwu jọ nọ a se Setan Ẹdhọ uwhremu na ọ wọso esuo Ọghẹnẹ, ọ ta ẹme nọ u dhesẹ nọ Ọghẹnẹ o wo udu nọ o re ro su hu. Ọ rọ ọkparesuọ riẹ dhesẹ nọ eware e te mai woma kẹ ahwo-akpọ nọ a te bi su omarai. U yoma gaga inọ ọsẹgboni ọsosuọ mai, Adamu avọ Ivi, a rọwo ọrue nọ Setan o gu na, a te kuomagbei wọso Ọghẹnẹ.—Emuhọ 3:1-6; Eviavia 12:9.

Fikinọ Adamu avọ Ivi a rọwo nọ Ọghẹnẹ ọ jọ Osu rai hi, a te le ai no Aparadase nọ ọ jọ uwou rai je ku uvẹ nọ a hae te rọ rria bẹdẹ bẹdẹ avọ omokpokpọ kufiẹ. (Emuhọ 3:17-19) Iroro nọ a jẹ na i kpomahọ emọ rai. Ebaibol na ọ ta nọ fiki uzioraha Adamu, ‘uzioraha o ruọ akpọ na, uwhu u te no uzioraha ze.’ (Ahwo Rom 5:12) Oware uyoma ofa jọ nọ u no uzioraha ze họ: “Ohwo o . . . su ọrivẹ riẹ ruọ uye” no. (Ọtausiuwoma Na 8:9) Ẹme na họ, nọ ahwo-akpọ a te bi su omobọ rai, ebẹbẹ i re noi ze hrọ.

ESUO OHWO-AKPỌ O MUHỌ

Nimrọd nọ o dikihẹ avọ omorro, yọ ahwo a be bọ uwou evaọ obemu riẹ. — Nimrọd ọ kpareso Jihova

Osu ohwo-akpọ ọsosuọ nọ a fodẹ evaọ Ebaibol na họ Nimrọd. Ọ jọ ohwo nọ ọ wọso esuo Jihova. No anwọ oke Nimrọd ze, isu ahwo-akpọ a rehọ ogaga rai ro kienyẹ amọfa no. Evaọ ikpe idu esa (3,000) nọ i kpemu, Solomọn ovie na o kere nọ: “Mẹ ruẹ irui-oviẹ ahwo nọ a bi kienyẹ, yọ ohwo ọvo ọ riẹ nọ ọ rẹ sasa ae oma ha. Enọ i bi kienyẹ ae na a wo ogaga.”—Ọtausiuwoma Na 4:1.

Epọvo na eware e gbẹ rrọ nẹnẹ re. Evaọ ukpe 2009, obe jọ nọ United Nations u kere o ta nọ ekpehre isuẹsu họ oware jọ nọ ahwo a rri nọ o be “wha emuemu nọ o rrọ akpọ na ze.”

ỌGHẸNẸ Ọ TE JOWỌ KẸLE!

Ahwo-akpọ a gwọlọ emamọ isu gbe emamọ egọmeti. Yọ ere Ọghẹnẹ nọ ọ ma omai na ọ ya eyaa nọ o ti ru.

Iwoho na: Oware nọ esuo ohwo-akpọ o wha ze no. 1. Aye orẹwho Asia nọ ọ keria iyẹrẹ nọ e rrọ gbegbe yọ ọ wọ ọmọ riẹ nọ ọ be viẹ. 2. Ọkpako nọ ọ rrọ ewha be mọ evaọ ẹsipito. 3. Isoja nọ e be sa igbeke evaọ ẹmo. 4. Ahwo nọ ofu o bi dhe nọ a bi luje avọ eware nọ a kru fihọ abọ. 5. Aye jọ avọ ọmọtẹ riẹ nọ a dikihẹ otafe bi rri eglase ẹthẹ aro uwou rai nọ a kpe no. 6. Ẹwho nọ iwiri e be jọ kuye vọ oria kpobi avọ ifi ẹlẹtriki. — Makọ egọmeti ahwo-akpọ nọ e mai woma dede a be sai ku ebẹbẹ ilogbo ahwo-akpọ họ họ

Ọghẹnẹ ọ rọ Uvie hayo egọmeti jọ mu no, nọ o te rehọ ẹta esuo ahwo-akpọ kpobi, yọ “oye ọvo u . . . ti dikihẹ bẹdẹ bẹdẹ.” (Daniẹl 2:44) Onana họ Uvie nọ ima ahwo buobu a be hae lẹ kẹ na. (Matiu 6:9, 10) Rekọ, orọnọ Ọghẹnẹ omariẹ o ti su egọmeti nana ha. Ukpoye ọ rehọ omọfa jọ nọ ọ jọ otọakpọ na oke jọ ro mu no re ọ jọ Osu riẹ. Kọ ono Ọghẹnẹ ọ salọ?