Kọ Whọ Sai Ru Odibọgba Ra Kẹre?
1. Fikieme iruo usiuwoma ota na e jẹ gwọlọ ovẹrẹ?
1 Nọ Jesu o muẹrohọ isiuru nọ ahwo buobu a wo kpahe emamọ usi Uvie na, ọ tẹ ta kẹ ilele riẹ inọ a “lẹ Olori ivuẹvu na re o vi iruiruo kpobọ ivuẹvu riẹ.” (Mat. 9:37, 38) Nọ ma rrọ abọ urere ọrọ ezi ivuẹvu na, iruo mai e gwọlọ ovẹrẹ vi epaọ ọsosuọ. Onana u dhesẹ nọ ma rẹ lẹ je roro epanọ ma re ro w’obọ vọvọ evaọ iruo usiuwoma ota na.—Jọn 14:13, 14.
2. Oghẹrẹ vẹ ahwo jọ a sai ro w’obọ ziezi evaọ iruo usiuwoma ota na?
2 Epanọ Whọ Sai ro Ru Odibọgba Ra Kẹre: Avọ obufihọ Jihova, ahwo buobu a sai muọ iruo ọkobaro họ. (Ol. 26:2, 3; Fil. 4:6) Ahwo jọ a daoma gaga re a ru ọkobaro obufihọ amara ọvo hayo bu vrẹ ere evaọ ẹgbukpe. Onana yọ obọdẹ edhere nọ a ro ru odibọgba rai kẹre. Oghọghọ nọ a wo evaọ etoke nọ a ru ọkobaro obufihọ na o lẹliẹ ahwo jọ jiroro nọ a ro mu ọkobaro oke-kpobi họ.—Iruẹru 20:35.
3. Otẹrọnọ whọ jọ ọkobaro okejọ, eme u fo nọ who re roro kpahe obọnana?
3 Kọ Whọ Sae Wariẹ Mu Iruo Ọkobaro Họ?: Otẹrọnọ whọ jọ ọkobaro okejọ, ababọ avro, whọ gbẹ be kareghẹhọ eware nọ whọ reawere rai evaọ iruo na. Kọ whọ sai roro kpahe iruo ọkobaro na nọ whọ rẹ wariẹ muhọ no? Ẹsejọhọ eware nọ e lẹliẹ owhẹ siọ iruo na ba na e gbẹ te jọ ẹbẹbẹ k’owhẹ enẹna ha. Uvẹ na u gbe rovie fihọ k’owhẹ nọ whọ sae rọ wariẹ reawere uvẹ-ọghọ yena.—1 Jọn 5:14, 15.
4. Uvẹ-ọghọ vẹ u rovie fihọ kẹ omai kpobi?
4 Iruo ivuẹvu na e be nyaharo, yọ kẹle na i ti reno. (Jọn 4:35, 36) Jọ mai kpobi ma kiẹ uyero mai riwi enẹna sọ ma sae jọ omaa mai ru inwene re ma jọ odibọgba na w’obọ vọvọ vi epaọ ọsosuọ. Hayo, otẹrọnọ ma ruẹ nọ uyero mai o te k’omai uvẹ ru odibọgba mai kẹre enẹna ha, kọ ma sae gwọlọ idhere jọ nọ ma sai ro wo ẹnyaharo evaọ onaa usiuwoma ota mai? (Mak 12:41-44) Uvẹ-ọghọ nọ u rovie fihọ kẹ ahwo nọ uyero rai o kuvẹ re Jihova ọ rehọ ai ruiruo evaọ edhere obọdẹ nana o rro kẹhẹ!—Ol. 110:3.