Epanọ Ma re ro Dhesẹ Ividio Uwuhrẹ Ebaibol na kẹ Ahwo

Ma wo ividio uwuhrẹ Ebaibol ene nọ ma rẹ sai dhesẹ kẹ ahwo evaọ usi uwoma. Ẹjiroro vẹ a ro ru ividio nana ọvuọvo?

• 

  Fikieme Who re ro Wuhrẹ Ebaibol Na?—Othethei: A ru ividio nana re o fiobọhọ kẹ ahwo gwọlọ wuhrẹ Ebaibol na ghelọ egagọ kpobi nọ a rrọ kẹhẹ. Ahwo nọ a rri ividio na a rẹ ruẹ nọ a sae jọ Ebaibol na ruẹ iyo enọ buobu nọ e be kẹ ahwo uye nẹnẹ. A tẹ jẹ kẹ oriruo enọ itieye jọ. U te no ere no, a jọ ividio na ta epanọ ohwo ọ sae rọ yare nọ a wuhrẹ Ebaibol kugbei.

• 

  Fikieme Who re ro Wuhrẹ Ebaibol Na? (ọkpẹkpẹe riẹ): Ividio nana ọ wọhọ othethei na, rekọ a tẹ ghale othethei na kpohọ abasa, enwenọ abọvo riẹ o theri te. Ma sai dhesẹ ọnana kẹ ahwo evaọ oria nọ ahwo a jọ wo uvẹ tere he.

• 

  Ẹvẹ A re Ru Obe-Uwuhrẹ Ebaibol?: A ru ividio nana re a rehọ iẹe ta uwuhrẹ Ebaibol nọ ma bi ru ọvọvẹ ruọ ahwo oma. A tẹ jẹ jariẹ kẹ iyo enọ jọ nọ ahwo a rẹ sae nọ kpahe uwuhrẹ Ebaibol na, gbe epanọ ohwo ọ sae rọ yare re a wuhrẹ Ebaibol kugbei.

• 

  Ma Dede Owhẹ Rehọ Ziọ Uwuhrẹ Ebaibol Ra: A ru ividio nana re ma dhesẹ iẹe kẹ ahwo nọ ma bi wuhrẹ Ebaibol kugbe. Dede nọ ẹwẹ-obe avọ 2 obe Reawere Uzuazọ Bẹdẹ Bẹdẹ! na ma rẹ jọ ruẹ ividio na, ma sai je dhesẹ iẹe kẹ ohwo nọ ma bi wuhrẹ ibroshọ Reawere Uzuazọ Bẹdẹ Bẹdẹ! na kugbe re. A jọ ividio na ta kpahe eware jọ nọ e rrọ obe na gbe oghẹrẹ nọ uwuhrẹ na o te jọ.

Dede nọ u wo ọvuọ ẹjiroro riẹ nọ a ro ru ividio nana, ma sai dhesẹ ai kẹ ohwo hayo vi ai se ohwo evaọ oke nọ ma rri nọ u fo. Ma be tuduhọ iwhowho-uvie kpobi awọ re a riẹ eware nọ e rrọ ividio na ziezi, re a jẹ hai dhesẹ ai kẹ ahwo evaọ usi uwoma.