Jọ “Wha Wo Ohrọ”
1. Eme ahwo a gwọlọ gaga nẹnẹ?
1 Enẹna ahwo a mae gwọlọ obufihọ. Iyero akpọ nọ i bi dhe eyeyoma e be wha uweri, gbe ọkora se ahwo buobu je bi ru ai roro nọ a kare ẹruore. Ima ahwo buobu a gwọlọ obufihọ, yọ mai Ileleikristi họ ahwo nọ a rẹ sai dhesẹ uvi ọdawẹ kẹ erivẹ mai. (Mat. 22:39; Gal. 6:10) Ẹvẹ ma sai ro dhesẹ ọdawẹ otiọye?
2. Edhere vẹ o mai woma nọ ma re ro dhesẹ ohrọ?
2 Iruo nọ I re Ru Omai Dhesẹ Ohrọ: Ọghẹnẹ ọvo họ ọnọ ọ rẹ kẹ uvi omosasọ nọ o rẹ tọ. (2 Kọr. 1:3, 4) Jihova ọ tuduhọ omai awọ inọ ma rọ aro kele iei “wo ohrọ,” ọ tẹ jẹ kẹ omai iruo nọ ma rẹ rọ vuẹ erivẹ mai usiuwoma Uvie na. (1 Pita 3:8) Ẹgba mai kpobi nọ ma re ro ru iruo nana họ edhere nọ o mai woma nọ ma rẹ rọ sasa “ahwo nọ a rọ uweli” oma, keme Uvie Ọghẹnẹ ọvo họ oware nọ u ti si ahwo-akpọ no uye-oruẹ. (Aiz. 61:1) Fiki ohrọ kẹ ahwo riẹ, kẹle na, Jihova o ti hwere emuemu no akpọ na, je ru akpọ na fihọ ọkpokpọ nọ ẹrẹreokie ọ te jọ.—2 Pita 3:13.
3. Ẹvẹ ma sai ro wo ọkpọ eriwo nọ Jesu o wo kpahe ahwo?
3 Wo Ọkpọ Eriwo nọ Jesu O Wo Kpahe Ahwo: Makọ okenọ Jesu ọ jẹ ta usiuwoma kẹ ogbotu ahwo, orọnikọ o je rri rai wọhọ ogbotu ọvo ho. O rri rai wọhọ ahwo sa-sa nọ i wo ẹgwọlọ abọ-ẹzi. A jọ wọhọ igodẹ nọ i wo othuru-igodẹ hẹ. Oware nọ Jesu ọ ruẹ u duobọtei udu, ọ tẹ rehọ odiri wuhrẹ ai. (Mak 6:34) Ma te wo ọkpọ eriwo Jesu na, o te wọ omai dhesẹ uvi ohrọ kẹ omomọvo ahwo nọ ma nyaku. Onana u ti dhesẹ oma via evaọ uvou ẹmeọta gbe ovao mai. Iruo usiuwoma ota na ma te rọ karo, ma vẹ te jẹ kpọ eme mai rri oware nọ o be kẹ ahwo uye.—1 Kọr. 9:19-23.
4. Fikieme ma jẹ ruabọhọ dhesẹ ohrọ?
4 Ogbotu ahwo buobu no erẹwho kpobi ze a bi kurẹriẹ fiki ovuẹ Uvie na gbe uvi isiuru nọ a dhesẹ kpahe ae. Nọ ma be ruabọhọ dhesẹ ohrọ na, ma te wha orro se Jihova, Ọghẹnẹ ohrọ-ọriọ mai na je ru ei eva were.—Kọl. 3:12.