Oware nọ O Lẹliẹ Omai Rri Erọvrẹ Jihova Ruaro

1-2. Ẹvẹ mai ahwo-akpọ ma rọ wọhọ ọmọzae nọ a kẹ oriruo riẹ evaọ edhe-ẹme ọsosuọ na?

JOMA kẹ oriruo ọmọzae jọ nọ ọsẹgboni riẹ a fe gaga. Ẹdẹ jọ, ọsẹgboni riẹ a te wo asidẹnte, a te whu. Oware na o da ọmọzae na gaga. Rekọ oware ofa o riẹ nọ o da riẹ gaga. Nọ o fi ezọ hotọ, o te yo nọ ọsẹgboni riẹ a je mu igho raha, yọ a re esa vọ uzou. Fikiere ukpenọ ọmọzae na ọ reuku efe ọsẹgboni riẹ, kọ esa a whu seba kẹe nọ ọ be te hwa. Ahwo nọ ọsẹgboni riẹ a re esa rai na a be nyaze ti ye esa na. Yọ u wo oghẹrẹ ọvo nọ ọ sae rọ hwa esa na ha keme igho na i bu wo umuo ho.

² Mai ahwo-akpọ ma wọhọ ọmọzae yena. Ọsẹgboni ọsosuọ mai, Adamu avọ Ivi a jọ gbagba, yọ a jẹ rria aparadase nọ o woma gaga. (Emu. 1:27; 2:7-9) O hae jọ nọ a yoẹme kẹ Ọghẹnẹ, a hai ti yeri emamọ akpọ vrẹ ọvo, yọ a hai ti whu hu. Rekọ o gbẹ via ere he. Fikinọ a yoẹme he, a te le ae no aparadase nọ a jọ na. A gbẹ sae rria bẹdẹ bẹdẹ hẹ. Kọ eme emọ rai a te rọ reuku? Ebaibol ọ ta nọ: “Wọhọ epanọ uzioraha o rọ ẹkwoma omọvo [koyehọ Adamu] ruọ akpọ na, uwhu u je no uzioraha ze na, ere uwhu u ro te ahwo kpobi oma keme aikpobi a raha uzi no.” (Rom 5:12) Uzioraha họ uku Adamu nọ mai emọ riẹ ma be re, gbe uwhu nọ u no uzioraha ze na. Uzioraha na o wọhọ osa nọ u bu gaga nọ ma sae hwa ha.—Ol. 49:8.

3. Fikieme izieraha mai e rọ wọhọ “osoriọ”?

³ Jesu o se izieraha “osoriọ.” (Mat. 6:12; Luk 11:4) Nọ ma tẹ raha uzi Jihova, o rẹ wọhọ ẹsenọ ma re osa riẹ. Yọ u fo nọ ma rẹ hwa osa na. Ma gbẹ sae hwa osa na ha, koyehọ uwhu ọvo ma sae rọ hwae.—Rom 6:7, 23.

4. (a) Ababọ nọ Ọghẹnẹ o fiobọhọ kẹ omai, eme o rẹ via kẹ omai fikinọ mai kpobi erahaizi? (Olezi 49:7-9) (b) Nọ a tẹ fodẹ uzioraha evaọ Ebaibol, eme u dhesẹ? (Rri ẹkpẹti na “Uzioraha.”)

⁴ Kọ ma te sai wo eware nọ Adamu avọ Ivi a wo vẹre taure a tẹ te raha uzi na? Ma sae rọ ẹgba obọmai wo ai hi. (Se Olezi 49:7-9.) Mai ọvo ma sai ru re akpọ mai o woma evaọ obaro ho, hayo re ma wo ẹruore ẹkparomatha ha. Uwhu mai o hae te wọhọ orọ erao. Ma hai whu no, yọ u re no ye.—Ọtausi. 3:19; 2 Pita 2:12.

5. Eme Ọsẹ oyoyou mai o ru re o ro fiobọhọ kẹ omai fiki osa uzioraha nọ ma re na? (Rri uwoho nọ o rrọ uke Uwou-Eroro na.)

⁵ Joma wariẹ ta ẹme kpahe ọmọzae oke ẹsiẹ nọ ma rọ kẹ oriruo na. Otẹrọnọ ohwo jọ ọ nyaze inọ ọ rẹ hwa esa na kpobi noi uzou, eva e gbẹ te were iẹe? Eva e te were iẹe gaga inọ ohwo jọ ọ gwọlọ hwa esa na, yọ ọ te rọwo nọ o fiobọhọ kẹe. Ere ọvona re, Ọsẹ oyoyou mai Jihova ọ kẹ omai okẹ jọ nọ ma sae rọ hwa osa uzioraha nọ ma reuku riẹ mi Adamu na. Nọ Jesu ọ jẹ ta ẹme kpahe okẹ nana, ọ ta nọ: “Ọghẹnẹ o you akpọ na gaga te epanọ o ro siobọno Ọmọ ọvo riẹ, re ohwo kpobi nọ o fi ẹrọwọ họ iẹe o gbe whu hu rekọ o ve wo uzuazọ ebẹdẹ bẹdẹ.” (Jọn 3:16) Okẹ nana nọ Jihova ọ kẹ omai na u re je ru nọ ma rẹ rọ jọ egbẹnyusu ekpekpe riẹ.

6. Eme jọ vẹ e rrọ Ebaibol nọ ma te ta ẹme te evaọ uzoẹme nana, kọ eme o te lẹliẹ omai ru?

⁶ Ọghẹnẹ ọ kẹ omai obọdẹ okẹ nọ ọ be sae rọ rehọ “osoriọ” mai vrẹ omai. Kọ irere vẹ ma be jariẹ wo? U wo eme jọ nọ e rrọ Ebaibol nọ o lẹliẹ omai riẹ irere nọ okẹ nana o be lẹliẹ omai wo. Eme wọhọ ẹruẹrẹhọ kugbe, omavoro, idhe ẹruẹrẹhọ, ẹtanigbo, re a dẹ zihe ze, gbe ẹme wọhọ, a kuenu kẹ ohwo inọ o kiẹrẹe. Ma te jọ uzoẹme nana ta ẹme kpahe eme yena ọvuọvo. Nọ ma te fa otọ rai je roro didi kpahe ae na, ma te ruẹ oware nọ Jihova o ru re ọ sae rọvrẹ omai, yọ ma ti rri erọvrẹ riẹ ruaro.

OWARE NỌ JIHOVA Ọ GWỌLỌ HỌ RE MA RUẸRẸHỌ KUGBEI

7. (a) Eme ọfa Adamu avọ Ivi a raha kufiẹ? (b) Oware jọ vẹ o roja gaga nọ u fo nọ emọ Adamu avọ Ivi a re ru? (Ahwo Rom 5:10, 11)

⁷ Nọ Adamu avọ Ivi a raha uzi no, orọnikọ uzuazọ ebẹdẹ bẹdẹ ọvo oye u te rai obọ họ họ. Rekọ usu okpekpe nọ a wo kugbe Ọsẹ rai Jihova o tẹ jẹ raha no. Adamu avọ Ivi a jọ uviuwou Ọghẹnẹ vẹre taure a tẹ te raha uzi. (Luk 3:38) Rekọ nọ a raha uzi no, Ọghẹnẹ o te le ai no uviuwou riẹ no. Yọ a ri yẹ emọ oke yena ha. (Emu. 3:23, 24; 4:1) Fikiere, re mai emọ rai ma tẹ te jọ uviuwou Jihova, ma rẹ ruẹrẹhọ kugbe Jihova tao. (Se Ahwo Rom 5:10, 11.) Re ma ruẹrẹhọ kugbe Jihova, ma re ru epanọ ma rẹ rọ jọ egbẹnyusu ekpekpe riẹ. Obe jọ nọ o ta ẹme kpahe ẹme ẹruẹrẹhọ na, o ta nọ ẹme Griki nọ a fa nọ “ruẹrẹhọ kugbe” na, u dhesẹ epanọ who re “ru re ohwo nọ ọ rrọ ọwegrẹ ra o zihe ruọ ogbẹnyusu ra.” Whaọ Jihova họ ọnọ ọ kaki ru epanọ ma rẹ rọ ruẹrẹhọ kugbei. Oware riẹ u gbunu kẹhẹ! Eme o ru?

OWARE NỌ JIHOVA O RU HỌ, O RU EPANỌ A RE RO VORO OMAI OMA

8. (a) Eme họ omavoro? (b) Eme họ ẹruẹrẹhọ kugbe?

⁸ Jihova o ru epanọ o re ro voro omai oma re mai ahwo-akpọ erahaizi, ma sae jọ egbẹnyusu ekpekpe riẹ. Omavoro họ, epanọ a rẹ rehọ oware jọ nọ o ghare gaga ze re a sai kpairoro vrẹ oware jọ nọ u vru hayo nọ a raha. Oware nọ a te rehọ ze na o rẹ ghare te onọ u vru hayo nọ o raha na. Nọ a te ru ere, koyehọ a zihe oware nọ o raha na ze no. Evaọ Ebaibol na, a jọ ofẹ Ikereakere Griki Ileleikristi na ta ẹme jọ nọ otofa riẹ o tho “omavoro.” Oye họ ẹruẹrẹhọ kugbe. (Rom 3:25) Re a ruẹrẹhọ kugbe Ọghẹnẹ, u dhesẹ epanọ ohwo o re ru re Ọghẹnẹ ọ siọ ofu ba emu kẹe, ọ vẹ jọ ogbẹnyusu ọkpekpe riẹ.

9. Eme Jihova ọ vuẹ ahwo Izrẹl inọ a hai ru re ọ sae rọ izieraha rai vrẹ rai?

⁹ Jihova o ru oware jọ nọ o soriẹ ze nọ ahwo Izrẹl a rẹ rọ kẹle iẹe ziezi. Ọ vuẹ rai oware jọ nọ a rẹ hai ru re ọ sae rọ izieraha rai rọvrẹ rai. Ọghẹnẹ o fi ẹdẹ jọ họ kẹ ahwo Izrẹl nọ a jẹ hai ro voro oma. A jẹ hai ru oware yena ẹsiẹvo ẹgbukpe. A jẹ hai se ẹdẹ yena Ẹdẹ Omavoro. Ẹdẹ yena, ozerẹ okpehru na ọ rẹ rọ erao dhe idhe fiki izieraha ahwo na. Ma riẹ nọ erao nọ a ro dhe idhe i te oware nọ a rẹ rọ fiki rai rehọ izieraha ahwo vrẹ rai riẹriẹriẹ hẹ. O rrọ ere keme arao o te ohwo-akpọ họ. Rekọ nọ ahwo Izrẹl a te kurẹriẹ no izieraha rai, nọ a je dhe idhe nọ Ọghẹnẹ ọ ta kẹ ae nọ a dhe, Ọghẹnẹ ọ rẹ rọvrẹ rai. (Hib. 10:1-4) U te no ere no, omavoro na gbe idhe uzioraha nọ ahwo Izrẹl a jẹ hai dhe na o lẹliẹ e rai ruẹ nọ erahaizi a ginẹ rrọ. Yọ uzioraha yọ oware aroza ha evaọ aro Ọghẹnẹ. Fikiere a gwọlọ oware jọ nọ u re ru nọ Ọghẹnẹ ọ rẹ rọ rehọ izieraha rai rọvrẹ rai riẹriẹriẹ.

10. Eme Jihova o ru re ọ sae rehọ izieraha mai vrẹ omai riẹriẹriẹ?

¹⁰ Jihova o ru oware jọ nọ ọ rẹ rọ fiki riẹ rehọ izieraha mai vrẹ omai riẹriẹriẹ. O vi Ọmọ riẹ nọ o you gaga na ze re “ọ rọ omariẹ dhe idhe ẹsiẹvo rọkẹ oke kpobi re ọ wha izieraha ahwo buobu vrẹ.” (Hib. 9:28) Jesu o “siobọno uzuazọ riẹ rọkẹ ẹtanigbo ahwo buobu.” (Mat. 20:28) Kọ eme họ ẹtanigbo?

OSA NỌ A HWA HỌ IDHE ẸTANIGBO

11. (a) Nọ a tẹ fodẹ ẹtanigbo evaọ Ebaibol, eme u dhesẹ? (b) Ẹvẹ ohwo nọ ọ te hwa osa ẹtanigbo na ọ rẹ jọ?

¹¹ Nọ a tẹ ta ẹme te ẹtanigbo evaọ Ebaibol, otọ riẹ họ, osa nọ a hwa re a sai voro omai oma hayo re ma ruẹrẹhọ kugbe Ọghẹnẹ.a Jihova o rri idhe ẹtanigbo na inọ oye a sae rọ dẹ oware nọ Adamu ọ raha kufiẹ na zihe ze. Ẹvẹ o rọ rrọ ere? Kareghẹhọ nọ, nọ Adamu avọ Ivi a raha uzi no, a gbẹ jọ ahwo ọgbagba ha. Yọ a gbẹ sai wo uzuazọ ebẹdẹ bẹdẹ hẹ. Fikiere osa nọ a rẹ hwa re a sae ta omai no igbo o rẹ rro te oware nọ a kufiẹ na. (1 Tim. 2:6) Yọ ohwo nọ ọ rẹ sae hwa osa ẹtanigbo na ọ rẹ jọ ohwo nọ o te ọzae no. Ọ rẹ jọ gbagba, ababọ oruthọ, yọ ọ rẹ sae rria bẹdẹ bẹdẹ evaọ otọakpọ na. U re je no ohwo na eva ze inọ ọ rẹ kpairoro vrẹ uzuazọ ebẹdẹ bẹdẹ nọ ọ hai ti wo evaọ otọakpọ na, re o whu fiki mai. O te ru ere, koyehọ a rehọ e riẹ nwene uzou kẹ omai no, a tẹ rọ uzuazọ riẹ voro omai oma re ma sai wo oware nọ a kufiẹ na.

12. Fikieme Jesu o ro te ohwo nọ ọ rẹ hwa osa ẹtanigbo na?

¹² Rri eware esa jọ nọ o lẹliẹ omai riẹ nọ Jesu o gine te ohwo nọ ọ rẹ sae hwa osa ẹtanigbo na. Orọ ọsosuọ, ọ jọ ohwo ọgbagba, “ọ raha uzi ovo ho.” (1 Pita 2:22) Orọ avọ ivẹ, fikinọ ọ jọ ohwo ọgbagba na, ọ rẹ sae rria otọakpọ na bẹdẹ bẹdẹ. Orọ avọ esa, u no rie eva ze inọ o re whu re ọ rọ uzuazọ riẹ ta omai no igbo. (Hib. 10:9, 10) Fikinọ ọzae ọgbagba Jesu ọ jọ, ọ sae ginẹ hwa osa ẹtanigbo na keme epanọ ọzae ọsosuọ na, Adamu ọ jọ vẹre re ọ tẹ te raha uzi na, ere Jesu ọ jọ na. (1 Kọr. 15:45) Fikiere nọ Jesu o whu, uwhu riẹ na u te oware nọ a sae rọ hwa osa oware nọ Adamu ọ raha kufiẹ na. (Rom 5:19) Oyejabọ a ro se Jesu “Adamu urere na.” U du gwọlọ nọ ohwo ọgbagba ọfa o re je whu re a hwa osa oware nọ Adamu ọ raha na ha. Jesu o whu “ẹsiẹvo rọkẹ oke kpobi.”—Hib. 7:27; 10:12.

13. Ohẹriẹ vẹ o rrọ omavoro gbe idhe ẹtanigbo?

¹³ Kọ ohẹriẹ vẹ o rrọ omavoro gbe ẹtanigbo na? Omavoro họ oware nọ Ọghẹnẹ o ru re ahwo-akpọ a sae jọ egbẹnyusu ekpekpe riẹ. Rekọ ẹtanigbo na họ osa nọ a hwa re a sai voro ahwo-akpọ oma fiki izieraha rai. Yọ osa nọ a hwa na họ azẹ ọghaghae Jesu nọ o hwẹ fiki mai.—Ẹf. 1:7; Hib. 9:14.

IRERE NỌ I NO RIE ZE HỌ, A DẸ OMAI ZIHE ZE JẸ TA NỌ MA KIẸRẸE

14. Eme ma be te ta ẹme kpahe na, kọ eme o te lẹliẹ omai ruẹ?

¹⁴ Irere vẹ oma nọ a voro omai na o wha ze? U wo eme jọ nọ e rrọ Ebaibol nọ i dhesẹ irere nọ o wha ze. Otofa eme nana i tho ohwohwo. Rekọ a rọ ọvuọvo rai ta ẹme kpahe uzedhe oware jọ nọ omavoro na u ru kẹ omai, nọ o be lẹliẹ Jihova rọvrẹ omai. Nọ ma te ta ẹme kpahe eme yena, whọ te ruẹ irere nọ whẹ omara who bi wo no omavoro na ze.

15-16. (a) Nọ a jọ Ebaibol ta nọ a dẹ omai zihe ze na, eme a be ta na? (b) Ẹvẹ ma rri oware nọ Jihova avọ Jesu a ru kẹ omai na?

¹⁵ Nọ a jọ Ebaibol ta nọ a dẹ omai zihe ze na, u dhesẹ nọ a mu omai vẹre, rekọ a kẹ omai uvẹ inọ ma kpo fikinọ a hwa osa nọ a rẹ rọ ta omai no igbo no. Pita ukọ na ọ ta ẹme te oware nana. Ọ ta nọ: “Wha riẹ nọ orọnikọ eware nọ e rẹ raha, wọhọ isiliva hayo igoru, a ro si owhai no igbo edhere uzuazọ ufofe rai hi, onọ esẹ-esẹ rai a fihọ otọ kẹ owhai. Rekọ azẹ ọghaghae a ro siwi owhai, onọ o wọhọ orọ omogodẹ nọ ọ rrọ omakọkọ jẹ kare epe, orọ Kristi.” Ẹme Griki nọ a fa nọ “si owhai no igbo” na, otọ riẹ họ “a rọ ta owhai no igbo; a rọ dẹ owhai zihe.”—1 Pita 1:18, 19, ẹme-obotọ.

¹⁶ Idhe ẹtanigbo na u ru nọ ma ro wo uvẹ nọ ma re ro no igbo uzioraha gbe uwhu nọ u bi gboja kẹ omai nẹnẹ na. (Rom 5:21) U gine fo nọ ma re yere Jihova avọ Jesu gaga fiki oware nọ a ru kẹ omai na. Jesu ọ rọ uzuazọ oghaghae riẹ, koyehọ azẹ riẹ ta omai no igbo. O gbẹ rrọ Jihova avọ Jesu hu, ẹvẹ akpọ mai o hae te jọ?—1 Kọr. 15:22.

17-18. (a) A tẹ ta nọ a kuenu kẹ omai inọ ma kiẹrẹe, eme u dhesẹ? (b) Kọ irere vẹ ma ti wo noi ze?

¹⁷ Nọ a tẹ ta nọ a kuenu kẹ omai nọ ma kiẹrẹe, koyehọ eware nọ ma ru thọ vẹre i no omai uzou no, a kpairoro vrẹ izieraha mai no. Jihova o ru thọ họ nọ o ro kuenu kẹ omai inọ ma kiẹrẹe. Ma ta ere keme orọnikọ ọ faki kuenu kẹ omai nọ ma kiẹrẹe he ghelọ uzioraha mai. Uzioraha o rẹ were iẹe he. Yọ orọnọ fiki oware nọ ma ru o ro kuenu kẹ omai nọ ma kiẹrẹe he. Rekọ fikinọ o voro omai oma no, ọ tẹ hwa osa ẹtanigbo na no, yọ ma fi ẹrọwọ họ oware nọ o ru na. Kọ oware nọ ọ be rọ fiki riẹ kpairoro vrẹ izieraha mai na oye.—Rom 3:24; Gal. 2:16.

¹⁸ Kọ irere vẹ e te jariẹ te omai omomọvo? Ahwo nọ Ọghẹnẹ ọ salọ inọ a ti lele Jesu su evaọ obọ odhiwu na, o kuenu kẹ ae nọ a kiẹrẹe. Yọ a zihe ruọ emọ Ọghẹnẹ no. (Tait. 3:7; 1 Jọn 3:1) A rọ izieraha rai vrẹ rai no. Ọghẹnẹ o gbe bi rri rai nọ irumuomu a rrọ họ. Fikiere a sae ruọ Uvie na. (Rom 8:1, 2, 30) Ahwo nọ a wo ẹruore inọ a te rria otọakpọ na, a kuenu kẹ ae no re inọ a kiẹrẹe, yọ a sae jọ egbẹnyusu Ọghẹnẹ. A rehọ izieraha rai vrẹ rai no. (Jem. 2:21-23) Ogbotu obuobu na a te zọ evaọ ẹmo Amagidọn. Yọ a wo ẹruore inọ a ti gbe whu ofa ha. (Jọn 11:26) A te kpare “enọ i kiẹrẹe” gbe “enọ i kiẹrẹe he” ze. (Iruẹru 24:15; Jọn 5:28, 29) Ukuhọ riẹ, idibo Jihova kpobi nọ e te jọ otọakpọ na nọ i yoẹme a ve ti “wo ufuoma oruaro ọrọ emọ Ọghẹnẹ.” (Rom 8:21) Oghale riẹ o rro kẹhẹ nọ ma te rọ ginẹ jọ emọ Jihova Ọsẹ mai. Oke yena yọ ma ruẹrẹhọ kugbe Jihova ziezi no fikinọ o voro omai oma no. Jọ oke yena u te vẹrẹ!

19. Ẹvẹ uzuazọ mai u ro woma enẹna vi epanọ o hae te jọ vẹre? (Rri ẹkpẹti na re “Oghẹrẹ nọ A rọ Ta Omai No Igbo.”)

¹⁹ Okenọ Jesu o ri whu kẹ omai hi, ma jọ wọhọ ọmọzae nọ ma ta ẹme te ẹsiẹ na. Eware kpobi e raha ku ei, yọ a whu siọ esa ba kẹe nọ ọ rẹ sae hwa ha. Rekọ Jihova ọ tẹ dhogbo ze. O voro omai oma, ọ tẹ jẹ hwa osa ẹtanigbo na, fikiere uzuazọ mai u woma no. Ẹrọwọ nọ ma fihọ Jesu Kristi u te je ru nọ a rọ dẹ omai zihe ze, hayo siobọno omai re ma no igbo uzioraha gbe uwhu. Jihova o ru nọ a sae rọ rehọ izieraha mai vrẹ omai, o re gbe rri omai nọ mai irumuomu hu. Yọ onọ o mae rro họ, uvẹ u rovie kẹ omai nọ ma sai ro wo usu okpekpe kugbe Jihova Ọsẹ oyoyou obọ odhiwu mai na.

20. Eme ma te ta kpahe evaọ uzoẹme notha?

²⁰ Ma te roro didi kpahe oware nọ Jihova avọ Jesu a ru kẹ omai na, ma re yere Ọghẹnẹ gaga. (2 Kọr. 5:15) O gbẹ rrọ ae he, ma hai ti wo ẹruore vievie he. Rekọ nọ Jihova ọ tẹ rọvrẹ owhẹ no, eme o re ru? Ma te ta kpahe iẹe evaọ uzoẹme notha.