Ẹkpẹti Onọ

◼ Kọ u fo re ukoko jọ hayo ohwo jọ ọ rehọ oka Uwou-Eroro nọ o be hae jọ ehru uke Uwou-Eroro kpobi na hayo odẹ ogbẹgwae jọ nọ ukoko Isẹri Jihova u bi ro ruiruo ro ru oware jọ k’omobọ riẹ?

Ukoko, ekọmpene hayo ogbẹgwae u re wo odẹ nọ a re ro sei hayo oka jọ nọ a re ro vuhu iei lọlọhọ. Oka nọ o be hae jọ ehru uke Uwou Eroro kpobi na o rrọ rọkẹ Watch Tower Bible and Tract Society of Pennsylvania gbe egbẹgwae uzi efa nọ ukoko Isẹri Jihova u bi ro ru iruo. Uwoho Ebaibol nọ a rovie fihọ họ oka nọ ogbẹgwae ọ Christian Congregation of Jehovah’s Witnesses u re fihọ ehru ileta kpobi nọ a kere. Egbẹgwae efa nọ Isẹri Jihova a bi ro ruiruo i wo oghoghẹrẹ edẹ gbe eka nọ a re ro vuhu ai.

Uvumọ ukoko hayo ohwo ọ rẹ rehọ oka hayo edẹ egbẹgwae nọ ukoko ulogbo u bi ro ruiruo hayo enọ e wọhọ erọ ukoko ulogbo na ro ru uvumọ oware kẹ omobọ riẹ hẹ, makọ evaọ Ọgwa Uvie, esabọdo, ileta, ekwakwa obọ-ohwo, gbe eware efa. Nọ a tẹ rọ oka hayo edẹ egbẹgwae ukoko ulogbo na jọ ro ru iruo evaọ idhere itieye o sae whae ze nọ ahwo egọmeti, iwhowho-uvie gbe amọfa a gbẹ te riẹ ohẹriẹ nọ o rrọ ukoko utioye avọ egbẹgwae nọ ukoko ulogbo u bi ro ruiruo ho. Epọvo na re, otẹrọnọ ileta a rehọ e riẹ kere, inievo na a sai roro nọ obọ uwou ogha hayo oria nọ u wuzou iruo Isẹri Jihova evaọ akpọ-soso a kere i rie no ze.

Ma gbẹ gwọlọ nọ a fi oka Uwou-Eroro hayo onọ u tho rie họ Egwa Uvie nọ a be bọ họ, omake rọnọ ukoko Isẹri Jihova u wo rai na. Rọkẹ Egwa Uvie nọ i wo oka Uwou-Eroro no vẹre, orọnikọ ma be ta nọ a nwani voro eka hayo onaa itieye nọ a ru fihọ ai na no kpata kpata ha, keme inwene itieye na e sae jọ iruo ilogbo, jẹ sae rehọ oke gbe ugho. Rekọ, otẹrọnọ re wha voro hayo si oka na no obọnana o te rehọ oke hayo ugho buobu hu, wha sai ru ere. Otẹrọnọ o te jọ iruo ilogbo, wha sae hẹrẹ bọo okenọ wha te wariẹ ruẹrẹ uwou hayo esabọdo na.