Kọ Whọ Ruẹrẹ Oma Kpahe kẹ Ozighi nọ Ọ Sae Romavia Evaọ Oria nọ Whọ be Rria No?

Nọ ekuhọ uyero-akpọ nana o bi si kẹle na, ma riẹ nọ ozighi, ọkparesuọ, gbe ẹmo i ti vihọ. (Ev 6:4) Kọ ẹvẹ ma sae rọ ruẹrẹ oma kpahe taure eware nana e tẹ te via evaọ oria nọ ma rrọ?

• Wo emamọ usu kugbe Ọghẹnẹ enẹna: Wuhrẹ kpahe izi gbe iku Ebaibol nọ e sai fiobọhọ kẹ owhẹ fi ẹrọwọ họ Jihova gbe ukoko riẹ, gbe enọ e rẹ sai fiobọhọ kẹ owhẹ nọ whọ gbẹ rọ jọ abọ ọvo ho evaọ akpọ na. (Itẹ 12:5; jr-E 125-126 ¶23-24) Enẹna họ oke nọ ma sai ro mu usu okpekpe kugbe inievo ukoko na, onọ o rẹ jọ gaga.—1Pi 4:7, 8

• Ruẹrẹ emu gbe eware efa kpahe: Ruẹ nọ who wo emu nọ o sai te owhẹ re omoke jọ fihọ uwou, fiki ariẹse he, otẹrọnọ o gwọlọ nọ who re no uwou ze he. Whọ sai je koko eware wọhọ, ame, ibi-imu, gbe eware itieye na efa fihọ uwou re. U te no ere no, wo omaa oghẹrẹ nọ whọ sae rọ dhẹ nọ o tẹ gwọlọ ere. Kiẹ eware nọ e rrọ ẹkpa ra nọ whọ ruẹrẹ fihọ nọ whọ sae wọ rọ dhẹ ogbohrẹ idudhe riwi, jẹ ruẹ nọ ehanglovu, emaske, gbe ugho e rrọ eva ẹkpa na. Ruẹ nọ who wo inọmba ifonu ekpako ukoko ra, a te je wo inọmba ifonu ra.—Aiz 32:2; g17.5-E 3-7

Nọ ozighi o te du lahwe, ruabọhọ eware nọ whọ be hai ru evaọ egagọ Jihova na, wọhọ olẹ, uwuhrẹ omobọ ra, gbe iwuhrẹ ukoko nọ whọ rẹ nya. (Fil 1:10) Who mu no oria ruọ oria ha, ajokpanọ whọ be dhẹ no oria nọ whọ rrọ na kpohọ ofẹ ọfa. (Mt 10:16) Ghale emuore gbe eware efa nọ who wo kugbe amọfa.—Rom 12:13

WHA RRI IVIDIO NA KỌ WHỌ RUẸRẸ OMA KPAHE KẸ OWARE OKPẸTU NO? KẸSENA WHA VẸ KIYO ENỌ NANA:

• Oghẹrẹ vẹ Jihova ọ sai ro fiobọhọ kẹ omai nọ okpẹtu o tẹ via?

• Eware jọ vẹ ma sai ru rọ ruẹrẹ oma kpahe?

• Oghẹrẹ vẹ ma sai ro fiobọhọ kẹ amọfa nọ oware okpẹtu o tẹ via kẹ ae?