Eme Ebaibol na Ọ rẹ Sai Wuhrẹ Omai?​—Epanọ A rẹ rọ Rehọ iẹe Wuhrẹ

Obe Ebaibol Wuhrẹ avọ Eme Ebaibol na Ọ rẹ Sai Wuhrẹ Omai? (ma ri woi evaọ Isoko ho) na e dina wọhọ epọvo na. Ma rẹ rehọ ebe ivẹ nana wuhrẹ ahwo uzẹme na yọ a ruẹrẹ e rai họ enwenọ oghẹrẹ ovona. Ghele na, obe Eme Ebaibol na Ọ rẹ Sai Wuhrẹ Omai? na eme riẹ e lọhọ wo umuo ho yọ ọ lọhọ rọkẹ ewuhrẹ. A ru rie fiki ahwo nọ a re wo otoriẹ obe Ebaibol Wuhrẹ na tere he. Ukpenọ obe Eme Ebaibol na Ọ rẹ Sai Wuhrẹ Omai? na u wo ẹme-ofiba, u wo eme-oruvẹ nọ a jọ fotọ emejọ gbe ihie eme nọ e rrọ uzou na nọ e rrọ gaga vẹ. Izou na i wo enọ emuhọ hayo enọ ọkiẹkpemu hu. Rekọ uzou kpobi u wo orukpẹre evaọ ekuhọ riẹ nọ a jọ ru uzẹme Ebaibol vẹ. Wọhọ epanọ ma rẹ rọ Ebaibol Wuhrẹ rọkẹ ohwo evaọ oke kpobi na, ere ọvona ma rẹ sae rọ Eme Ebaibol na Ọ rẹ Sai Wuhrẹ Omai? kẹ ohwo re dede nọ oye ma be rọ kẹ ahwo evaọ amara yena ha. Ẹvẹ ma sae rọ rehọ abọ sa-sa obe Eme Ebaibol na Ọ rẹ Sai Wuhrẹ Omai? ru obe uwuhrẹ kugbe ohwo?

ORUKPẸRE: Rọkẹ ahwo jọ a te se edhe-ẹme evaọ obe Ebaibol Wuhrẹ na no, a vẹ nọ onọ na, ere a re ro ru uwuhrẹ kugbe ohwo. Kọ, otẹrọnọ ohwo na ọ be sae ta ẹvẹrẹ na hayo ọ riẹ ese tere he? Otẹrọ ere, whọ vẹ tubẹ rọ orukpẹre nọ o rrọ obọ ekuhọ uzou ovuovo obe Eme Ebaibol na Ọ rẹ Sai Wuhrẹ Omai? na ro ru ewuhrẹ na. Kẹsena whọ vẹ tuduhọ ọmọ-uwuhrẹ na awọ re o se uzou na kẹ omariẹ. A sae rọ iminiti 15 ro ru uzẹme ovuovo vẹ. Nọ orọnọ orukpẹre na ọ nwani wo eme bu hu na, ohwo nọ o bi ru ewuhrẹ ọ rẹ ruẹrẹ oma kpahe ziezi, je wo uyero ọmọ-uwuhrẹ na họ iroro nọ ọ tẹ be ruẹrẹ oma kpahe. Rekọ otẹrọnọ uzou na o bi ro ru ewuhrẹ na, ọ vẹ rọ orukpẹre na ru ọkiẹkpemu.

EME-ORUVẸ: A ruẹrẹ eme-oruvẹ fihọ othotha wọhọ epanọ e rọ romavia evaọ uzou na. Ọnọ o bi ru uwuhrẹ na ọ rẹ salọ sọ ọ rẹ ta kpahe eme-oruvẹ nọ e rrọ obe Eme Ebaibol na Ọ rẹ Sai Wuhrẹ Omai? na evaọ etoke ewuhrẹ na.