Oware nọ O Via

Hae Re Ohrọ Ahwo Kpobi

Ẹdẹ jọ oniọvo-ọmọtẹ jọ nọ ọ rrọ obọ New Zealand o rri ividio nọ uzoẹme riẹ o ta nọ “Wha ‘Wo Ọdawẹ kẹ Ohwohwo.’” A jọ ividio na ta nọ ohrọ ohwo o rẹ re Jihova yọ o re ru oware jọ ro fiobọhọ kẹ ohwo na. (Aiz. 63:7-9) Oniọvo na ọ tẹ ta nọ o re ru oware nọ a jọ ividio na ta na. Ẹdẹ yena nọ o kpobọ eki, ọ tẹ ruẹ aye jọ nọ o wo uwou nọ ọ rẹ rria ha. Ọ tẹ nọ aye na sọ ọ sae dẹ oware jọ sei nọ ọ rẹ re. Aye na ọ tẹ rọwo. Oniọvo na ọ tẹ dẹ oware sei. Ọ tẹ ta usi uwoma kẹe. Omobe ovẹvẹ nọ uzoẹme riẹ o ta nọ Kọ Uye-Oruẹ U ti Kuhọ Ẹdẹ Jọ? ọ rọ ta usi uwoma kẹe.

Aye na ọ tẹ kpare oviẹ. Ọ tẹ ta nọ ukoko na a jo yẹi. Rekọ o no ukoko na no anwọ ikpe buobu ze na. Ọ ta nọ anwọ oke jọ ze na, ọ be hae lẹ se Jihova re o fiobọhọ kẹe zihe ze. Oniọvo-ọmọtẹ na ọ tẹ kẹ aye na Ebaibol. Ọ tẹ vuẹe nọ ọ te hae nyai wuhrẹ iẹe Ebaibol.a

U fo re ma hae re ohrọ inievo ukoko na, imoni mai, gbe amọfa, ma ve je fiobọhọ kẹ ae. Ma te bi ru ere, kiyọ Jihova ma be rọ aro kele na. Yọ ma tẹ be hae ta usi uwoma kẹ ohwo nọ umuvẹ o tẹ nwani rovie, u re je dhesẹ nọ ma be re ohrọ ahwo re.