Enọ Ahwo Nọ A S’ebe

Fikieme Josẹf avọ Meri a rọ daji Bẹtlẹhẹm nọ a yẹ Jesu no ukpenọ a re zihe kpobọ Nazarẹt?

Ebaibol ọ vuẹ omai oware nọ o soriẹ ze dẹẹ hẹ. Rekọ ọ vuẹ omai eware jọ nọ o rẹ sae jọ nọ o wha riẹ ze.

Ukọ-odhiwu ọ vuẹ Meri nọ o ti dihọ o ve ti yẹ ọmọ jọ. Oke nọ ukọ-odhiwu na ọ rọ vuẹ Meri ẹme yena, Meri avọ Josẹf a jẹ rria Nazarẹt, nọ ọ jọ Galili. (Luk 1:26-31; 2:4) Uwhremu na a tẹ kwa kpobọ Ijipti. Nọ a no Ijipti ze no, a te zihe kpobọ Nazarẹt. Yọ obei Jesu ọ jọ whẹro, o te zihe ruọ ohwo Nazarẹt. (Mat. 2:19-23) Fikiere a tẹ fodẹ ẹwho Jesu, Josẹf, gbe Meri, Nazarẹt iroro mai e rẹ nwani kpohọ.

Omoni Meri jọ ọ jẹ rria obọ Juda, odẹ riẹ Ẹlizabẹt. Odẹ ọzae riẹ Zẹkaraya, ae a yẹ Jọn Ọhọahwo-Ame na. (Luk 1:5, 9, 13, 36) Nọ Meri ọ nyabru Ẹlizabẹt o te lele iei rria emerae esa. Kẹsena o te zihe ziọ obọ Nazarẹt. (Luk 1:39, 40, 56) Meri ọ tẹ rọ ere riẹ eria jọ evaọ obọ Juda.

Nọ u te oke jọ, egọmeti o te jie uzi nọ jọ ahwo kpobi a “nyai kere odẹ fihotọ” evaọ ọvuọ ẹwho riẹ. Josẹf ọ tẹ rehọ Meri, a te kpobọ Bẹtlẹhẹm nyai kere odẹ fihotọ. Bẹtlẹhẹm họ “okpẹwho Devidi,” yọ ẹwho yena a ruẹaro nọ a ti jo yẹ Mesaya na. (Luk 2:3, 4; 1 Sam. 17:15; 20:6; Mae. 5:2) Meri ọ tẹ jọ obei yẹ Jesu. Josẹf ọ riẹ nọ Meri ọ te sae zihe kpohọ ugbo obọ Nazarẹt he, nọ o yẹ obọ na. Fikiere a tẹ gbẹ jọ Bẹtlẹhẹm. No Bẹtlẹhẹm rite Jerusalẹm, u thabọ te oware wọhọ ikilomita izii, koyehọ enwenọ emaele ezeza. Fikiere a te nya ugbothabọ họ oke nọ a te wọ Jesu kpobọ etẹmpol re a dhe idhe nọ a re dhe nọ ohwo o te yẹ ọmọzae.—Izerẹ 12:2, 6-8; Luk 2:22-24.

Taure a te ti yẹ Jesu, ukọ-odhiwu ọ vuẹ Meri nọ ọmọ nọ o ti yẹ na ọ te keria “agbara-uvie Devidi” ọ vẹ te “jọ Ovie.” Kọ u gbe Josẹf avọ Meri unu inọ nwanọ okpẹwho Devidi a jo yẹ Jesu? (Luk 1:32, 33; 2:11, 17) Ẹsejọhọ a je roro nọ, ‘Nọ orọnọ eware na e nya enẹ no na, joma gbẹ rria Bẹtlẹhẹm bẹsenọ Ọghẹnẹ ọ rẹ vuẹ omai oware nọ ma re ru.’

Ma nwane riẹ epanọ a rria Bẹtlẹhẹm kri te no ho evaọ oke nọ ahwo nọ a re rri isi rọ gbẹva a rọ nyaze te ruẹ Jesu. Ebaibol ọ ta nọ, nọ ahwo na a nyaze yọ a kwa no oria nọ a jọ yẹ Jesu na kpohọ uwou jọ no. U te no ere no, oke yena a se Jesu, “ọmọ na” orọnọ ọmọboba na ha. (Mat. 2:11) Oghẹrẹ nọ iku na i do na, o wọhọ nọ a nwani zihe kpobọ Nazarẹt he nọ a yẹ Jesu no, a rria Bẹtlẹhẹm kri omojọ.

Nọ u te oke jọ, Herọd ọ tẹ ta nọ, jọ a “kpe emezae kpobi nọ e rrọ Bẹtlẹhẹm . . . kpobi no, no umuo ikpe ivẹ kpotọ.” (Mat. 2:16) Ọghẹnẹ ọ tẹ ta kẹ Josẹf avọ Meri inọ jọ a wọ ọmọ na dhẹ kpobọ Ijipti. Kọ obei a jọ bẹsenọ Herọd o ro whu. Rekọ nọ a je no obọ Ijipti ze, a zihe kpobọ Bẹtlẹhẹm hu. Fikieme? Keme oke yena Akẹleyọs ọmọ Herọd ọye o je su Judia, yọ ọ jọ eva gaga. Fikiere nọ Josẹf o ti rri oware na, yọ Ọghẹnẹ ọ vẹvẹ e riẹ unu no inọ o zihe kpohọ obei hi, ọ tẹ kwa uviuwou riẹ kpobọ Nazarẹt. Kọ obei a jọ romatotọ yọrọ Jesu je wuhrẹ iẹe ababọ ukpokpoma.—Mat. 2:19-22; 13:55; Luk 2:39, 52.

O wọhọ nọ Josẹf o whu no taure Jesu o te ti rovie uvẹ nọ a re ro kpobọ odhiwu kẹ ahwo. Fikiere o wọhọ nọ otọakpọ na a te kpare Josẹf ze. Yọ oke yena, ahwo buobu a te rọ ruẹ e riẹ. Yọ a ti wo uvẹ nọ a te rọ nọe oware nọ o soriẹ nọ avọ Meri a gbẹ rọ jọ Bẹtlẹhẹm nọ a yẹ Jesu no.