Kọ Whọ Rehọ Obemu Riẹ na Ruiruo No?

Nọ ahwo a tẹ tọlọ emagazini mai, a rẹ kaki rri uke riẹ, kẹsena a ve ku ei rẹriẹ rri obemu riẹ. Obemu uvitha Uwou-Eroro ẹgbede na u re wo enọ gbe eme sa-sa nọ e rẹ sae kpare isiuru ohwo gbe inọmba ewẹ-ebe nọ whọ rẹ sae jọ ruẹ iyo enọ na.

Ma rẹ sae rehọ enọ yena mu usiuwoma ota họ kugbe ahwo. Otẹrọnọ ma rẹ jọ ẹkwotọ mai ta usiuwoma kẹse kẹse, ma rẹ sae ta kpahe eware sa-sa ẹkwoma enọ sa-sa nọ ma re ro ruiruo evaọ amara na soso. Nọ ohwo na o gbe wo uvẹ hẹ, ma sae ta ẹme kpẹkpẹe ẹkwoma onọ ọvo jọ evaọ emu emagazini na nọ ma re dhesẹ kẹe jẹ ta nọ, “Otẹrọnọ whọ gwọlọ riẹ uyo onọ na, mẹ sae nyase emagazini nana ba kẹ owhẹ bọo oke ofa nọ who ti wo uvẹ.” Iwhowho-uvie jọ a re muhọ ẹkwoma obemu emagazini na nọ a re dhesẹ kẹ ohwo, a vẹ ta kẹe re ọ salọ onọ jọ nọ o were riẹ. Kẹsena a vẹ fodẹ ẹwẹ-obe nọ uyo na o rrọ, je se oria ikere nọ a salọ kpahotọ. Whọ sai je roro kpahe idhere efa nọ whọ sae rọ rehọ obemu Uwou-Eroro na rọ kpare isiuru ahwo.