Ẹkpẹti Onọ

◼ Eme a re wuhrẹ emọ re a sai kruga evaọ ukoko na?

Esẹgbini nọ e rrọ ukoko na a rẹ daoma rai kpobi re a “ru [emọ rai] yo ẹme je wuhrẹ ai orọ Ọnowo na.” (Ẹf. 6:4) Wọhọ oriruo, esẹgbini a ruẹ no nọ re a se obe okpẹdẹ kugbe emọ rai kohiohiẹ kohiohiẹ u re fiobọhọ kẹ ae. Nọ a te bi ru egagọ uviuwou hayo evaọ oke ofa, iviuwou a rẹ sai rri ividio ukoko na jọ jẹ ta ẹme kpahe iẹe. A rẹ sae jẹ ta ẹme kpahe izoẹme jọ nọ e rrọ obe ọ Young People Ask na, rọ iku Ebaibol jọ ru edrama, hayo ru idhesẹvia. Ghele na, re emọ a sai kruga evaọ ukoko na, a re wuhrẹ eware ididi nọ e rrọ Ebaibol na.—Hib. 6:1.

Dai roro kpahe eware nọ ma be hai wuhrẹ ahwo evaọ usiuwoma. Evaọ ẹdẹ ọsosuọ nọ ma rọ ta usiuwoma kẹ ohwo hayo nọ ma te zihe bru rie, ma rẹ daoma rọ obe ọ Eme Ebaibol na O Gine Wuhrẹ? na ro mu obe-uwuhrẹ Ebaibol họ kugbei. Nọ ma te wuhrẹ obe yena re no, ma vẹ ruọ obe ọ Daji Uyoyou Ọghẹnẹ na. Ẹvẹ o rọ rrọ ere? Keme obe ọ Ebaibol Wuhrẹ na u re fiobọhọ kẹ ọmọ-uwuhrẹ na wo ugogo eriariẹ nọ e rrọ Ebaibol na. Obe ọ Uyoyou Ọghẹnẹ na u ve wuhrẹ iẹe epanọ o re ro fi ehrẹ Ebaibol họ iruo evaọ uzuazọ. Ebe ivẹ na nọ emọ-iwuhrẹ a re wuhrẹ i re fiobọhọ kẹ ae “tawọ mu” ewuhrẹ Kristi “re orọwọ rai o ga” ziezi. (Kọl. 2:6, 7) Kọ ma gbẹ rọ ebe nana wuhrẹ emọ mai re? U fo nọ emọ mai a re wo otoriẹ idhe ẹtanigbo na, Uvie Ọghẹnẹ, gbe oware nọ Ebaibol na ọ ta kpahe ahwo nọ i whu no. U te je fo nọ emọ na a rẹ riẹ oware nọ Ọghẹnẹ ọ rọ kuvẹ kẹ uye-oruẹ gbe je vuhumu nọ edẹ urere uyero-akpọ nana ma rrọ na. U re mu ai ẹro nọ Isẹri Jihova ọvo a bi wuhrẹ uzẹme na. O gwọlọ nọ emọ na a re wo otoriẹ izi Ebaibol je “wo areghẹ te epanọ a sae [rọ] hẹriẹ uwoma no uyoma.” (Hib. 5:14) Ababọ avro, esẹgbini a rẹ daoma riẹ epanọ areghẹ emọ rai o te nọ a sai ro wo otoriẹ eware jọ. Ghele na, emọ jọ a rẹ sai wo otoriẹ eware ididi Ebaibol na dede nọ a gbẹ maha.—Luk 2:42, 46, 47.