1 | Olẹ—“Wha Gbolo Awaọruọ Rai Kpobi Kẹe”

EBAIBOL NA Ọ TA NỌ: “Wha gbolo awaọruọ rai kpobi [kẹ Ọghẹnẹ], keme ọ be daezọ rai.”—1 PITA 5:7.

Oware nọ Onana U Dhesẹ

Jihova o bi zizie omai inọ ma ta eware kpobi nọ e be kẹ omai uye gbe eware nọ e be lẹliẹ omai ruawa kẹe. (Olezi 55:22) Ma sae lẹ kpahe ẹbẹbẹ kpobi, te ọ rrọ ruaro te ọ rrọ kakao. O tẹ rrọ oware nọ u wuzou kẹ omai, riẹ nọ u wuzou kẹ Jihova re. Nọ ma tẹ lẹ se Jihova kpahe ẹbẹbẹ mai, udu u re te omai otọ.—Ahwo Filipai 4:6, 7.

Oghẹrẹ nọ Olẹ O Sai ro Fiobọhọ

Nọ ẹyao iroro ọ tẹ be kẹ omai uye, ma sai roro nọ ohwo ọvo ọ be daezọ mai hi. Yọ orọnikọ ẹsikpobi amọfa a rẹ nwane riẹ epanọ ẹyao na ọ be kẹ omai uye te he. (Itẹ 14:10) Rekọ nọ ma tẹ lẹ se Jihova kpahe ẹbẹbẹ mai, ọ rẹ gaviezọ kẹ omai jẹ riẹ epanọ ẹbẹbẹ na o be kẹ omai uye te. Jihova ọ riẹ eware nọ e be da omai gbe eware nọ e be kẹ omai uye, yọ ọ gwọlọ nọ ma lẹ sei kpahe oware kpobi nọ o be lẹliẹ omai ruawa.—2 Iruẹru-Ivie 6:29, 30.

Nọ ma tẹ lẹ se Jihova, u re dhesẹ nọ ma gine fievahọ iẹe inọ ọ be daezọ mai. O sae jọ omai oma wọhọ epanọ o jọ kẹ ọso-ilezi na. Ọ lẹ nọ: “Whọ ruẹ oja-oriọ mẹ no; whọ riẹ idhọvẹ egaga mẹ.” (Olezi 31:7) Ma tẹ riẹ nọ Jihova ọ riẹ eware nọ e be kẹ omai uye, onana ọvo dede u re fiobọhọ kẹ omai thihakọ. Yọ orọnikọ Jihova ọ riẹ ebẹbẹ mai ọvo ho. Ọ riẹ epanọ e be kẹ omai uye te vi omọfa kpobi, yọ ọ rẹ rọ ẹme riẹ Ebaibol na sasa omai oma jẹ tuduhọ omai awọ.

Epanọ Ebaibol na O bi ro Fiobọhọ kẹ Julian

Mẹ rẹ Ruawa Gaga

“Mẹ be mọ ẹyao jọ nọ a re se obsessive-compulsive disorder (OCD). Ẹyao nana ọ rẹ lẹliẹ omẹ roro iroro jẹ ruawa gaga. Ẹyao na o re mu kọ ze gheghe gheghe. Oma o tẹ be make riẹ omẹ ru obọnana, taure me te ti rri hi, awaọruọ ọ ze no. Mẹ rẹ mae ruawa nọ mẹ tẹ rrọ kugbe ahwo. Mẹ rẹ ruawa gaga kpahe oghẹrẹ nọ a bi rri omẹ.

“Ahwo nọ a riẹ kpahe oware nọ o be kẹ omẹ uye na, a rẹ daoma fiobọhọ kẹ omẹ. Mẹ sae ta nọ orọnọ ẹsikpobi a rẹ nwane ta ẹme nọ ọ rẹ were omẹ hẹ. Rekọ eva e were omẹ nọ a be daoma fiobọhọ kẹ omẹ.

“Ẹsejọ mẹ rẹ ruawa ga te epanọ mẹ gbẹ sae rọ lẹ hẹ. Fikiere nọ mẹ tẹ be lẹ, mẹ rẹ gba omamẹ gaga re iroro mẹ e sae jọ oware nọ mẹ be lẹ kpahe na. Ẹsibuobu iroro mẹ e sae daji oware ọvo ho keme e rẹ dhẹ kpenẹ avọ enẹ. Nọ iroro i te bu omẹ uzou ga hrọ, o rẹ jọ bẹbẹ kẹ omẹ re mẹ riẹ epanọ mẹ sae rọ ta oware nọ o be kẹ omẹ uye kẹ Jihova.”

Epanọ Ebaibol na O bi ro Fiobọhọ kẹ Omẹ

“Mẹ jọ Ebaibol na wuhrẹ nọ olẹ o rẹ jọ thethei hayo gbagba taure Ọghẹnẹ o te ti yo ei hi. Ẹsejọ nọ mẹ gbẹ riẹ epanọ mẹ rẹ rọ ta oware nọ o rrọ omẹ udu evaọ olẹ hẹ, ẹme nọ mẹ rẹ ta ọvo họ: ‘Jihova, ivie fiobọhọ kẹ omẹ.’ Makọ evaọ oke yena, mẹ rẹ jọ oma mẹ riẹ nọ Jihova ọ riẹ oware nọ o rrọ omẹ iroro, yọ o re ru oware nọ mẹ gwọlọ na kẹ omẹ. U te no olẹ no, me kpohọ ọspito re. Mẹ sae ta nọ eware ivẹ nana i fiobọhọ kẹ omẹ gaga keme oma mẹ na u woma vi epaọ ọsosuọ no. Dede nọ o rrọ bẹbẹ kẹ omẹ re mẹ lẹ se Jihova, mẹ rẹ daoma lẹ sei ghele keme mẹ riẹ nọ o you omẹ, yọ ọ gwọlọ fiobọhọ kẹ omẹ.”