Rehọ Oria Evuẹ Itanẹte Mai Wuhrẹ Emọ Ra
1. Ẹjiroro vẹ a ro ru oria “Emọ” na fihọ jw.org?
1 A ruẹrẹ Oria Evuẹ Itanẹte mai, jw.org na họ re o were oghẹrẹ ahwo kpobi. Oria “Emọ” na u re fi obọ họ kẹ emaha gbe esẹgbini si kẹle ohwohwo je si kẹle Jihova (rovie oria Iwuhrẹ Ebaibol re who kpohọ oria Emọ). (Izie. 6:6, 7) Ẹvẹ whọ sae rọ rehọ oria nana wuhrẹ emọ ra?
2. Ẹvẹ whọ sae rọ riẹ eware nọ i kiehọ ikpe emọ ra?
2 Riẹ Oware nọ O te Were Emọ Ra: Ọmọ kpobi o wo oware nọ o rẹ were iẹe. (1 Kọr. 13:11) Ẹvẹ whọ sae rọ riẹ eware nọ i kiehọ ikpe emọ ra? Nọ omara nọ: ‘Eme ọ te were emọ mẹ? Eware vẹ a te sai wo otoriẹ rai? Ẹvẹ a rẹ sae gaviezọ lehie te?’ Otẹrọnọ emọ na a rrọ ikpe esa hayo a maha vrẹ ere, whọ sae rọ ikuigbe nọ e rrọ oria “Iwuhrẹ Ebaibol Mẹ” na ro wuhrẹ ai. Iviuwou jọ a rẹ rehọ ikuigbe Ebaibol nọ e rrọ oria “Wuhrẹ Emọ Ra” na wuhrẹ emọ rai. U te no ere no, whọ sae jẹ rọ efa nọ ma fodẹ evaọ obotọ na ro ruiruo.
3. Ẹvẹ esẹgbini a sae rọ rehọ iku Ebaibol gbe eware nọ e rrọ oria “Eware nọ A re ro Ru Egagọ Uviuwou” na wuhrẹ emọ rai?
3 Eware nọ A re ro Ru Egagọ Uviuwou: Oria nana u wo eware nọ esẹgbini a sai ro wuhrẹ emọ rai. Rovie oria “Rehọ kẹ Omara” na re who se oria “Ithubro Rọkẹ Esẹgbini” na re whọ riẹ epanọ whọ sae rọ rehọ iku gbe eware nọ e riẹ na wuhrẹ emọ ra. Rehọ ifoto na, wọhọ enọ a rẹ sai gbe ekọlọ họ, ro wuhrẹ emọ esese ra. Fi obọ họ kẹ emọ nọ e dina kpako no re a kiyo nọ e rrọ oria eware uwuhrẹ na. Eware kpobi nọ e rrọ oria iruo ọvuọvo i kiekpahe iku Ebaibol ovona hayo bi wuhrẹ oware ovona, fikiere emọ nọ e rrọ unuikpe sa-sa a rẹ sai w’obọ evaọ eware evona nọ a re ro ru egagọ uviuwou na.
4. Eme a rẹ sae ruẹ evaọ oria “Jọ Ogbẹnyusu Jihova” na?
4 Jọ Ogbẹnyusu Jihova: Ividio, ile, gbe eware efa nọ e rrọ oria nana i re fi obọ họ kẹ esẹgbini wuhrẹ emọ rai Ẹme Ọghẹnẹ. (Izie. 31:12) Ividio ekpẹkpẹe nọ e rrọ oria nana i re wuhrẹ emọ na obọdẹ eware jọ. Ifoto nọ a rẹ jọ gwọlọ eware na i re fi obọ họ kẹ emọ na wo otoriẹ oware nọ ividio na i bi wuhrẹ. Ile e rẹ were emaha ẹso gaga, yọ ile i re fi obọ họ kẹ ae kareghẹhọ eware nọ a wuhrẹ, fikiere ma be hai fi ile nọ a rehọ no Ebaibol ze nọ a so rọkẹ emaha na họ Oria Evuẹ na.
5. Fikieme esẹgbini a rẹ rọ lẹ se Jihova re o fi obọ họ kẹ ae wuhrẹ emọ rai?
5 Whai esẹgbini, Jihova ọ gwọlọ nọ wha riẹ emọ rai yọrọ ziezi. Fikiere, lẹ sei re o fi obọ họ kẹ owhẹ wuhrẹ emọ ra uzẹme na. (Ibr. 13:8) Jihova o ti fi obọ họ kẹ owhẹ wuhrẹ emọ ra re a “wha ẹro te usiwo eva ẹruọrọsuọ Jesu Kristi.”—2 Tim. 3:15; Itẹ 4:1-4.