Mu Usu Kugbe Ahwo nọ A You Jihova

Fikieme ma re ro mu usu kugbe ahwo nọ a you Jihova? Keme egbẹnyusu mai e rẹ sai fiobọhọ kẹ omai wo emamọ uruemu hayo ru nọ ma re ro wo ekpehre uruemu. (Itẹ 13:20) Wọhọ oriruo, nọ Jehoash ovie na o mu usu kugbe Jehoyada Ozerẹ Okpehru na, ẹsiẹe Jehoash o je ro ru “oware nọ u kiehọ evaọ aro Jihova.” (2Ir 24:2) Rekọ nọ Jehoyada o whu no, Jehoash ọ tẹ nyasiọ Jihova ba fiki ekpehre usu.​—2Ir 24:17-19.

Evaọ ikpe-udhusoi ọsosuọ, Pọl ukọ na ọ rehọ ukoko Ileleikristi na dhesẹ “uwou ulogbo,” jẹ rehọ ahwo nọ a rrọ ukoko na dhesẹ “ekwakwa sa-sa” nọ e rrọ uwou na. Nọ ma gbe mu usu kugbe ahwo nọ a bi koko izi Jihova ha, a tẹ make rrọ imoni mai hayo inievo ukoko na, ma te jọ “okwakwa nọ o rrọ kẹ iruo nọ i wo ọghọ.” (2Ti 2:20, 21) Fikiere, joma mu usu kugbe ahwo nọ a you Jihova, enọ e rẹ sae tuduhọ omai awọ re ma gọ Jihova.

WHA RRI IVIDIO NA WUHRẸ OGHẸRẸ NỌ A RẸ RỌ WHAHA USU UYOMA, KẸSENA WHA VẸ KIYO ENỌ NANA:

• Oghẹrẹ vẹ usu uyoma o sae rọ rehọ ẹmẹrera ruọ omai oma?

• Evaọ ividio nọ ma rri na, eme o fiobọhọ kẹ inievo esa na siomano ekpehre usu?

• Ehri-izi Ebaibol vẹ e rẹ sai fiobọhọ kẹ owhẹ salọ emamọ egbẹnyusu?