Mai Yọ Etausiuwoma Ẹsikpobi
1. Ẹvẹ ma rọ riẹ nọ ileleikristi ikpe-udhusoi ọsosuọ a gba riẹ mu inọ a rẹ ta usiuwoma na ẹsikpobi?
1 Ileleikristi ikpe-udhusoi ọsosuọ a jẹ rọ ọwhọ ta usiuwoma na ‘ababọ eriosehọ’ evaọ oria kpobi nọ a jẹ nyaku ahwo. (Iruẹru 5:42) Fikiere, u mu omai ẹro inọ nọ a jẹ ta usiuwoma n’uwou ruọ uwou, a nya vrẹ uvumọ ohwo ababọ usiuwoma nọ a ta kẹe he. Yọ nọ a tẹ maki ku usiuwoma họ no, a jẹ hae rehọ uvẹ kpobi nọ u rovie fihọ rọ ta usiuwoma, makọ evaọ obọ eki. Wọhọ Jesu, a gba riẹ mu inọ a rẹ ta usiuwoma na ẹsikpobi.—Mak 6:31-34.
2. Eme o gwọlọ re ma ru odẹ mai na gba?
2 Thomavẹre Ẹsikpobi: Odẹ mai na, Isẹri Jihova orọnikọ u dhesẹ iruo mai ọvo ho rekọ oghẹrẹ ahwo nọ ma rrọ. (Aiz. 43:10-12) Fikiere, ma rẹ ruẹrẹ oma kpahe ẹsikpobi re ma ta eware nọ ma rọwo, makọ nọ ma gbẹ rrọ usiuwoma n’uwou ruọ uwou hu. (1 Pita 3:15) Kọ who bi roro kpahe iyero nọ e rẹ sae kẹ owhẹ uvẹ ta usiuwoma oke gheghe gbe oware nọ whọ te ta? Kọ whọ rẹ wha ebe ukoko na lele oma nọ whọ sae rọ ta usiuwoma kẹ ahwo nọ i dhesẹ isiuru? (Itẹ 21:5) Kọ usiuwoma n’uwou ruọ uwou ọvo whọ be hae nya, manikọ whọ be hae ta usiuwoma evaọ oria kpobi nọ uvẹ na u je rovie fihọ?
3. Fikieme ẹme na “idhere efa” nọ a re ro se isẹri o gbe kiehọ usiuwoma ota evaọ iyẹrẹ, eria nọ a rẹ dhẹ imoto fihọ, oria aruọzaha, eria ekiọthuọ, gbe eria itieye na efa ha?
3 Orọnikọ Usiuwoma Ota “Idhere Efa” Ha: Evaọ okenọ u kpemu, ma jẹ hae rehọ ẹme na “idhere efa nọ a re ro se isẹri” ro dhesẹ usiuwoma nọ a rẹ ta evaọ iyẹrẹ, eria nọ a rẹ dhẹ imoto fihọ, oria aruọzaha, eria ekiọthuọ, gbe oghẹrẹ eria efa. Rekọ o wọhọ nọ “idhere efa” nọ a re ro se isẹri o sai dhesẹ onọ u wo ohẹriẹ no edhere nọ u fo nọ a rẹ rọ ta usiuwoma na. Pọl ukọ na ọ ta nọ ọ jẹ hae ta usiuwoma evaọ ẹgbede gbe n’uwou ruọ uwou. (Iruẹru 20:20) Fikiere, ẹme na usiuwoma ota ẹgbede o mai kiehọ vi “idhere efa” nọ a re ro se isẹri. Usiuwoma n’uwou ruọ uwou na họ ugogo edhere nọ o mai kiehọ nọ ma be rọ ta usiuwoma Uvie na kẹ ahwo. Dede na, etausiuwoma ikpe-udhusoi ọsosuọ a tẹrovi epanọ a rẹ rọ ta usiuwoma kẹ ahwo orọnikọ thakpinọ a n’uwou ruọ uwou ho. A rehọ uvẹ kpobi nọ u rovie fihọ rọ ta usiuwoma na—evaọ ẹgbede, evaọ oke gheghe, gbe n’uwou ruọ uwou. Joma ru epọvo na re ma sai ru odibọgba mai gbaunu.—2 Tim. 4:5.