EPANỌ MA SAE RỌ WHAHA OMUKPAHỌ

3 | Si Omukpahọ No Udu ra

Ebaibol na Ọ Ta Nọ:

“Wha nwene oghẹrẹ ohwo nọ wha rrọ ẹkwoma iroro rai nọ wha re nwene, re wha sai ru omarai wo imuẹro kpahe oware nọ o rrọ oreva Ọghẹnẹ nọ u woma, nọ ọ rẹ jẹrehọ, jẹ rrọ gbagba.”—AHWO ROM 12:2.

Oware nọ Onana U Dhesẹ:

Eware nọ ma re roro kpahe i wuzou gaga evaọ aro Ọghẹnẹ. (Jerimaya 17:10) Dede nọ u fo nọ ma rẹ whaha eme hayo eware nọ i re dhesẹ nọ ma mukpahe amọfa, oyena ọvo u te he. Obọ udu gbe iroro mai omukpahọ o re muhọ no ze. Fikiere u wuzou gaga re ma si iroro omukpahọ no udu mai riẹriẹriẹ. Nọ ma te ru ere, ẹsiẹe ma sai gine ro “nwene” jẹ whaha omukpahọ.

Oware nọ Whọ rẹ Sai Ru:

Hai muẹrohọ oghẹrẹ nọ who bi rri amọfa gbe oware nọ whọ be hai roro kpahe ai, maero kọ ahwo nọ a wo ovioma ọfa hayo ahwo orẹwho ọfa. Nọ omara nọ: ‘Ẹvẹ mẹ be hai rri rai? Kọ eware nọ mẹ riẹ kpahe ae eye e be lẹliẹ omẹ rri rai oghẹrẹ nọ me bi rri rai na? Manikọ fiki omagbẹre mẹ be hai ro rri rai ere?’ Ofariẹ, kẹnoma kẹ eware itanẹte, ifimu gbe eware arozaha nọ a be jọ dhesẹ eware ozighi gbe omukpahọ.

Ẹme Ọghẹnẹ ọ rẹ sai fiobọhọ kẹ omai whaha omukpahọ evaọ udu gbe iroro mai

O rẹ nwane lọhọ tere ẹsikpobi hi re ma kiẹ omamai riwi jẹ rọwo nọ iroro mai i fo ho. Rekọ Ẹme Ọghẹnẹ ọ rẹ sai fiobọhọ kẹ omai “kiẹ iroro gbe ẹjiroro udu na via.” (Ahwo Hibru 4:12) Fikiere hai se Ebaibol na. Hae rọ eware nọ Ebaibol na ọ ta kiẹ iroro ra riwi, re whọ daoma ruẹ nọ eware nọ who bi roro kpahe e rẹ were Ọghẹnẹ. Ẹme Ọghẹnẹ ọ rẹ sai fiobọhọ kẹ omai whaha iroro omukpahọ nọ e make “dowọ muotọ gaga” no evaọ udu gbe iroro mai.—2 Ahwo Kọrint 10:4, 5.

Iku Uzuazọ—STEPHEN

O Nwene Oghẹrẹ nọ O je Rri Eware

Stephen avọ ahwo uviuwou riẹ a rẹriẹ ovao dhe omukpahọ evaọ obọ ahwo iyibo. Fiki onana, o te kuomagbe utu jọ nọ o rẹ họre kẹ ahwo re egọmeti ọ sae kẹ ae eware nọ a gwọlọ. Nọ oke o be nyaharo na, o te je ru eware nọ e wọso izi egọmeti fiki omukpahọ nọ o jọ udu riẹ. Stephen ọ ta nọ: “Evaọ ẹdẹ jọ, mẹ avọ egbẹnyusu mẹ ma tẹ nyai rri ifimu nọ a te jọ dhesẹ epanọ a je ro gboja kẹ ahwo Africa nọ e jọ erigbo evaọ United States. Fikinọ eware okienyẹ nọ ma ruẹ na e kẹ omai uye gaga, ma tẹ nwani mu izoge nọ e rrọ ahwo iyibo evaọ oria ugheriwo na họ ẹhọre. Kẹsena ma te kpohọ okegbe nọ ahwo iyibo a be rria, re ma họre ohwo kpobi nọ ma ruẹ.”

Oghẹrẹ nọ Stephen o je rri eware u nwene nọ Isẹri Jihova a mu ei Ebaibol na họ ewuhrẹ. Ọ ta nọ: “Fikinọ mẹ rọ ẹro ruẹ eware omohẹriẹ gaga no, eware nọ mẹ jẹ ruẹ evaọ udevie Isẹri Jihova i je gbe omẹ unu ọvo. Wọhọ oriruo, nọ ohwo oyibo jọ nọ ọ rrọ Osẹri Jihova o je kpohọ erẹ evaọ orẹwho ọfa, ọ nyasiọ emọ riẹ ba kẹ uviuwou ahwo obiebi jọ re a rẹrote ai. Ofariẹ, uviuwou ahwo oyibo jọ a rọwo nọ uzoge jọ nọ ọ rrọ ohwo obiebi, o lele ai rria.” Stephen ọ ruẹ vevẹ nọ Isẹri Jihova a wọhọ ahwo uviuwou ọvo nọ i you ohwohwo evaọ akpọ na soso, wọhọ epanọ Jesu ọ ta nọ o te jọ evaọ udevie Ileleikristi uzẹme.—Jọn 13:35.

Eme o fiobọhọ kẹ Stephen siọ ozighi ba je si omukpahọ no udu? Eme nọ e rrọ obe Ahwo Rom 12:2 na i fiobọhọ kẹe. Ọ ta nọ: “Ẹmẹrera na mẹ tẹ ruẹ nọ u fo nọ me re nwene iroro mẹ. O gwọlọ nọ me re nwene oghẹrẹ ohwo nọ mẹ rrọ re mẹ sae rria dhedhẹ kugbe amọfa, je rri uzuazọ nana wọhọ uzuazọ nọ o mai woma.” O vrẹ ikpe 40 no nọ Stephen o bi ro yeri uzuazọ riẹ dhedhẹ ababọ omukpahọ.