Rehọ Oria Evuẹ Mai na Ta Usiuwoma​—“Enọ nọ Ebaibol Ọ Kẹ Iyo Rai”

Who te rovie oria “Iwuhrẹ Ebaibol” nọ o rrọ jw.org na, whọ rẹ jariẹ ruẹ oria nọ a se “Enọ nọ Ebaibol Ọ Kẹ Iyo Rai.” Nọ ma tẹ riẹ iyo enọ nọ a be hae za fihọ oria nana, u ti ru nọ ma te sae rọ vuẹ ohwo nọ ma be ta usiuwoma kẹ re o kpohọ Oria Evuẹ mai na nọ ọ tẹ nọ onọ utioye jọ. Ma sae jẹ rehọ enọ nana mu ẹme họ kugbe ohwo evaọ usiuwoma. Ma sae salọ onọ jọ nọ ma riẹ nọ u ti si ahwo ẹkwotọ mai urru, whọ tẹ nọe no, whọ vẹ rehọ uyo nọ whọ jọ jw.org ruẹ na za onọ na kẹe kpahe oware nọ Ebaibol na o ta. Who te ru ere no, whọ vẹ vuẹe oria nọ who jo duku uyo na hayo who ve rovie iei. Edhere ọfa họ, whọ rẹ vuẹe re ọ jọ Oria Evuẹ na se uyo onọ na kẹ omariẹ. Aye ọsẹro ọnyawariẹ jọ o dhesẹ epanọ ọ be hai ro ru onana, ọ ta nọ: “Ahwo buobu a rẹ nọ inọ, ‘Kọ Ọghẹnẹ Ọ be Wha Uye-Oruẹ Ze?’ Kọ whọ gwọlọ ruẹ uyo onọ na evaọ emaharo 51?” O ve kporo uyo onọ na nọ a se do via nọ ọ rehọ fihọ ifonu riẹ kẹ ohwo na. Nọ o te bi ku ẹme riẹ họ, o ve dhesẹ uzou avọ 11 obe Ebaibol Wuhrẹ na kẹ ohwo na.