Wo Erere No Ewuhrẹ Obe ọ Si Kẹle Jihova na Ze
1. Erere vẹ ma wo no obe ọ Nyaze Whọ Jọ Olele Mẹ na ze, kọ obe vẹ ma ti wuhrẹ no June 18, 2012 vrẹ?
1 Ewuhrẹ obe ọ Nyaze Whọ Jọ Olele Mẹ na u fi obọ họ kẹ omai wo isiuru inọ ma rẹ rọ aro kele Jesu vi epaọ anwẹdẹ. (1 Pita 2:21) No umuo June 18, 2012 vrẹ, ma ti mu obe ọ Si Kẹle Jihova họ ewuhrẹ.
2. Dhesẹ oghẹrẹ nọ a ruẹrẹ uwuhrẹ na họ gbe epanọ ma ti ro wo erere noi ze.
2 Ẹvẹ ma te sai ro wo erere ziezi no ewuhrẹ obe nana ze? Oma oruẹrẹkpahe o r’oja. Nọ orọnọ umutho idhe-ẹme jọ ọvo ma ti wuhrẹ koka koka na, oke o te jariẹ nọ whọ rẹ rọ kẹ uvi iyo fikinọ whọ rọ oma totọ wuhrẹ je roro kpahe oria nọ a bi ti wuhrẹ na.
3. Ẹvẹ a te rọ kiẹ eware nọ ma jọ uzou kpobi wuhrẹ riwi?
3 Muhọ no uzou avọ 2 na vrẹ, ẹkpẹti nọ o wo uzoẹme na “Enọ nọ A re Roro Kpahe” o rrọ urere uzou kpobi. Nọ a te wuhrẹ edhe-ẹme urere uzou na no, ọnọ o bi ru uwuhrẹ na ọ te nọ enọ nọ e rrọ ẹkpẹti na. Ọ te nọ ogbotu na re a ta emamọ eware nọ a wuhrẹ ẹkwoma eroro kpahe Ikereakere nọ e rrọ ẹkpẹti na.—Itẹ 20:5.
4. Enọ vẹ a te hae nọ ẹsejọ, kọ fiki ẹjiroro vẹ?
4 Fiba enọ nọ e rrọ ẹkpẹti na, ẹsejọ ọnọ o bi ru uwuhrẹ na ọ te hae nọ enọ wọhọ: “Eme ovuẹ nana o ta kẹ owhẹ kpahe Jihova? Ẹvẹ u ro kpomahọ uzuazọ ra? Ẹvẹ whọ rẹ sae rọ rehọ iẹe fi obọ họ kẹ amọfa?” Ẹjiroro enọ nana họ re ogbotu na a kẹ iyo nọ i re dhesẹ inọ a wo otọriẹ uwuhrẹ na, orọnikọ ọ rẹ nọ enọ esese nọ i wuzou tere he he.
5. Eme họ ẹjiroro obe Si Kẹle Jihova na?
5 Obe ọ Si Kẹle Jihova na o rrọ oghẹrẹsa. Dede nọ ebe ‘ọrigbo nọ o wo ẹrọwọ avọ areghẹ na’ kpobi i bi jiri Jihova, ẹjiroro obe nana kpobi họ re o ta kpahe ekwakwa-aghae Jihova. (Mat. 24:45-47) Uvẹ-ọghọ nọ ma wo u gbunu kẹhẹ! Ma ti gine wo erere ologbo no uwuhrẹ kpahe ekwakwa-aghae Jihova ze. Jọ uwuhrẹ na u fi obọ họ kẹ omai si kẹle Ọsẹ obọ odhiwu mai viere, jẹ ruabọhọ obufihọ kẹ amọfa re a ru epọvo na.