Elo Ọghẹnẹ O Re Le Ebi No!

Ebaibol ọ rehọ elo dhesẹ uzẹme, jẹ rehọ ebi dhesẹ ọrue. (Ol. 43:3; Aiz. 5:20) Jọn ukọ na o kere nọ: “Ọghẹnẹ họ elo, ebi ọ rọ eva riẹ vievie he.” (1 Jọn 1:5) Muẹrohọ oghẹrẹ nọ a dhesẹ ohẹriẹ nọ o rrọ udevie elo gbe ebi. Elo abọ-ẹzi o re no obọ Jihova ze, yọ o w’obọ kpahe ebi abọ-ẹzi hi. Kọ ono họ ehri ebi na? Ma te jọ ẹme nana riẹ ọnọ ọ wha ebi abọ-ẹzi koyehọ iwuhrẹ ọrue ze, gbe epanọ ma rẹ rọ kẹnoma kẹ iwuhrẹ ọrue. Ma te jẹ ta kpahe epanọ ma re ro dhesẹ inọ elo uzẹme nọ ma wo na o were omai.

Ma wo ẹjiroro nọ ma re ro jiri Jihova, ọnọ ọ k’omai elo uzẹme na. Wọhọ Devidi Ovie na, ma rẹ ta nọ: “Whẹ họ elo mẹ, eyo Ọnowo na, Ọghẹnẹ mẹ o re ru ebi mẹ vevẹ.” (2 Samuẹle 22:29) Ghele na, ma re fioma h’otọ họ, keme onana o sai ru omai zihe kpohọ ebi nọ a si omai no ze na. Evaọ akpọ nana nọ iwuhrẹ erue e da fia na, joma gbaudu dhesẹ elo uzẹme na kẹ amọfa. Joma “nya wọhọ emọ elo.”—Ẹf. 5:8.