Nya Evaọ Edhere Elo Nọ O Bi Vẹhọ

Jihova họ Ehri elo abọ-ẹzi. (Olezi 43:3) Dede nọ akpọ na ọ rrọ ebi ọlala, Ọghẹnẹ uzẹme na o bi vi elo se ahwo riẹ oke na kpobi. Eme o bi noi ze? Ebaibol na e kuyo nọ: “Edhere enọ i kiẹrẹ ọ wọhọ elo irioke, nọ u re he lo gahọ ri te udevie uvo.” (Itẹ 4:18) Elo uzẹme na, koyehọ ẹme Ọghẹnẹ nọ ma bi wo otoriẹ riẹ vi epaọ anwẹdẹ na u bi fi obọ họ kẹ ahwo riẹ. U bi ru ai wo ẹnyaharo evaọ ọruẹrẹfihotọ ukoko, iwuhrẹ, gbe uruemu rai. Ikuigbe Isẹri Jihova oke mai na nọ ma be te ta kpahe na u ti dhesẹ epanọ onana o be rọ via.

Akpọ nọ ma be rria na ọ ginẹ rrọ ebi ọlala. Nọ Jihova ọ gbẹ be kẹ ahwo riẹ elo na, ohẹriẹ nọ o rrọ udevie rai gbe akpọ na u bi dhe ẹruẹro. Eme elo nana o bi ru kẹ omai? Whaọ, wọhọ epanọ ukpẹ nọ a ro rri ọgọdọ nọ ọ rrọ edhere u re si ọgọdọ na no ho na, ere ọvona elo nọ o bi no Ebaibol na ze o re si ezadhe no ho. Rekọ, elo Ọghẹnẹ o re fi obọ họ kẹ omai whaha ekieruọ egọdọ na re ma ruabọhọ onya evaọ edhere elo nọ o bi vẹhọ. Fikiere, joma ruabọhọ ezọgaviẹ kẹ ẹme eruẹaruẹ Jihova, “wọhọ ukpẹ nọ [o] rọ eva ebi lo.”—2 Pita 1:19.