Oke nọ Omukpahọ O ti ro Notọ Riẹriẹriẹ!
Nọ ma tẹ maki si omukpahọ no udu mai, ma sae gba amọfa họ re a se iẹe ba ha. Ahwo buobu a gbẹ be ruẹ uye fiki omukpahọ. Kọ ẹvẹ omukpahọ o ti ro notọ riẹriẹriẹ?
Jihova Ọghẹnẹ ọvo họ ọnọ ọ rẹ sai si omukpahọ nọ o da akpọ na fia na no riẹriẹriẹ. Ọghẹnẹ ọ ya eyaa evaọ Ebaibol na nọ o ti si ei notọ.—Itẹ 20:22.
ỌGHẸNẸ O TI SI EWARE KPOBI NỌ E BE WHA OMUKPAHỌ ZE NO
1. SETAN ẸDHỌ NA. Ukọ-odhiwu nọ ọ wọso Ọghẹnẹ nọ a re se Setan na họ ọnọ ọ be mae wha omukpahọ nọ ọ rrọ akpọ na ze. Ọghẹnẹ ọ te raha Setan no gbe ahwo kpobi nọ a bi mukpahe amọfa.—Olezi 37:38; Ahwo Rom 16:20.
2. AKPỌ SETAN NỌ OMUKPAHỌ O DA FIA NA. Ọghẹnẹ ọ te raha ahwo kpobi nọ a bi dhesẹ omukpahọ evaọ akpọ na no, te isu egọmeti nọ a rẹ re udi gbe isu egagọ nọ a re ru ahwo mukpahe amọfa. Ọghẹnẹ ọ te jẹ raha ahwo kpobi nọ a be thueki nọ a wo uvou-uthei no, gbe enọ e rẹ re udi jẹ wha amọfa re.—2 Pita 3:13.
3. SEBAẸGBA OHWO-AKPỌ. Ebaibol na o dhesẹ nọ mai ahwo-akpọ ma reuku sebaẹgba, yọ onana o rẹ whae ze nọ ma rẹ rọ gwọlọ roro ekpehre iroro, je ru eware iyoma. (Ahwo Rom 5:12) Sebaẹgba na o rẹ whae ze nọ ma rẹ rọ gwọlọ fi ẹgo họ eva je mukpahe amọfa. Ọghẹnẹ o ti fiobọhọ kẹ ahwo-akpọ si iroro iyoma gbe iroro uzioraha no udu rai, fikiere omukpahọ o ti notọ riẹriẹriẹ.—Aizaya 54:13.
ỌGHẸNẸ Ọ YA EYAA AKPỌ ỌKPOKPỌ NỌ OMUKPAHỌ O TE JỌ HỌ
1. OKIENYẸ Ọ TE JỌ HỌ. Uvie Ọghẹnẹ nọ ọ rrọ egọmeti nọ Ọghẹnẹ o ro mu evaọ obọ odhiwu na, u ti su akpọ na je si okienyẹ notọ no. (Daniẹl 2:44) Omohẹriẹ hayo omagbẹre e te jariẹ hẹ. Ọghẹnẹ o ti si eware nọ e be wha okienyẹ kpobi ze no.—Luk 18:7.
2. AHWO KPOBI A TE RRIA DHEDHẸ. Ahwo a te gbẹ ruẹ uye fiki ẹmo hayo ozighi hi. (Olezi 46:9) Ahwo kpobi a te rria kugbe dhedhẹ je you ohwohwo.—Olezi 72:7.
3. AHWO KPOBI A TE RRIA BẸDẸ BẸDẸ EVAỌ APARADASE. Ahwo kpobi nọ a te rria akpọ na a ti gine you ohwohwo no udu ze. (Matiu 22:39) Eware iyoma nọ e via vrẹ no e te gbẹ kẹ ahwo uye he, yọ ahwo a te gbẹ kareghẹhọ ae he. (Aizaya 65:17) Evaọ oke yena nọ omukpahọ o te gbẹ jọ họ na, “eva e te were [ahwo] gaga fiki udhedhẹ nọ o dafia.”—Olezi 37:11.
Kọ whọ gwọlọ nọ whọ rẹ rria akpọ otiọye na? Makọ enẹna, ahwo buobu a be daoma si omukpahọ no udu, keme a bi ru oware nọ Ebaibol na ọ ta. (Olezi 37:8) Ere Isẹri Jihova evaọ akpọ na soso a bi ru. Dede nọ a no erẹwho gbe eria sa-sa ze, a rrọ wọhọ uviuwou keme a you ohwohwo, yọ okugbe o rrọ udevie rai.—Aizaya 2:2-4.
Eva e te were Isẹri Jihova re a vuẹ owhẹ kpahe epanọ a be sai ro thihakọ okienyẹ gbe omagbẹre nọ o da akpọ na fia nẹnẹ na. Eware nọ who ti wuhrẹ mi ai i ti fiobọhọ kẹ owhẹ si omukpahọ no udu je you amọfa. Who ti wuhrẹ epanọ whọ sae rọ jọ wowou kugbe ahwo kpobi, makọ ahwo nọ a mukpahe owhẹ gbe ahwo nọ a wo edẹro ho. Eware nana e te whae ze nọ who ti ro wo evawere enẹna je wo emamọ usu kugbe amọfa. Maero na, who ti wuhrẹ kpahe oware nọ u fo nọ who re ru re whọ sae rria akpọ nọ omukpahọ o te jọ họ nọ Uvie Ọghẹnẹ u ti su.—Olezi 37:29.