Epanọ Ma Sai ro Fi Obọ Họ kẹ Ahwo nọ Ma Sae rọ Obe Ebaibol Wuhrẹ na Mu Uwuhrẹ Họ Kugbe He
1. Kọ ohwo kpobi ọ te gwọlọ nọ ma rọ obe Ebaibol Wuhrẹ na ro mu uwuhrẹ họ kugbei? Ru ei vẹ.
1 Re ohwo ọ sae gọ Jihova, ọ rẹ riẹ oware nọ Ebaibol na o wuhrẹ tao. Rekọ, ahwo jọ a rrọ egagọ Ileleikristi hi, yọ a rri Ebaibol na fihọ ẹme Ọghẹnẹ hẹ. Eme a ro fi obọ họ kẹ ahwo nọ a sae rọ obe Ebaibol Wuhrẹ na mu uwuhrẹ họ kugbe he? Ma rehọ ithubro nọ ma be te t’ẹme kpahe na no eme nọ iwhowho-uvie sa-sa a ta ze, enọ e rrọ erẹwho nọ i bu te 20.
2. Otẹrọnọ ohwo jọ ọ ta nọ ọ rọwo nọ Ọghẹnẹ ọ rrọ họ, eme ma rẹ daoma riẹ, kọ fikieme?
2 Enọ E Rọwo nọ Ọghẹnẹ Ọ Rrọ Họ: Otẹrọnọ ohwo jọ ọ ta nọ Ọghẹnẹ ọ rrọ họ, o gwọlọ nọ ma rẹ daoma riẹ oware nọ ọ rọ ta ere. Kọ fikinọ ọ rọwo nọ ẹma a ma eware he? Kọ fiki okienyẹ nọ ọ rrọ akpọ na hayo eviẹhọ nọ isu egagọ e be viẹ ahwo họ jabọ nọ ọ gbẹ rọ rọwo nọ Ọghẹnẹ ọ rrọ họ? Kọ o no orẹwho nọ ahwo a jọ rọwo Ọghẹnẹ hẹ ze? Ẹsejọhọ ọ nwane vro riẹriẹriẹ hẹ inọ Ọghẹnẹ ọ rrọ họ, rekọ o roro nọ u du gwọlọ nọ o re fievahọ Ọghẹnẹ hẹ. Inievo buobu a rẹ nọ ahwo otiọye na inọ, “Kọ ere whọ rọwo n’otọ ze?” Onọ nana u re ru ohwo na ta oware nọ o riẹe eva. Gaviezọ kẹ ohwo na, who bru ẹme dhei unu hu. Nọ ma tẹ riẹ oware nọ o soriẹ nọ ohwo na ọ gbẹ rọ rọwo nọ Ọghẹnẹ ọ rrọ họ, ma te riẹ oghẹrẹ uyo nọ ma rẹ kẹe gbe obe nọ ma rẹ kẹe.—Itẹ 18:13.
3. Ẹvẹ ma sai ro dhesẹ nọ ohwo o wo udu nọ ọ rẹ rọ rọwo oware nọ u je rie?
3 Nọ whọ te bi lele ohwo na ta ẹme, who ru re o roro nọ who bi rri oware nọ ọ rọwo vo ho. Oniọvo jọ evaọ obọ America ọ ta nọ: “U wuzou gaga re who dhesẹ kẹ ohwo na nọ o wo udu nọ ọ rẹ rọ rọwo oware kpobi nọ u je rie. Ukpenọ ma lele ohwo na vro avro, u fo nọ ma rẹ nọe enọ nọ i re fi obọ họ kẹe roro je wo otoriẹ ẹme na.” Ọsẹro okogho jọ ọ ta nọ, nọ ọ tẹ gaviezọ kẹ oware nọ o lẹliẹ ohwo na rọwo ere no, ọ vẹ kake nọ ohwo na nọ, “Kọ who rri ẹme na no abọ ọfa ze no ẹdẹjọ?”
4. Ẹvẹ ma sai ro fi obọ họ kẹ ahwo nọ e rrọ egagọ Buddha?
4 Ahwo buobu nọ e rrọ egagọ Buddha a riẹ kpahe Ọghẹnẹ hẹ. Inievo jọ nọ e rrọ orẹwho Britain a rẹ rehọ ibroshọ na Lasting Peace and Happiness—How to Find Them rọ ta usiuwoma kẹ ahwo otiọye na. Nọ a tẹ ta kpahe eme-emuhọ obe na no, a vẹ ta kpahe uzoẹme na “Is There Really a Most High Creator?” kẹsena a vẹ ta kpahe abọ nana “A Guidebook for the Blessing of All Mankind.” Nọ a te ru ere no, a ve dhesẹ obe Ebaibol Wuhrẹ na kẹ ohwo na jẹ ta nọ: “O tẹ make rọnọ whọ rọwo nọ Ọghẹnẹ ọ rrọ họ, o roja re who wuhrẹ Ebaibol na keme ehrẹ nọ e riẹe eva i ti fi obọ họ kẹ owhẹ.” Ọkobaro jọ nọ ọ rrọ obọ America nọ ọ be ta usiuwoma evaọ ẹkwotọ nọ ahwo China a be rria ọ ta nọ: “Obe-use o rẹ were ahwo buobu evaọ ẹkwotọ na. Fikiere nọ ma tẹ kẹ ae obe, taure ma te ti zihe yọ a se obe na re no. Rekọ a re wo otoriẹ oware nọ ma bi ro zihe bru rai re ma wuhrẹ Ebaibol kugbe ai hi. Fikiere mẹ rẹ gwọlọ rehọ ibroshọ Emamọ Usi na kẹ ae keme a kere obe na evaọ oghẹrẹ nọ whọ sae rọ rehọ iẹe ta ẹme kugbe ohwo.” Ọsẹro okogho jọ evaọ obọ America nọ o bi rri ikoko nọ e rẹ jẹ ẹvẹrẹ China ọ ta nọ a sae rehọ obe Ebaibol Wuhrẹ na wuhrẹ kugbe ahwo evaọ oke ọsosuọ nọ a rọ ta usiuwoma kẹ ae. Rekọ o rẹ mai woma re a mu uwuhrẹ na họ evaọ uzou avọ 2 nọ o ta kpahe Ebaibol na ukpenọ a rẹ jọ uzou 1 muhọ, onọ o ta kpahe Ọghẹnẹ.
5. Fikieme o rọ gwọlọ nọ ma re thihakọ?
5 Re ahwo nọ ma bi wuhrẹ Ebaibol kugbe a mu usu kugbe Ọghẹnẹ o rẹ rehọ oke, fikiere o gwọlọ nọ ma re thihakọ. Evaọ oke ọsosuọ nọ ma rọ ta usiuwoma kẹ ohwo, ẹsejọhọ ohwo na ọ te rọwo nọ Ọghẹnẹ ọ rrọ họ. Rekọ nọ oke o be nyaharo na, ohwo na ọ sae rọwo nọ ẹsejọhọ Ọghẹnẹ ọ rrọ, hayo ọ sai wo otoriẹ oware nọ ahwo jọ a rọ rọwo nọ Ọghẹnẹ ọ rrọ.
6. Fikieme ahwo jọ a gbe ro fievahọ ẹme Ebaibol na ha?
6 Enọ E Rọwo Ẹme Ebaibol Ho: Ohwo ọ sae rọwo nọ ẹsejọhọ Ọghẹnẹ ọ rrọ, rekọ o fievahọ ẹme Ebaibol na ha keme ọ rọwo nọ Ebaibol na yọ Ẹme Ọghẹnẹ hẹ. O sae jọnọ ọ be rria ẹwho nọ ikpichọche a rrọ họ, yọ ọ rehọ Ebaibol na fihọ obe Kristẹndọm. Hayo ọ be rria ẹwho nọ ahwo a jọ kru ichọche ga ha, fikiere o roro nọ ẹme Ebaibol na o ti w’iruo kẹe he. Ẹvẹ ma sai ro fi obọ họ kẹ ahwo otiọnana fievahọ ẹme Ebaibol na re a jẹ rọwo wuhrẹ obe Ebaibol Wuhrẹ na?
7. Edhere vẹ ma sai ro fi obọ họ kẹ ahwo wo isiuru kpahe Ebaibol na?
7 Uwou ogha obọ Grisi u kere nọ: “Edhere nọ o mai woma nọ ma re ro fi obọ họ kẹ ahwo nọ i fievahọ ẹme Ebaibol ho họ, ma re rovie Ebaibol na ma ve sei kẹ ae. Inievo buobu a vuhumu no inọ ẹme Ebaibol u re duobọte ohwo udu vi ẹme kpobi nọ a ta. (Hib. 4:12) Nọ ahwo a tẹ ruẹ odẹ Ọghẹnẹ evaọ Ebaibol na, o rẹ lẹliẹ ae gwọlọ wuhrẹ Ebaibol na.” Uwou ogha obọ India u kere nọ: “Ahwo egagọ Hindu buobu a rẹ gwọlọ riẹ uzẹme na kpahe uzuazọ gbe uwhu, yọ eyaa nọ e rrọ Ebaibol na kpahe akpọ nọ omohẹriẹ o te jọ họ o rẹ were ae re.” Ẹsibuobu, inievo na a rẹ ta kpahe ebẹbẹ nọ ahwo ẹkwotọ na a bi wo, a vẹ jọ Ebaibol na dhesẹ oghẹrẹ nọ Uvie Ọghẹnẹ u ti ro ku ebẹbẹ na họ.
8. Eme ma rẹ sae ta kẹ ahwo nọ i fievahọ ẹme Ebaibol na ha fiki egagọ Kristẹndọm?
8 Otẹrọnọ ohwo jọ o fievahọ ẹme Ebaibol na ha fiki Kristẹndọm, daoma ru ohwo na riẹ nọ egagọ Kristẹndọm a bi ru lele oware nọ Ebaibol na ọ ta ha, yọ a bi wuhrẹ uzẹme na ha. Uwou ogha obọ India u kere nọ: “Evaọ ẹsejọ, u fo nọ ma re fi obọ họ kẹ ohwo na riẹ nọ orọnikọ ikpichọche họ enọ i wo Ebaibol na ha.” Inievo na a ta nọ abọ avọ 4 ọrọ ibroshọ na Eme Họ Ẹjiroro Uzuazọ? Ẹvẹ Whọ Sai Ro Duku Ei? o rẹ were ahwo egagọ Hindu, onọ o ta kpahe epanọ ahwo ichọche a jẹ rọ gwọlọ vẹ Ẹme Ọghẹnẹ tu. Ọkobaro jọ evaọ obọ Brazil ọ rẹ vuẹ ahwo nọ: “Kọ whọ gbẹ daoma riẹ oware nọ o rrọ eva Ebaibol na? Ahwo buobu a be daoma se Ebaibol na, yọ o nwani dhesẹ nọ a kuomagbe egagọ jọ no ho. Eware nọ whọ te jọ Ebaibol na se ku i ti gb’owhẹ unu.”
9. Otẹrọnọ ohwo jọ ọ gwọlọ wuhrẹ Ebaibol na evaọ oke ọsosuọ họ, fikieme oma o gbẹ rọ rrọ omai hi?
9 Jihova ọ rẹ ruẹ oware nọ o rrọ udu ohwo. (1 Sam. 16:7; Itẹ 21:2) O bi si ahwo evezi ziọ egagọ uzẹme. (Jọn 6:44) Ahwo otiọye na buobu a ri wuhrẹ kpahe Ọghẹnẹ ẹdẹvo ho, yọ a riẹ kpahe Ebaibol na tere he. Usiuwoma nọ ma be ta na u re fi obọ họ kẹ ae “wo usiwo, re a ze te riẹ uzẹme na.” (1 Tim. 2:4) Fikiere, otẹrọnọ ahwo jọ a gwọlọ wuhrẹ Ebaibol na evaọ oke ọsosuọ họ, jọ oma o rrọ owhẹ hẹ. Rehọ ebe gbe ividio ukoko na ro fi obọ họ kẹ ohwo na wo isiuru kpahe Ebaibol na. Nọ oke o be nyaharo na, whọ sai nwene kpohọ obe ọ Eme Ebaibol na O Gine Wuhrẹ?, obe nọ ma be mai ro wuhrẹ ahwo na.
[Ẹkpẹti nọ o rrọ ẹwẹ-obe avọ 4]
Otẹrọnọ ohwo nọ ma be ta usiuwoma kẹ ọ rọwo nọ Ọghẹnẹ ọ rrọ họ, dawo onana:
• Nọe nọ, “Kọ ere whọ rọwo n’otọ ze?” re whọ riẹ oware nọ o riẹe eva.
• Otẹrọnọ ohwo egagọ Buddha, rehọ ibroshọ Lasting Peace and Happiness—How to Find Them, ẹwẹ. 9 rite 12 ro fi obọ họ kẹe.
• Otẹrọnọ ọ rọwo nọ ẹma a ma eware he, whọ sae rehọ ebe gbe ividio nana fi obọ họ kẹe:
Izoẹme nana, “Was It Designed?” nọ e rẹ romavia evaọ Awake!
Ividio ọ The Wonders of Creation Reveal God’s Glory
Ibroshọ A Satisfying Life—How to Attain It, abọ avọ 4; Was Life Created?; gbe The Origin of Life—Five Questions Worth Asking
• Otẹrọnọ ohwo na ọ rọwo nọ Ọghẹnẹ ọ rrọ họ fiki okienyẹ gbe uye-oruẹ nọ e rrọ akpọ na, whọ sae rehọ ebe nana fi obọ họ kẹe:
Obe ọ Is There a Creator Who Cares About You?, uzou avọ 10
Ibroshọ Kọ Ọghẹnẹ Ọ Be Ghinẹ Daezọ Mai?, abọ avọ 6, gbe Eme họ Ẹjiroro Uzuazọ?, abọ avọ 6
• Nọ ohwo nọ whọ be ta usiuwoma kẹ na ọ tẹ rọwo no inọ ẹsejọhọ Ọghẹnẹ ọ rrọ, nwene kpohọ obe Ebaibol Wuhrẹ na. Whọ sae rehọ uzou avọ 2 mu uwuhrẹ na họ hayo uzoẹme ọfa nọ u kiehọ kẹ ohwo na.
[Ẹkpẹti nọ o rrọ ẹwẹ-obe avọ 5]
Otẹrọnọ ohwo nọ ma be ta usiuwoma kẹ na o fievahọ Ebaibol ho, dawo onana:
• Whẹ avọ iẹe wha se uzou avọ 17 gbe 18 ọrọ obe na Life—How Did It Get Here? By Evolution or by Creation?
• Rọkẹ ahwo egagọ Hindu, rehọ ibroshọ Why Should We Worship God in Love and Truth? ro fi obọ họ kẹ ae.
• Rọkẹ ahwo Ju, rehọ ibroshọ Will There Ever Be a World Without War?, ẹwẹ. 3 rite 11 ro fi obọ họ kẹ ae.
• Ta kpahe irere nọ i re te omai nọ ma te ru lele ehrẹ Ebaibol. Ebe gbe eware efa nọ whọ sai ro fi obọ họ kẹ ahwo riẹ epanọ ehrẹ Ebaibol e sae rọ kẹ omai erere họ:
Izoẹme nana, “Help for the Family” nọ e rẹ romavia evaọ Awake!
Ividio na The Bible—Its Power in Your Life
Ibroshọ Emamọ Usi nọ U No Obọ Ọghẹnẹ Ze!, uwuhrẹ avọ 9 gbe 11; A Book for All People, ẹwẹ. 22 rite 26; gbe ibroshọ A Satisfying Life—How to Attain It, abọ avọ 2
Rọkẹ ahwo egagọ Buddha, rehọ ibroshọ The Pathway to Peace and Happiness, ẹwẹ. 3 rite 7 ro fi obọ họ kẹ ae.
Rọkẹ ahwo egagọ Muslim, rehọ ibroshọ Real Faith—Your Key to a Happy Life, abọ avọ 3 ro fi obọ họ kẹ ae.
Whọ tẹ be ta usiuwoma evaọ oria nọ ahwo a jọ fievahọ Ebaibol ho, u du gwọlọ nọ whọ rẹ ta nọ Ebaibol na whọ be rehọ eme ra no ze he bẹsenọ who re zihe bru ohwo na unuẹse buobu no.
• Ru ei vẹ kẹ ahwo oghẹrẹ nọ eruẹaruẹ Ebaibol i ro rugba no. Ebe gbe ividio nọ whọ sai ro ru onana họ:
Ividio na The Bible—Accurate History, Reliable Prophecy
Ibroshọ A Book for All People, ẹwẹ. 27 rite 29
• Nọ ohwo na o te mu enọ họ ẹnọ kpahe izoẹme sa-sa no, nwene kpohọ obe Ebaibol Wuhrẹ na.
[Ẹkpẹti nọ o rrọ ẹwẹ-obe avọ 6]
Otẹrọnọ ohwo nọ ma be ta usiuwoma kẹ ọ ta nọ: “Mẹ rọwo nọ Ọghẹnẹ ọ rrọ họ,” whọ sae ta nọ:
• “Iviena jọ me dhesẹ oware nọ o lẹliẹ omẹ rọwo nọ Ọghẹnẹ ọ rrọ kẹ owhẹ.” Kẹsena whọ vẹ rehọ eme jọ no obe ọ Reasoning From the Scriptures ze, ẹwẹ. 84 rite 86, hayo whọ sae ta kẹ ohwo na nọ whọ te rehọ obe jọ nọ who se no rọ kẹe.
• “Rekọ otẹrọnọ Ọghẹnẹ ọ rrọ, ẹvẹ whọ hae gwọlọ nọ ọ rẹ jọ?” Ahwo buobu nọ ma rẹ ta usiuwoma kẹ a rẹ ta nọ a gwọlọ Ọghẹnẹ nọ ọ rrọ yoyou, ọnọ o re bru uvi-oziẹ, nọ o re dhesẹ ọriẹwẹ hẹ. Nọ ohwo na ọ tẹ ta ere, dhesẹ kẹe evaọ Ebaibol na inọ epanọ ọ ta na Ọghẹnẹ ọ rrọ. (O tẹ lọhọ, whọ sae rehọ obe Ebaibol Wuhrẹ uzou 1, edhe-ẹme avọ 6 rọ ta ẹme kugbei.)
Otẹrọnọ ohwo nọ ma be ta usiuwoma kẹ ọ ta nọ: “Me fievahọ ẹme Ebaibol na ha,” whọ sae ta nọ:
• “Ahwo buobu a rẹ ta ere. Ejọ e rẹ ta nọ Ebaibol na ọ rọwo kugbe otokiẹ-eriariẹ hẹ hayo inọ ehrẹ nọ e riẹe eva i wo iruo kẹ omai hi. Kọ who se Ebaibol na no ẹdẹjọ? [Kuvẹ kẹ uyo. Kẹsena who ve dhesẹ eme nọ e rrọ emuhọ ẹwẹ-obe avọ 3 evaọ ibroshọ A Book for All People na kẹe, whọ vẹ rehọ ibroshọ na kẹe.] Ahwo buobu a fievahọ Ebaibol na ha fikinọ ikpichọche a bi ru lele eme nọ e rrọ eva riẹ hẹ. Nọ me te zihe ze, ma te ta kpahe oriruo jọ nọ o rrọ ẹwẹ-obe avọ 4 gbe 5 na.”
• “Ahwo buobu a rẹ ta ere. Ivie jọ me dhesẹ oware jọ nọ o lẹliẹ omẹ fievahọ Ebaibol na k’owhẹ. [Se Job 26:7 hayo Aizaya 40:22, nọ u dhesẹ nọ ẹme kpobi nọ Ebaibol na ọ ta kpahe otokiẹ-eriariẹ o rrọ gbagba.] Whọ rẹ jẹ jọ Ebaibol na ruẹ ehrẹ nọ i re fi obọ họ kẹ iviuwou. Nọ me te zihe ze, me ti dhesẹ ohrẹ otiọye na jọ kẹ owhẹ.”
• “Me yere owhẹ kẹ ẹme nọ whọ ta na. Otẹrọnọ Ọghẹnẹ o kere obe kẹ ahwo-akpọ, eme who roro nọ o rẹ jọ eva obe na?” Kẹsena whọ vẹ jọ Ebaibol na dhesẹ oware jọ kẹe nọ o rọwo kugbe uyo nọ ọ kẹ na.