Ẹme nọ Whọ rẹ Ta Kpahe Emagazini Na

January-March

“Ahwo buobu a rọwo inọ ahwo woma kpobi a bi kpohọ odhiwu. Kọ who roro nọ oyena yọ ẹjiroro Ọghẹnẹ? [Kuvẹ kẹ uyo. Kẹsena who ve se Olezi 37:29.] Uzoẹme nana nọ o rrọ ẹwẹ-obe avọ 12 na u ti fi obọ họ kẹ owhẹ riẹ inọ orọnikọ ahwo woma kpobi ae a ti kpohọ odhiwu hu.”

March

“Ahwo buobu a wo adhẹẹ kẹ Ebaibol na, rekọ a roro nọ o wo erere k’omai tere he evaọ uzuazọ inẹnẹ. Eme who roro? [Kuvẹ kẹ uyo. Who ve se Ahwo Rom 15:4.] Uzoẹme nana nọ u muhọ evaọ ẹwẹ-obe avọ 28 na o ta kpahe epanọ abọ ọsosuọ Ebaibol na u gbe ro wiruo nẹnẹ.”

April-June

“Ahwo buobu a rọwo nọ Jesu họ ọzae nọ ọ mae viodẹ evaọ ikuigbe. Kọ ere whọ rọwo re? [Kuvẹ kẹ uyo.] Muẹrohọ oware nọ u je fo re ma ta kpahe eriwo sa-sa nọ ahwo a wo kpahe iẹe re ma riẹ onọ o rrọ uzẹme. [Se Jọn 17:3.] Uwou-Eroro obọdẹ nana u dhesẹ oware nọ Ebaibol na e ginẹ ta kpahe Jesu gbe iwuhrẹ riẹ.”

April

“O wọhọ nọ oke u bi t’omai ru eware kpobi nọ ma gwọlọ ru hu. Kọ whọ rọwo fihọ oyena? [Kuvẹ kẹ uyo.] Ohrẹ nana u fi obọ họ kẹ ibuobu no. [Se Ahwo Filipai 1:10.] Emagazini nana u dhesẹ igogo eware jọ nọ i re fi obọ họ k’omai rehọ oke mai ruiruo evaọ edhere nọ o rẹ kẹ erere.”