Kọ Whọ be Roma kẹ Uwuhrẹ nọ U bi N’obọ Jihova Ze?

1. Ẹvẹ Jihova o rri ewuhrẹ?

¹ Jihova ‘Owuhrẹ Ologbo’ mai, ọ gwọlọ nọ ma jọ enọ a wuhrẹ. (Aiz. 30:20) O mu emama riẹ họ ewuhrẹ nọ ọ ma Ọmọ ọsosuọ riẹ no. (Jọn 8:28) Makọ oke nọ Adamu ọ wọso no, Jihova o seri ewuhrẹ họ họ, ọ gbẹ jẹ kẹ ahwo-akpọ nọ a gba ha ithubro.—Aiz. 48:17, 18; 2 Tim. 3:14, 15.

2. Ọruẹrẹfihotọ ewuhrẹ vẹ o be nyaharo enẹna?

² Nẹnẹ, Jihova ọ be kpọ ọruẹrẹfihotọ ewuhrẹ nọ ọ mae rro evaọ ikuigbe ahwo-akpọ. Wọhọ epanọ Aizaya ọ ruẹaro, ima ahwo buobu wariẹ akpọ na họ a bi zurie ziọ ‘ugbehru-itho uwou Jihova.’ (Aiz. 2:2) Fikieme? Re Jihova o wuhrẹ ae! (Aiz. 2:3) Evaọ ukpe iruo 2010 na, Isẹri Jihova a raha euwa nọ i bu viọ ima-odu ọvo gbe ima egba ezeza rọ ta usiuwoma je wuhrẹ ahwo. Ofariẹ, wariẹ akpọ na họ a be jọ ikoko nọ i bu vi 105,000 wuhrẹ ẹme Ọghẹnẹ koka koka, yọ ọrigbo nọ o wo ẹrọwọ avọ areghẹ na o bi kere ebe nọ a be fa fihọ evẹrẹ nọ i bu vi 500.

3. Erere vẹ who wo no ewuhrẹ Ọghẹnẹ ze no?

³ Wo Erere Ziezi: Ma wuhrẹ eware buobu n’obọ Ọghẹnẹ ze no! Ma wuhrẹ nọ Ọghẹnẹ o wo odẹ, jẹ be sẹro mai. (Ol. 83:18; 1 Pita 5:6, 7) Ma riẹ iyo enọ jọ nọ e mai wuzou evaọ uzuazọ, wọhọ: Fikieme ahwo a jẹ be ruẹ-uye je whu? Ẹvẹ mẹ sai ro wo uvi evawere? Eme họ ẹjiroro uzuazọ? Jihova ọ tẹ jẹ kẹ omai izi nọ i re fi obọ họ kẹ omai yeri uzuazọ nọ u “kiehọ.”—Jos. 1:8.

4. Isukulu sa-sa jọ vẹ e rrọ kẹ idibo Ọghẹnẹ, kọ fikieme u ro fo re ma wuhrẹ mi Jihova?

⁴ Ofariẹ, Jihova ọ ruẹrẹ isukulu sa-sa họ nọ o bi ro wuhrẹ ugogo idibo riẹ jọ re a sai ru iruo rai ziezi. A jọ ẹwẹ-obe avọ 4-6 fodẹ isukulu sa-sa nọ e rrọ kẹ ahwo jọ. Otẹrọnọ uyero mai o gbẹ kẹ omai uvẹ nọ ma re ro kpohọ isukulu enana ha, kọ ma be roma kẹ iwuhrẹ ukoko na efa nọ i rovie fihọ kẹ omai? Kọ ẹvẹ kpahe izoge nọ iticha rai a be hae ta kẹ re a roma kẹ isukulu ikpehre akpọ na, kọ ma be hae tuduhọ ae awọ re a fi itee abọ-ẹzi họ jẹ roma kẹ ewuhrẹ nọ o mai kpehru nọ Ọghẹnẹ ọ be kẹ? Ma te bi wuhrẹ mi Jihova u re fi obọ họ kẹ omai yeri uzuazọ evawere enẹna je wo uzuazọ ebẹdẹ bẹdẹ.—Ol. 119:105; Jọn 17:3.

Isukulu Sa-Sa Jọ nọ Ukoko Jihova U Wo

Eklase Ọriẹse gbe Ọriẹkere

• Ẹjiroro Na: Re a wuhrẹ ahwo epanọ a rẹ riẹ se je kere re a sai ru uwuhrẹ omobọ rai je wuhrẹ amọfa uzẹme na.

• Epanọ U re Kri Te: Epanọ ẹgwọlọ ahwo na ọ rrọ.

• Oria Isukulu Na: Ọgwa Uvie.

• Enọ E rẹ Jariẹ: Iwhowho-uvie gbe enọ i bi kuomagbe ukoko na.

• Epanọ A re ro Fi Odẹ H’otọ: Ekpako ukoko a re ru ọruẹrẹfihotọ na kiehọ ẹgwọlọ ukoko rai, jẹ tuduhọ ahwo kpobi nọ a gwọlọ riẹ ese gbe ekere awọ re a jariẹ.

Isukulu Odibọgba Esuo-Ọghẹnẹ

• Ẹjiroro Na: Re a wuhrẹ iwhowho-uvie epanọ a sae rọ ta usiuwoma na je wuhrẹ amọfa ziezi kpahe emamọ usi na.

• Epanọ U re Kri Te: U wo umuo oke he.

• Oria Isukulu Na: Ọgwa Uvie.

• Enọ E rẹ Sai Fi Odẹ H’otọ: Iwhowho-uvie kpobi. Ofariẹ, amọfa nọ e be ziọ ewuhrẹ ziezi nọ e rọwo iwuhrẹ Ebaibol je bi yeri uzuazọ rọwokugbe ehri-izi Ebaibol.

• Epanọ A re ro Fi Odẹ H’otọ: Ta kẹ ọsẹro Isukulu Odibọgba Esuo-Ọghẹnẹ na.

Eklase nọ A rẹ Jọ Wuhrẹ Ẹvẹrẹ Ọfa

• Ẹjiroro Na: Re a wuhrẹ iwhowho-uvie epanọ a sae rọ rehọ ẹvẹrẹ ọfa ta usiuwoma.

• Epanọ U re Kri Te: Emera ene hayo isoi. A rẹ mai ru uwuhrẹ nana evaọ ohiohiẹ Ẹdẹ-Ọmaha evaọ auwa ọvo hayo ivẹ.

• Oria Isukulu Na: Maero evaọ Ọgwa Uvie ekẹloma.

• Enọ E rẹ Sai Fi Odẹ H’otọ: Iwhowho-uvie nọ i kru ga ziezi nọ e gwọlọ rehọ ẹvẹrẹ ọfa ta usiuwoma.

• Epanọ A re ro Fi Odẹ H’otọ: Uwou ogha u re ru ọruẹrẹfihotọ eklase na nọ ẹgwọlọ ọ tẹ riẹ.

Ebabọ Ọgwa Uvie

• Ẹjiroro Na: Re a bọ hayo ruẹrẹ Egwa Uvie. Onana yọ isukulu hu, rekọ a rẹ jọ ọruẹrẹfihotọ nana wuhrẹ enọ e fialoma via onaa ebabọ sa-sa nọ a sae rọ bọ eria egagọ mai.

• Epanọ U re Kri Te: Epanọ uyero ọnọ ọ fialoma via na o kẹ riẹ uvẹ te.

• Oria Na: Oria kpobi nọ a jọ rehọ Ẹko-Iruiruo Ebabọ Ọgwa Uvie ro mu. A sai zizie ahwo jọ re a kpohọ eria efa nyai fi obọ họ kẹ enọ okpẹtu ọ via kẹ.

• Itee nọ A rẹ Nyate: Inievo-emezae gbe erọ emetẹ a rẹ jọ enọ e họ-ame no, yọ ugboma ekpako ukoko rai u re kuenu kẹ ae. A sae jọ enọ i wo onaa-iruo jọ hayo enọ i wo ho.

• Epanọ A re ro Fi Odẹ H’otọ: Who re mi ekpako ukoko ra efọmo ọ Kingdom Hall Construction Volunteer Program (A-25) je kere eme fihọ iẹe.

Isukulu Ekobaro

• Ẹjiroro Na: Re a wuhrẹ ekobaro epanọ a re ro ru ‘iruo odibọgba rai gbunu.’—2 Tim. 4:5.

• Epanọ U re Kri Te: Eka ivẹ.

• Oria Isukulu Na: Uwou ogha o rẹ salọ oria na, o rẹ mae jọ Ọgwa Uvie ekẹloma.

• Itee nọ A rẹ Nyate: Enọ e rrọ ọkobaro oke-kpobi, o tẹ kawo enọ i kri te ukpe ọvo no.

• Epanọ A re ro Fi Odẹ H’otọ: Uwou ogha u re fi odẹ ekobaro nọ i te ukpe ọvo no h’otọ kẹ isukulu na, ọsẹro okogho rai ọ vẹ vuẹ ai.

Isukulu Enọ I Kpohọ Ebẹtẹle Obọ

• Ẹjiroro Na: A ruẹrẹ isukulu nana họ re a jariẹ wuhrẹ enọ i kpohọ Ebẹtẹle obọ epanọ a sae rọ rria je ru iruo Ebẹtẹle rai ziezi.

• Epanọ U re Kri Te: Auwa ọvo koka koka evaọ eka ikpegbezeza.

• Oria Isukulu Na: Evaọ Ebẹtẹle.

• Itee nọ A rẹ Nyate: Ohwo ọ rẹ jọ omọvo uviuwou Ebẹtẹle hayo ọnọ a zizie kẹ iruo ubroke nọ ọ te rria te oware wọhọ ukpe hayo vrẹ ere.

• Epanọ A re ro Fi Odẹ H’otọ: Uwou ogha o rẹ vuẹ enọ i kpohọ Ebẹtẹle nọ i te inọ a ti kpohọ isukulu na.

Isukulu Odibọgba Uvie

• Ẹjiroro Na: A rẹ jariẹ wuhrẹ ekpako gbe idibo iruiruo epanọ a re ro ru iruo ẹruọsa rai ziezi. (Iruẹru 20:28) A re ru isukulu nana evaọ ikpe isoi kpobi wọhọ epanọ Ugboma Esuo na o jiroro na.

• Epanọ U re Kri Te: Anwọ ikpe jọ ze na, ekpako na a be hae jọ isukulu na okpẹdẹ gbe ubro, idibo iruiruo kọ okpẹdẹ.

• Oria Isukulu Na: A rẹ mai ru ei evaọ Ọgwa Uvie hayo Ọgwa Okokohọ ekẹloma.

• Itee nọ A rẹ Nyate: Enọ e rrọ ekpako hayo idibo iruiruo.

• Epanọ A re ro Fi Odẹ H’otọ: Ọsẹro okogho o re zizie ekpako gbe idibo iruiruo nọ i te.

Isukulu Ekpako Ukokoa

• Ẹjiroro Na: Re a wuhrẹ ekpako na epanọ a sae rọ rẹrote ewha-iruo rai evaọ ukoko na.

• Epanọ U re Kri Te: Edẹ isoi.

• Oria Isukulu Na: Uwou ogha o rẹ jiroro na; o rẹ mae jọ Ọgwa Uvie hayo Ọgwa Okokohọ ekẹloma.

• Itee nọ A rẹ Nyate: Enọ e rrọ ekpako.

• Epanọ A re ro Fi Odẹ H’otọ: Uwou ogha u re zizie ekpako nọ i te.

Isukulu Esẹro Ọnyawariẹ Avọ Eyae Raib

• Ẹjiroro Na: Re a wuhrẹ esẹro okogho gbe erọ ubrotọ epanọ a rẹ rọ rẹrote ikoko ziezi gbe epanọ a re ro ‘ruẹme je wuhrẹ ziezi’ jẹ sẹro enọ e rrọ otọ ẹruọsa rai.—1 Tim. 5:17; 1 Pita 5:2, 3.

• Epanọ U re Kri Te: Emera ivẹ.

• Oria Isukulu Na: Uwou ogha o rẹ salọ oria na.

• Itee nọ A rẹ Nyate: Ohwo ọ rẹ jọ ọsẹro okogho hayo ọrọ ubrotọ.

• Epanọ A re ro Fi Odẹ H’otọ: Uwou ogha u re zizie esẹro ọnyawariẹ avọ eyae rai.

Isukulu Ebaibol Rọkẹ Inievo-Emezae nọ E re Rọo Hoc

• Ẹjiroro Na: A rẹ jariẹ wuhrẹ ekpako gbe idibo iruiruo nọ e re rọo ho epanọ a rẹ rọ rẹrote ewha-iruo ukoko. A re dhe ibuobu enọ a wuhrẹ no kpohọ oria nọ ẹgwọlọ ọ rrọ evaọ orẹwho rai. A rẹ sai vi ejọ kpohọ orẹwho ofa otẹrọnọ a fialoma via.

• Epanọ U re Kri Te: Emera ivẹ.

• Oria Isukulu Na: Uwou ogha o rẹ salọ oria na; o rẹ mae jọ Ọgwa Uvie, Ọgwa Okokohọ, hayo uwou ogha.

• Itee nọ A rẹ Nyate: Inievo-emezae nọ e rrọ umuọ ikpe 23 rite 62 nọ oma rai o rẹ gaga jẹ gwọlọ nọ a re ru iruo Uvie na evaọ oria kpobi nọ ẹgwọlọ o rrọ. (Mak 10:29, 30) A rẹ jọ ekpako hayo idibo iruiruo te ikpe ivẹ no.

• Epanọ A re ro Fi Odẹ H’otọ: Otẹrọnọ a be jọ orẹwho rai ru isukulu nana, a rẹ jọ okokohọ okogho se ẹgwae enọ e gwọlọ kpohọ isukulu nana. A rẹ jọ ẹgwae nana kẹ evuẹ efa kpahe isukulu na.

Isukulu Ebaibol Rọkẹ Ezae Ileleikristi avọ Eyae Raid

• Ẹjiroro Na: A rẹ jariẹ wuhrẹ ezae avọ eyae rai ugogo eware nọ i re fi obọ họ kẹ ae nọ Jihova avọ ukoko riẹ a jẹ rehọ ai ruiruo ziezi. A re dhe ibuobu enọ a wuhrẹ no kpohọ oria nọ ẹgwọlọ ọ rrọ evaọ orẹwho rai. A rẹ sai vi ejọ kpohọ orẹwho ofa otẹrọnọ a fialoma via.

• Epanọ U re Kri Te: Emera ivẹ.

• Oria Isukulu Na: Enẹna a be jọ Watchtower Educational Center evaọ Patterson, New York, U.S.A. ru isukulu nana. Evaọ obaro, uwou ogha o te jiroro eria nọ a te hae jọ ru isukulu nana, o te mae jọ Ọgwa Okokohọ hayo Ọgwa Uvie.

• Itee nọ A rẹ Nyate: Enọ e rọo no nọ e rrọ umuọ ikpe 25 rite 50 nọ oma rai o rrọ gaga nọ uyero rai o kuvẹ nọ a sae rọ jọ oria kpobi nọ ẹgwọlọ ọ rrọ ru iruo odibọgba na, je wo ẹzi ọ: “Mẹ na! Vi omẹ.” (Aiz. 6:8) Ofariẹ, a rẹ rọo te ikpe ivẹ no, jẹ jọ iruo odibọgba oke-kpobi na te ikpe ivẹ no.

• Epanọ A re ro Fi Odẹ H’otọ: Otẹrọnọ a be jọ orẹwho rai ru isukulu nana, a rẹ jọ ẹdẹ okokohọ obọdẹ se ẹgwae enọ e gwọlọ kpohọ isukulu nana. A rẹ jọ ẹgwae nana kẹ evuẹ efa kpahe isukulu na.

Isukulu ọ Giliad

• Ẹjiroro Na: A rẹ jariẹ wuhrẹ ekobaro gbe amọfa nọ e rrọ iruo odibọgba oke-kpobi na kẹ iruo imishọnare.

• Epanọ U re Kri Te: Emera isoi.

• Oria Isukulu Na: Watchtower Educational Center, Patterson, New York, U.S.A.

• Itee nọ A rẹ Nyate: Ezae avọ eyae rai nọ e họ-ame te ikpe esa no jẹ rrọ umuọ ikpe 21 rite 38 evaọ oke ọsosuọ nọ a bi ro fi obe họ. A rẹ jọ enọ e rẹ ta Oyibo, rọo te ikpe ivẹ no jẹ jọ iruo odibọgba oke-kpobi na te ikpe jọ no, o tẹ kawo ikpe ivẹ ababọ eriosehọ. A rẹ jọ enọ oma rai o rrọ gaga. Ofariẹ, ekobaro nọ i bi ru iruo odibọgba na evaọ orẹwho ọfa, (makọ enọ i wo odẹ imishọnare); esẹro ọnyawariẹ; enọ e rrọ Ebẹtẹle; enọ i kpohọ Isukulu Ewuhrẹ Odibọgba na (MTS) evaọ oke nọ u kpemu, enọ i kpohọ Isukulu Ebaibol Rọkẹ Inievo-Emezae nọ E re Rọo Ho, gbe Isukulu Ebaibol Rọkẹ Ezae Ileleikristi avọ Eyae Rai, a sai fi obe họ kẹ isukulu nana nọ a tẹ nyate itee na.

• Epanọ A re ro Fi Odẹ H’otọ: Evaọ umutho iwou ogha jọ, a rẹ jọ ikokohọ ubrotọ se ẹgwae enọ e gwọlọ nọ a re kpohọ isukulu nana. A rẹ jọ ẹgwae nana kẹ evuẹ efa kpahe isukulu na. Otẹrọnọ a rẹ jọ ikokohọ ubrotọ orẹwho rai se ẹgwae otiọye he, yọ whọ gwọlọ nọ who re fi obe họ kẹ isukulu na, whọ sai kere kpohọ uwou ogha orẹwho ra rọkẹ evuẹ efa.

Isukulu Rọkẹ Inievo Ogbẹgwae Uwou Ogha avọ Eyae Rai

• Ẹjiroro Na: A rẹ jariẹ wuhrẹ enọ e rrọ Ogbẹgwae Uwou Ogha epanọ a rẹ rọ sẹro iviuwou Ebẹtẹle ziezi, sẹro ikoko, gbe ikogho nọ e rrọ otọ ẹruọsa rai, jẹ rẹrote iruo efafa, ebe nọ a re printi, gbe epanọ ebe na i re ro te ikoko obọ, gbe enu-iruo efa sa-sa.—Luk 12:48b.

• Epanọ U re Kri Te: Emera ivẹ.

• Oria Isukulu Na: Watchtower Educational Center, Patterson, New York, U.S.A.

• Itee nọ A rẹ Nyate: Ohwo ọ rẹ jọ omọvo Ogbẹgwae Uwou Ogha hayo Ogbẹgwae Orẹwho hayo a be te rehọ iẹe mu ọjọ.

• Epanọ A re ro Fi Odẹ H’otọ: Ugboma Esuo na u re zizie inievo-emezae avọ eyae rai nọ i te.

[Oruvẹ-obotọ]