EPANỌ MA SAE RỌ WHAHA OMUKPAHỌ

4 | Ọghẹnẹ Ọ Sai Fiobọhọ Kẹ Owhẹ Si Omukpahọ No udu

Ebaibol na Ọ Ta Nọ:

“Ubi ẹzi na họ uyoyou, oghọghọ, udhedhẹ, odiri, uwowou, ewoma, ẹrọwọ, ẹwolẹ, oma-onyẹ.”—AHWO GALESHA 5:22, 23.

Oware nọ Onana U Dhesẹ:

Ma sai si omukpahọ no udu nọ Ọghẹnẹ o te fiobọhọ kẹ omai. Ẹzi ọfuafo Ọghẹnẹ ọ sai fiobọhọ kẹ omai wo emamọ uruemu. Fikiere, ukpenọ mai ọvo ma rẹ daoma whaha omukpahọ, u fo nọ ma rẹ rẹroso Ọghẹnẹ kẹ obufihọ. Nọ ma te ru ere, ma te jọ wọhọ Pọl ukọ na nọ ọ ta nọ: “Evaọ eware kpobi, me bi wo ẹgba ẹkwoma ọnọ ọ be kẹ omẹ ogaga.” (Ahwo Filipai 4:13) Yọ ma te sae ta nọ: “Obọ Jihova obufihọ mẹ u re no ze.”—Olezi 121:2.

Oware nọ Whọ rẹ Sai Ru:

“Jihova o fiobọhọ kẹ omẹ siọ ozighi ba, jẹ be rria dhedhẹ kugbe amọfa.”—WALDO

Lẹ se Jihova jẹ yare iẹe re ọ kẹ owhẹ ẹzi ọfuafo riẹ. (Luk 11:13) Yare Jihova re o fiobọhọ kẹ owhẹ wo emamọ uruemu. Wuhrẹ oware nọ Ebaibol na ọ ta kpahe emamọ iruemu nọ e rẹ sai fiobọhọ kẹ owhẹ siọ omukpahọ no udu wọhọ, uyoyou, udhedhẹ, odiri, gbe oma-onyẹ. Hae daoma dhesẹ iruemu nana kẹdẹ kẹdẹ evaọ uzuazọ ra. Jẹ daoma mu usu kugbe ahwo nọ a bi dhesẹ iruemu nana. Ahwo otiọnana a “sae wọ [owhẹ] dhesẹ uyoyou je ru iruo iwoma.”—Ahwo Hibru 10:24; ẹme-oruvẹ.

Iku Uzuazọ—WALDO

Ọ Sae Siọ Ozighi avọ Omukpahọ Ba

Akpọ ọ jọ gaga kẹ ọzae jọ nọ a re se Waldo evaọ oke nọ ọ jẹ rro ze, fikiere ọ tẹ vọ avọ omukpahọ. Ọ ta nọ: “Ẹsibuobu me re lele ahwo nọ a rẹ zẹ imu-egaga họre evaọ edhere . . . Evaọ ẹdẹ jọ, utu ugbarugba ọfa jọ o tẹ haya ohwo jọ nọ o re kpe ahwo re ọ nyaze ti kpe omẹ no, rekọ mẹ sae dhẹ vabọ avọ oware nọ o ro duwu omẹ.”

Nọ Isẹri Jihova a mu aye Waldo Ebaibol na họ ewuhrẹ, eva e were riẹ vievie he. Ọ ta nọ: “Me mukpahe Isẹri Jihova, yọ ẹsibuobu mẹ rẹ la ae eka. Rekọ a rẹ kpahe ẹme kẹ omẹ dhedhẹ ẹsikpobi.”

Uwhremu na, Waldo o te mu Ebaibol na họ ewuhrẹ. Ọ ta nọ: “O jọ bẹbẹ kẹ omẹ re me ru eware nọ me bi wuhrẹ na. Me je roro nọ mẹ te sae kpọ ofu mẹ jẹ siọ ozighi ba ha.” Rekọ oware jọ nọ o wuhrẹ evaọ Ebaibol na o fiobọhọ kẹe.

Waldo ọ ta nọ: “Evaọ ẹdẹ jọ, ohwo nọ o bi wuhrẹ omẹ Ebaibol na nọ a re se Alejandro ọ ta kẹ omẹ nọ me se obe Ahwo Galesha 5:22, 23. . . . Alejandro ọ tẹ ta nọ orọnikọ ẹgba obọmẹ mẹ sai ro wo emamọ iruemu nana ha, rekọ ẹkwoma ẹgba ẹzi ọfuafo Ọghẹnẹ. Onana u fiobọhọ kẹ omẹ ruẹ nọ mẹ sai gine nwene!”

Fikinọ Waldo ọ rẹroso Ọghẹnẹ kẹ obufihọ, ọ sae siọ ozighi gbe omukpahọ ba riẹriẹriẹ evaọ uzuazọ riẹ. Ọ ta nọ: “Nọ imoni mẹ gbe egbẹnyusu mẹ a tẹ ruẹ omẹ, akpọ o re gbe ae unu inọ mẹ sai nwene.” Ọ ta re nọ: “Jihova o fiobọhọ kẹ omẹ siọ ozighi ba, jẹ be rria dhedhẹ kugbe amọfa.”