Rehọ jw.org na Ta Usiuwoma

Oria Evuẹ Itanẹte mai na yọ obọdẹ edhere jọ nọ ma be rọ wha usiuwoma na haro “rite ọnyaba akpọ na.” (Iruẹru 1:8) Ahwo buobu a riẹ Oria Evuẹ jw.org na vẹre he. Rekọ evaọ ẹsibuobu ma be hai dhesẹ iẹe kẹ ae.

Ọsẹro ọnyawariẹ jọ ọ rehọ ividio Fikieme Who re ro Wuhrẹ Ebaibol Na? fihọ ifonu riẹ nọ o re dhesẹ kẹ ahwo nọ uvẹ na u te rovie. Wọhọ oriruo, nọ ọ tẹ rrọ usiuwoma n’uwou ruọ uwou, ọ rẹ ta nọ: “Ma be nya bru ahwo nẹnẹ re ma fiobọhọ kẹ ae ruẹ iyo enọ esa jọ nọ i wuzou gaga, eyehọ: Fikieme ebẹbẹ e rọ vọ akpọ na enẹ? Kọ ẹvẹ Ọghẹnẹ ọ te rọ ruẹrẹ iẹe họ? Kọ ẹvẹ ma sai ro thihakọ enẹna? Ividio ọkpẹkpẹ nana ọ kẹ iyo enọ nana.” Kẹsena o ve mu ei họ ekporo yọ o bi rri ohwo na. Fikinọ ividio na o siuru gaga, ahwo buobu a rẹ jẹlẹ ẹro noi hi bẹsenọ u re re no. Kẹsena ọsẹro ọnyawariẹ na ọ vẹ ta nọ: “Who yo nọ a ta nọ whọ sae yare obe-uwuhrẹ Ebaibol evaọ jw.org na. Rekọ nọ mẹ rrọ etenẹ na, jọ me dhesẹ oghẹrẹ nọ a re ru uwuhrẹ na kẹ owhẹ.” Nọ ohwo na ọ tẹ rọwo, ọ vẹ rehọ ibroshọ Emamọ Usi Na rọ to obe-uwuhrẹ họ kugbei. Otẹrọnọ ohwo na o gbe wo uvẹ hẹ, ọ vẹ ta kẹe nọ o ti zihe ze oke ofa. Nọ o te kpohọ oria nọ a rẹ jọ da ekọfi nyai serihọ, o ve ru epọvo na nọ o te yere ohwo nọ ọ keria kẹle iẹe no. Kọ whọ be rehọ jw.org na ta usiuwoma?