Jihova O bi Su Avọ Ohrọ
NO ANWAE ze, isu ahwo-akpọ buobu a rehọ evega su no nọ o wha uye-oruẹ se enọ e rọ otọ rai no. Rekọ, Jihova o dhesẹ ohẹriẹ nọ ọ salọ orẹwho jọ—Izrẹl—ọ tẹ rehọ ohrọ su ei.
Okenọ emọ Izrẹl a gbẹ jọ erigbo evaọ Ijipti anwae, Jihova o te yo oviẹ rai kẹ obufihọ. “Uye rai kpobi o bẹ riẹ. . . . Fiki uyoyou gbe ohrọoriọ riẹ ọ rọ ta ae no igbo.” (Aizaya 63:9) Jihova o siwi Izrẹl, ọ tẹ rehọ emu igbunu kẹ ai, ọ tẹ thọ ai ruọ ẹkwotọ obọ rai.
Okwakwa ohrọ Jihova u te je dhesẹ oma via evaọ izi nọ ọ rọ kẹ orẹwho onana. O j’uzi kẹ emọ Izrẹl nnọ a riohrọ emọ nọ i wo esẹ hẹ, eyae-uku, gbe erara. A rẹ rọ uye bẹ enọ e ko ho.
Uzi na o gwọlọ nọ a dhesẹ ohrọ kẹ enọ i wo ẹgwọlọ. Oyegbere ọ rẹ sae jọ udhu nọ a vu eware no koko emuore họ. A rẹ kpairoro vrẹ esa nọ a re no evaọ ukpe Ẹdijala (ukpe avọ ihrẹ). Etọ ukuoriọ nọ a zẹ kpobi a re zihe ai ze evaọ ukpe Eriosehọ (ukpe avọ 50). Ancient Israel—Its Life and Institutions o niyẹrẹ nọ: “Evaọ Izrẹl, epanọ omohẹriẹ o rọ nẹnẹ na o jariẹ hẹ.” “Evaọ emuhọ uzuazọ rai, emọ Izrẹl kpobi a jẹ reawere ute uzuazọ ovo na.”—Iruo-Izerẹ 25:10; Iziewariẹ 15:12-14; 24:17-22; 27:18.
Aruorokele Ohrọ Jihova
Ohrọ Ọghẹnẹ u duobọ te idibo riẹ. Wọhọ oriruo, no anwae ze, ivie ekpokpọ jọ a re kpe ahwo uviuwou ovie nọ ọ jariẹ vẹre na no. Rekọ Devidi odibo Jihova o ru onana ha. Okenọ Sọl Ovie na o whu no, Devidi ọ tẹ thọ Mẹfiboshẹt, ọmọ-oruọmọ gbe ọreuku Sọl nọ o kiọkọ. ‘Ovie na o te wo ohrọoriọ kẹ Mẹfiboshẹt, ọmọ Jonatan, ọmọ Sọl na.’—2 Samuẹle 21:7.
Ohwo-akpọ ọvuọvo nọ ọ raro kele ohrọ Jihova no te Jesu ọ rọ họ. Ohrọ Ọghẹnẹ o wọ riẹ ru eware igbunu riẹ buobu. Okejọ ọmoti jọ ọ lẹ riẹ nọ: “O tẹ ruọ owhẹ, whọ rẹ sai ru omẹ fua.” Ohrọ riẹ o tẹ re Jesu ọ tẹ r’obọ tei, ta nọ: “O ruọ omẹ, a ru owhẹ fo.” (Mak 1:40-42) Oke ọfa jọ ogbotu ologbo o je lele Jesu. Evaọ udevie ẹvohẹ na, Jesu ọ tẹ tẹrovi ezae ituaro ivẹ jọ nọ i bi bo nọ: “ ‘Olori, Ọmọ Devidi, ohrọ mai o re owhẹ.’ . . . Ohrọ o tẹ re Jesu, ọ tẹ rọ abọ te aro rai, a tẹ nwane ruẹ ude.”—Matiu 20:29-34.
Ogbotu obuobu ọ raha ohrọ Jesu kẹ amọfa ha. Fikinọ u kri no nọ a re mu, ọ tẹ ta evaọ okejọ nọ: ‘Ohrọ otu obuobu na o be re omẹ.’ Fikiere ọ tẹ rehọ edhere igbunu kuọ ai. (Mak 8:1-8) Okenọ Jesu o je no oria ruọ oria, orọnikọ o je wuhrẹ ogbotu ọvo ho rekọ o je muẹrohọ ẹgwọlọ rai re. (Matiu 9:35, 36) Okejọ nọ a nya wariẹ kpobi no ere, Jesu avọ ilele riẹ a wo uvẹ nọ a re ro serihọ tubẹ re emu hu. Ikere Ebaibol na o ta k’omai nọ: ‘Koyehọ a te bi okọ kpohọ oria nọ ohwo ọvo ọ rọ họ. Rekọ ahwo a tẹ rue rai nọ a jẹ nya vrẹ, ibuobu e tẹ riẹ kpahiẹe, ahwo ikpewho na kpobi a tẹ dhẹ owotọ kake rehọ ai te obei. Ọ nyaze ọ tẹ ruẹ otu obuobu na, ohrọ rai o tẹ riẹ e, keme a wọhọ igodẹ nọ i wo othuru hu; o te mu ai eware ibuobu họ ewuhrẹ.’—Mak 6:31-34.
Oware nọ o wọ Jesu orọnikọ eyao gbe uvuhu ahwo na ọvo ho rekọ eyero ẹzi rai. Isu rai a be rọ uye bẹ ai, fikiere “ohrọ rai o tẹ” re Jesu. Ẹme Griki nọ u dhesẹ nọ “ohrọ rai o tẹ riẹ e” u dhesẹ nọ “re a rọ ẹgwọlọ kẹ.” Jesu ọ ghinẹ jọ ọzae ohrọ!
Ohrọ Evaọ Akpọ Evega
Obọnana Jesu Kristi họ Ovie Uvie odhiwu Jihova. Wọhọ epanọ o ru evaọ Izrẹl anwae, Ọghẹnẹ ọ be rehọ ohrọ su ahwo riẹ nẹnẹ. “ ‘A rẹ te jọ emẹ,’ ere ỌNOWO ogbaẹmo na ọ tae, ‘a rẹ te jọ eghaghae mẹ evaọ ẹdẹ no mẹ rẹ te tha, mẹ rẹ te thọ ae.’ ”—Malakae 3:17.
Ahwo nọ a gwọlọ nọ ohrọ Jihova u re te ai obọ a rẹ raro kele idhere riẹ hrọ. Uzẹme, ma be rria akpọ nọ ahwo a jọ mai wo isiuru kpahe ẹyọrọ eyero uzuazọ rai vi obọ nọ a re fihọ kẹ ahwo nọ a wo ẹgwọlọ. Enọ i bi su a rẹ gwọlọ erere avọ ababọ eroro omokpokpọ iruiruo gbe enọ a bi ru eware na kẹ. Eva 2 Timoti 3:1-4, Ebaibol na o dhesẹ eyero oke mai na gbagba onọ o raha ohrọ no idu ahwo buobu no.
Ghele na, ma rẹ sae gwọlọ uvẹ nọ ma re ro dhesẹ ohrọ. Kọ ma sai fiobọhọ kẹ erivẹ mai? Kọ ohwo jọ ọ be mọ ọnọ ma sai weze bru? Kọ ma sae sasa enọ e rọ ọkora oma, rọwo kugbe ohrẹ nana: “Ta udu họ enọ udu u re bro awọ, wha fiobọhọ kẹ enọ e ko”?—1 Ahwo Tẹsalonika 5:14.
Ohrọ u re je fiobọhọ k’omai whaha evega okenọ oware o tẹ thọ amọfa obọ. A ta k’omai nọ: “Wha jọ ẹyayare kpobi, gbe ofu, gbe evaedha, gbe enuodo, gbe eme iyoma eta, i no owhai obọ, avọ iroro iyoma, wha rọ eva elọlọhọ lele ohwo ohwo yeri, ohwo ọ rọ vrẹ ohwo, wọhọ epanọ Ọghẹnẹ ọ rọ fiki Kristi vrẹ owhai na.”—Ahwo Ẹfẹsọs 4:31, 32.
Ohrọ u re fiobọhọ k’omai whaha ogaga nọ ma re ro ruiruo thọthọ. Ebaibol na ọ ta nọ: “Wha whẹ ọrẹri gbe eyowo họ oma, eva ehrọ, ọriẹruo, iroro idhedhẹ iwo, oma-urokpotọ, odiri.” (Ahwo Kọlọsi 3:12) Iroro idhedhẹ i re ru omai fi oma mai họ ẹta ahwo nọ ma bi su. Re a wo ohrọ u kugbe omarokpotọ avọ iroro ukpenọ o rẹ jọ bẹbẹ re a ru omai eva were. Ewoma-iruo o rẹ whae ze nọ a jẹ rehọ ahwo ruiruo wọhọ ekwakwa emashini hi. Ofariẹ, evaọ uviuwou ezae ohrọ a rẹ kareghẹhọ nọ eyae rai yọ ekwakwa ehẹhẹ. (1 Pita 3:7) Eroro kpahe oriruo ohrọ Jesu u re fiobọhọ k’omai evaọ enana kpobi.
Nọ ohrọ ahwo o re Jesu tere na evaọ odibọgba otọakpọ riẹ, u re mu omai ẹro nọ o gbe wo ohrọ obọnana, yọ ere ọ te gbẹ jọ, Osu ohrọ. Olezi 72 o jọ eruẹaruẹ ta kpahiẹe nọ: “Jọ ọ te thọ iyogbere eva evie ahwo na, re o ti siwi iruori, o ve ti kpe otu okienyẹ ehehẹhẹ! Jọ o su nọ abade te abade, je su ethẹ na ri duwu ọnyaba akpọ na! Ọ be re ohrọ eyẹlẹ gbe iruori, o te bi siwi uzuazọ iruori.”—Olezi 72:4, 8, 13.
Ẹme Ọghẹnẹ ọ ruẹaro nọ: “Ọ rẹte rehọ ẹrẹreokie guẹdhọ iwhrori, o veti bruoziẹ udhedhẹ kẹ enọ e rọ oma kpotọ, eva akpọ na. . . . O ve ti bruoziẹ uwhu kpe ahwo omuomu na.” Nọ o dhesẹ epanọ ahwo evega, enọ e wọhọ erao i ti nwene idhere rai no, eruẹaruẹ na e tẹ gbẹ nyaharo ta nọ: “Eva ugbehru ẹri mẹ na a te jọ ariẹ nwaoma hayo ekpe he, keme akpọ na ọ te vọ avọ eriariẹ ỌNOWO na wọhọ epanọ ame ọ vọ abade.” (Aizaya 11:4-9) Oware nọ eruẹaruẹ nana o be yaa họ ahwo ukoko akpọ soso e riẹ enọ e riẹ Jihova jẹ be raro kele idhere ohrọ riẹ!