J’owọ Ababọ Okioraha

Anwẹnọ a ro ru onaa họ Oria Evuẹ mai no na, unu ahwo nọ e be jọ itanẹte yare obe-uwuhrẹ Ebaibol a bi dhe ebuebu. Usiuwoma ota ẹgbede okpokpọ nọ a rẹ jọ fi ebe họ emẹjẹ evaọ oria nọ u re zurie na, u bi ru nọ amọfa buobu a be rọ yare obe-uwuhrẹ re. Uwou ogha u re ru ọruẹrẹfihotọ nọ a rẹ rọ nyabru ahwo otiọye na ababọ okioraha. Wọhọ oriruo, otẹrọnọ ohwo ọ jọ jw.org yare obe-uwuhrẹ Ebaibol, o rẹ vrẹ edẹ ivẹ hẹ re uwou ogha o tẹ vuẹ ekpako ukoko nọ e rrọ ẹkwotọ nọ ohwo na ọ be rria. Rekọ iyẹrẹ i dhesẹ nọ o be hae rehọ eka buobu taure a tẹ te nyabru ahwo jọ nọ a yare obe-uwuhrẹ Ebaibol. Eme ma rẹ sai ru ro fiobọhọ kẹ ahwo nana re isiuru rai e seba ẹhiẹ?—Mak 4:14, 15.

Otẹrọnọ ohwo jọ o dhesẹ isiuru rekọ ọ rrọ ẹkwotọ ra ha, kere efọmo Please Follow Up (S-43) na, re whọ rehọ iẹe kẹ okere-obe ukoko ra ababọ okioraha, u te kri gaga jọ o jọ ewuhrẹ nọ o lele i rie. Evaọ ẹdẹdẹ yena hayo okiokiọ riẹ, okere-obe ukoko na ọ vẹ jọ jw.org vi efọmo na kpohọ ukoko nọ ohwo na ọ rrọ ẹkwotọ rai na hayo kpohọ uwou ogha. Jọ ekpako ukoko a hai rovie oria evuẹ jw.org na n’oke t’oke. Otẹrọnọ a kere se ai nọ ohwo jọ ọ yare obe-uwuhrẹ Ebaibol, jọ a vi oniọvo jọ bru ohwo na ababọ okioraha. Jọ owhowho-uvie kpobi nọ a ta kẹ re ọ nyabru ohwo na o ru ere kpata kpata. Otẹrọnọ who di rie họ uwou hu, whọ sai kere eme fihotọ hẹrẹ iẹe, kugbe adrẹse avọ inọmba ifonu ra.