“Wha Salọ kẹ Omarai . . . Ọnọ Wha rẹ Gọ”

1. Eme u fo nọ ma re ru re eva e were omai ziezi, kọ fikieme? (Aizaya 48:17, 18)

JIHOVA Ọsẹ obọ odhiwu mai na o you omai gaga. Ọ gwọlọ nọ eva e were omai enẹna gbe evaọ obaro. (Ọtausi. 3:12, 13) Ọ ma omai avọ ereghẹ nọ ma re ro ru eware buobu. Rekọ ọ ma omai oghẹrẹ nọ ma sai ro su omamai hi. Ọ kẹ omai udu nọ ma rẹ rọ ta nọ onana họ onọ u woma hayo onọ u yoma ha. (Ọtausi. 8:9; Jeri. 10:23) Jihova ọ riẹ nọ ma tẹ be gọe je bi ru oware nọ o rẹ were iẹe, ẹsiẹe eva e rẹ mae were omai.—Se Aizaya 48:17, 18.

2. Eme Setan ọ gwọlọ nọ ma roro, kọ eme Jihova o ru re ma riẹ nọ oware nọ Setan ọ ta na ọrue?

² Setan ọ gwọlọ nọ ma roro nọ mai ọvo ma sai su omamai. Ọ gwọlọ nọ ma roro nọ ma gbẹ maki yoẹme kẹ Jihova ha, akpọ mai o re woma, yọ eva e rẹ were omai. (Emu. 3:4, 5) Jihova ọ kẹ ahwo-akpọ uvẹ re a su omarai rite oke jọ, re a riẹ sọ a sai gine su omarai ziezi. Whaọ oja u su te omai ẹro no, ma ruẹ epanọ esu nọ ohwo-akpọ o bi su omariẹ na u yoma te no. Rekọ ma rẹ jọ Ebaibol ruẹ iriruo ezae gbe eyae nọ e gọ Jihova, nọ eva e were. Ọnọ ọ karo evaọ usu rai kpobi họ Jesu Kristi. Fikiere joma ta ẹme kpahe oware nọ Jesu ọ rọ ta nọ ọ rẹ gọ Jihova. Ma vẹ te jẹ ta kpahe oware nọ u ro fo nọ ma gọ Ọsẹ obọ odhiwu mai na. Evaọ obọ ekuhọ uzoẹme na, ma vẹ te ta kpahe eware jọ nọ e lẹliẹ omai ta nọ Jihova ma rẹ gọ.

OWARE NỌ JESU Ọ RỌ TA NỌ Ọ RẸ GỌ JIHOVA

3. Eme Setan ọ ta nọ ọ te kẹ Jesu, kọ eme Jesu ọ ta?

³ Okenọ Jesu ọ jọ otọakpọ, ọ riẹ nọ u fo re ọ gọ Jihova, yọ oware nọ o ru oye. Nọ ọ họ-ame no, Setan ọ tẹ vuẹe nọ ọ te rehọ ekwotọ-ivie akpọ na kpobi kẹe, otẹrọnọ ọ gọ riẹ ẹsiẹvo ọvo. Rekọ Jesu ọ tẹ ta kẹe nọ: “Nyavrẹ, Setan! Keme a kere nọ: ‘Jihova Ọghẹnẹ ra o gba owhẹ họ nọ whọ rẹ gọ, yọ ọye ọvo o gba owhẹ họ nọ who re ru iruo ọrẹri kẹ.’” (Mat. 4:8-10) Kọ fikieme Jesu ọ rọ ta nọ Jihova ọ rẹ gọ? Joma ta ẹme te eware jọ nọ e wha riẹ ze.

4-5. Fikieme Jesu ọ rọ ta nọ Jihova ọ rẹ gọ?

⁴ Oware nọ o mae whae ze nọ Jesu ọ rọ ta nọ Jihova ọ rẹ gọ họ, o you Jihova Ọsẹ riẹ na no eva riẹ kpobi ze. (Jọn 14:31) Oware ofa nọ o wha riẹ ze họ, ọ riẹ nọ Jihova u gine fo nọ a rẹ gọ. (Jọn 8:28, 29; Evia. 4:11) Ọ riẹ nọ Jihova ọye ọ ma eware kpobi, ọ tẹ jẹ rrọ Ọghẹnẹ nọ a re fievahọ. Oye ovo ho, Jihova ọ kẹ omai eware iwoma buobu. (Ol. 33:4; 36:9; Jem. 1:17) Jesu ọ tẹ jẹ riẹ nọ uzẹme ọvo Jihova ọ rẹ ta, o ri gu ọrue kẹe ẹdẹvo ho. Yọ ọye ọ kẹ riẹ eware kpobi nọ o wo na. (Jọn 1:14) Rekọ Setan ọye o ru nọ ma bi ro whu. Setan yọ ọtọrue, yọ epanọ o re ro si fihọ ẹkpa riẹ ọvo ọ be gwọlọ. (Jọn 8:44) Jesu ọ riẹ ere, oyejabọ nọ ọ gbẹ rọ aro kele Setan wọso Jihova vievie he na. O tube roro kpahe iẹe kabikọ eru dede he.—Fil. 2:5-8.

⁵ Oware ofa nọ o wha riẹ ze nọ Jesu ọ rọ ta nọ Jihova ọ rẹ gọ họ, o je roro kpahe emamọ eware nọ i ti noi ze otẹrọnọ ọ gọ Jihova te urere. (Hib. 12:2) Yọ ọ riẹ re nọ o te thihakọ, u ti ru odẹ Ọsẹ riẹ fo, o vẹ te whae ze nọ uye nọ Ẹdhọ ọ so fihotọ kpobi u ti ro notọ.

OWARE NỌ U RO FO NỌ JIHOVA MA RẸ GỌ

6-7. Fikieme ahwo buobu nẹnẹ a gbẹ be gọ Jihova ha, rekọ fikieme u ro fo re ma gọ Jihova?

⁶ Ahwo buobu a be gọ Jihova ha keme a re riẹ epanọ Ọghẹnẹ o woma te he, yọ a riẹ nọ o ru eware buobu kẹ ae no ho. Ere ahwo Athẹns a jọ re okenọ Pọl ukọ na ọ nyae ta usi uwoma kẹ ae.—Iruẹru 17:19, 20, 30, 34.

⁷ Pọl ọ ta kẹ ahwo Athẹns nọ Ọghẹnẹ ọ “kẹ ahwo kpobi uzuazọ gbe ẹwẹ gbe eware kpobi.” Ọ tẹ jẹ ta nọ: “Ọye o ru nọ ma ro wo uzuazọ, be nya jẹ be rria.” Ọghẹnẹ ọye ọ ma eware kpobi. Ọye “ọ ma ahwo erẹwho na kpobi no oma ọzae ọvo ze.” Fikiere u fo nọ ma rẹ ginẹ gọe.—Iruẹru 17:25, 26, 28.

8. Eme Jihova o re ru vievie he, kọ eme o ru?

⁸ Nọ orọnọ Jihova ọye ọ ma omai, ọ tẹ jẹ rrọ Osu nọ ọ mai kpehru evaọ idhiwu gbe akpọ na, ọ sae gba ahwo họ inọ a gọe. Rekọ Jihova o re ru ere vievie he. Ukpenọ ọ gba omai họ, ọ kẹ omai eware buobu nọ e rẹ lẹliẹ omai riẹ nọ ọ rrọ uzuazọ, yọ o you omai kpobi na ọvuọvo. Ọ tubẹ gwọlọ nọ, otẹrọnọ o rẹ lọhọ, ahwo kpobi a jọ egbẹnyusu riẹ bẹdẹ bẹdẹ. (1 Tim. 2:3, 4) Oyejabọ Jihova o ro wuhrẹ omai re ma nyae vuẹ ahwo emamọ eware nọ o ti ru kẹ ahwo-akpọ. (Mat. 10:11-13; 28:19, 20) Fikinọ Jihova o you omai, ọ ghale omai fihọ ikoko sa-sa, ọ tẹ jẹ kẹ omai ekpako nọ i you omai re a rẹrote omai.—Iruẹru 20:28.

9. Ẹvẹ Jihova o ro dhesẹ nọ o you omai?

⁹ Jihova o you ohwo-akpọ gaga. O bi ru emamọ eware kẹ ahwo nọ a be daezọ riẹ dede he. No anwọ emuhọ akpọ na ze, ahwo buobu a bi ru oware nọ Ọghẹnẹ ọ ta ha, orọ udu rai a bi ru. O make rrọ ere na, Jihova ọ be kẹ ae uvo gbe oso, gbe eware efa. Yọ a be re omaweromẹ eware nọ Ọghẹnẹ ọ ma. (Mat. 5:44, 45; Iruẹru 14:16, 17) Ọ ma ahwo-akpọ re a sai wo emamọ egbẹnyusu gbe uviuwou, jẹ re erere iruo abọ rai. Ahwo nọ a be gọ Ọghẹnẹ hẹ a be re omaweromẹ eware nana re. (Ol. 127:3; Ọtausi. 2:24) Enana kpobi i dhesẹ nọ Ọsẹ obọ odhiwu mai na o you ohwo kpobi. (Ọny. 34:6) Obọnana ma te ta ẹme kpahe eware jọ nọ e wha riẹ ze nọ ma rọ ta nọ Jihova ma rẹ gọ, gbe epanọ o bi ro fiobọhọ kẹ omai.

OWARE NỌ O LẸLIẸ OMAI TA NỌ JIHOVA MA RẸ GỌ

10. (a) Eme o be mae lẹliẹ omai gọ Jihova? (Matiu 22:37) (b) Erere vẹ o te owhẹ no fikinọ Jihova o wo odiri? (Olezi 103:13, 14)

¹⁰ Oware nọ o lẹliẹ Jesu ta nọ Jihova ọ rẹ gọ họ, o you Jihova gaga. Ere omai re. (Se Matiu 22:37.) Oghẹrẹ ohwo nọ Jihova ọ rrọ o be lẹliẹ omai si kẹle iẹe. Joma ta ẹme kpahe emamọ uruemu jọ nọ o wo. Oye họ odiri. Nọ ahwo Izrẹl a je dhesẹ uzou ogaga, ọ lẹ rai nọ: “Ivie, wha kuomarẹriẹ no idhere iyoma rai.” (Jeri. 18:11) Jihova ọ rẹ kareghẹhọ ẹsikpobi nọ mai yọ ẹkpẹ gheghe, ma gba ha. (Se Olezi 103:13, 14.) Kinọ who bi roro kpahe odiri Jihova gbe emamọ iruemu riẹ efa na, whọ gbẹ gwọlọ nọ whọ rẹ gọe bẹdẹ bẹdẹ?

11. Eware efa jọ vẹ e lẹliẹ omai ta nọ ma rẹ gọ Ọsẹ obọ odhiwu mai na?

¹¹ Ma ta nọ ma rẹ gọ Jihova keme ma riẹ nọ oware nọ u fo eruo oye. (Mat. 4:10) Ma tẹ jẹ riẹ nọ ma tẹ gọ Jihova te urere, emamọ oware u ti noi ze. U ti ru odẹ Jihova fo. U ti dhesẹ nọ Setan yọ ọtọrue. O vẹ te lẹliẹ eva were Ọsẹ mai. Yọ ma tẹ ta nọ Jihova ma rẹ gọ enẹna, ọ te kẹ omai uvẹ nọ ma rẹ rọ gọe bẹdẹ bẹdẹ.—Jọn 17:3.

12-13. Eme ma wuhrẹ no iku Jane avọ Pam ze?

¹² Ma make maha kẹhẹ, ma rẹ sai you Jihova no eva mai kpobi ze. Nọ ma be rro na, yọ uyoyou na o be ga. Ere o jọ kẹ inievo ivẹ jọ nọ a re se Jane avọ Pam.a Jane ọ jọ ikpe ikpegbọvo (11) yọ Pam ọ jọ ikpe ikpe. Ọsẹgboni rai a kẹ Isẹri Jihova uvẹ nọ a wuhrẹ aimava na Ebaibol, thakpinọ a rẹ hai lele ai kpohọ ichọche koka koka. Rekọ ọsẹgboni na omarai a rọwo nọ a re wuhrẹ hẹ. Jane ọ ta nọ: “Eware nọ Isẹri Jihova a wuhrẹ omẹ i fiobọhọ kẹ omẹ nọ me gbe je kuomagbe ehwa mẹ lọ imu egaga je gbe-ọfariẹ hẹ.”

¹³ Nọ ikpe jọ e te vrẹ no, emetẹ ivẹ na a te zihe ruọ iwhowho-uvie. Nọ u te oria jọ, a te mu ọkobaro oke-kpobi họ, evaọ oke ovona yọ a be rẹrote ọsẹgboni rai nọ a who no. Jane ọ ta nọ, nọ o rri eware nọ e vrẹ no, o wuhrẹ oware jọ, anọ: “Mẹ ruẹ nọ Jihova ọ rẹ rẹrote egbẹnyusu riẹ kpobi, yọ wọhọ epanọ 2 Timoti 2:19 o ta, ‘Jihova ọ riẹ enọ e rrọ eriẹ.’” Ẹme yena uzẹme. Jihova ọ rẹ rọ idibo riẹ nọ i you rie zaro ho!

14. Ẹvẹ ẹme gbe uruemu mai u re ro dhesẹ nọ ma gwọlọ nọ a raha odẹ Jihova ha? (Rri iwoho na re.)

¹⁴ Ma gwọlọ dhesẹ kẹ ahwo kpobi nọ eme jọ nọ a be ta kpahe Jihova na erue. Ma rehọ iẹe nọ, who wo ogbẹnyusu ọkpekpe jọ. Ogbẹnyusu ra na ọ rrọ wowou gaga, ọ riẹ epanọ a re ru ọghọ, yọ who te ru ei thọ, ọ rẹ rọvrẹ owhẹ. Ẹdẹ jọ ohwo jọ ọ tẹ be ta nọ ogbẹnyusu ra na ọ rrọ eva gaga, yọ ọ rẹ wha ahwo re. Kọ eva e te were owhẹ? Ijo, whọ te thọ othọ ogbẹnyusu ra na. Ere ọvona re, Setan avọ ahwo nọ ọ viẹ họ no, a bi gu erue fihọ Ọghẹnẹ uzou. Kọ eme u fo nọ ma re ru? Ma rẹ vuẹ ahwo oghẹrẹ ohwo nọ Jihova ọ ginẹ rrọ, je dhesẹ kẹ ae vevẹ nọ ọ rrọ epanọ a bi rri rie na ha. (Ol. 34:1; Aiz. 43:10) Jọ eme mai gbe uruemu mai i dhesẹ nọ ma gwọlọ rọ eva mai kpobi gọ Jihova.

15. Erere vẹ o te Pọl fikinọ ọ nyasiọ eware nọ e jariẹ oja ba re ọ sae gọ Jihova? (Ahwo Filipai 3:7, 8)

¹⁵ Ma rẹ kpairoro vrẹ eware nọ e sae whaha omai nọ ma gbẹ gọ Jihova ha, gbe eware nọ i re ru nọ ma gbe wo uvẹ gọ Jihova ziezi hi. Ere Pọl ukọ na o ru. O no ọkwa nọ ọ jẹ lẹliẹ ahwo ẹwho riẹ kẹe adhẹẹ. O te kuomagbe Ileleikristi jẹ gọ Jihova. (Gal. 1:14) Oware nana nọ o ru na, o wha riẹ ze nọ o ro yeri emamọ uzuazọ nọ o lẹliẹ eva were iẹe, uvẹ nọ o re ro lele Kristi su evaọ obọ odhiwu u te je tei obọ. O da riẹ ẹdẹvo ho inọ ọ nyasiọ eware jọ ba re ọ gọ Jihova. Yọ o te da omai gbe he inọ ma kpairoro vrẹ eware jọ re ma sae gọ Jihova ziezi.—Se Ahwo Filipai 3:7, 8.

16. Eme ma wuhrẹ no iku Julia ze? (Rri iwoho na re.)

¹⁶ Otẹrọnọ Jihova nọ ma rẹ gọ o mae rrọ omai oja, eva e te were omai enẹna gbe evaọ obaro. Joma ta kpahe oniọvo-ọmọtẹ jọ nọ a re se Julia. Taure o te ti kurẹriẹ ziọ ukoko na, ọ jọ ikuaya ichọche jọ. No emaha ze ọ rọ jọ ikuaya na. Ọgba-ile jọ o muẹrohọ nọ Julia o wo uvou ole. O te sei re o wuhrẹ iẹe epanọ a rẹ so ile. Ọ tẹ te nyaharo gaga evaọ iruo ile na, te epanọ ọ jẹ hae rọ so evaọ eria nọ ahwo buobu a kokohọ. A tẹ te riẹe gaga. Nọ u te oria jọ o te kpohọ isukulu ilogbo jọ nọ a re jo wuhrẹ epanọ a re kporo ile. Ẹdẹ jọ ọmọ eklase riẹ jọ ọ tẹ jẹ ta ẹme kẹe kpahe Ọghẹnẹ. O te wuhrẹ iẹe nọ Ọghẹnẹ o wo odẹ, odẹ riẹ Jihova. U kri hi, a te mu Julia Ebaibol họ ewuhrẹ, yọ isiava a jẹ hai wuhrẹ iẹe evaọ oka. Nọ u te oria jọ ọ tẹ jiroro nọ ọ rẹ gọ Jihova, ọ tẹ nyasiọ ile ba. Rekọ epanọ ma nwane rọ unu tae na, ere o lọhọ te ha. Julia ọ ta nọ: “Ahwo buobu a jẹ ta kẹ omẹ nọ, ‘Emamọ okẹ yena nọ who wo na who bi kufiẹ na.’ Rekọ mẹ daezọ eyena kpobi hi, keme mẹ gwọlọ gọ Jihova ziezi.” Anwọ oke yena ze na, o vrẹ ikpe ọgba no nọ ọ be rọ gọ Jihova. Kọ ẹvẹ o rri iroro yena nọ ọ jẹ na? Ọ ta nọ: “Eva e be were omẹ, yọ me fi eva mẹ kpobi họ Jihova inọ o ti ru eware kpobi nọ mẹ gwọlọ kẹ omẹ evaọ obaro.”—Ol. 145:16.

GBẸ HAE GỌ JIHOVA

17. Nọ ma riẹ nọ oke o gbẹ riẹ hẹ na, eme te omai enọ e be gọ Jihova te enọ e be gọe he a re ru obọnana?

¹⁷ Ma be ta ẹme na, oke o gbẹ riẹ hẹ. Pọl ukọ na o kere nọ: “Keme ‘omoke kakao gheghe’ u kiọkọ, yọ ‘ọnọ ọ be nyaze na ọ te ze, ọ te raha oke he.’” (Hib. 10:37) Kinọ ma riẹ ere no na, eme ma re ru? Enẹna ma rẹ rọ jiroro inọ Jihova ma rẹ gọ keme oke nọ u kiọkọ u gbe tulo ho. (1 Kọr. 7:29) Yọ otẹrọnọ ma mu Ọghẹnẹ họ ẹgọ no, ma re thihakọ ẹbẹbẹ kpobi nọ o te omai re ma gbẹ gọ Ọghẹnẹ vrẹ, keme ma riẹ nọ “omoke kakao gheghe” u kiọkọ re ebẹbẹ na kpobi i kuhọ.

18. Eme Jesu avọ Jihova a gwọlọ nọ ma ru?

¹⁸ Jesu ọ ta kẹ ilele riẹ nọ a lele iei ẹsikpobi, orọnikọ a mu rie họ elele no họ ẹme na ha. (Mat. 16:24) Fikiere otẹrọnọ ma gọ Jihova te ikpe buobu no, jọ o bẹ omai no ho. Ma rẹ daoma gaga re ma gọ Jihova vrẹ ọvo. O lọhọ họ, rekọ eghale buobu i ti te omai, yọ makọ enẹna dede, o rẹ lẹliẹ eva were omai.—Ol. 35:27.

19. Eme ma wuhrẹ no iku Gene ze?

¹⁹ Ahwo jọ a re roro nọ ohwo ọ tẹ be gọ Jihova, yọ ọ be rọ ifi gba omariẹ. Anọ ohwo riẹ ọ sai ru eware nọ e rẹ lẹliẹ eva were iẹe he. Otẹrọnọ whọ gbẹ maha, kọ who bi roro nọ whọ tẹ ta nọ whọ rẹ gọ Jihova, whọ te rọ ifi gba omara? Oniọvo-ọmọzae jọ nọ a re se Gene ọ ta nọ: “Me je roro nọ ukoko Isẹri Jihova nọ mẹ rrọ na, izi riẹ i keke hrọ, mẹ be sae reakpọ kuoma epanọ ehwa mẹ a be reakpọ kuoma ha. Mẹ sai kpohọ epati hi, mẹ sai lele ọmọtẹ hẹ, mẹ sae fa igemu ozighi hi, oke kpobi ewuhrẹ gbe usi uwoma ọvo.” Kọ eme iroro nana nọ Gene o wo na o lẹliẹ e riẹ ru? Ọ ta nọ: “Me te mu uzuazọ nọ u fo ho họ eyeri, owọ mẹ jọ ọ rrọ ukoko na, yọ owọ mẹ jọ o rrọ obọ akpọ. Nọ me mu ei họ obọ, oma o jẹ were omẹ. Rekọ u kri hi, eva e gbẹ jẹ were omẹ hẹ. Mẹ tẹ te kareghẹhọ eware nọ mẹ jọ Ebaibol wuhrẹ. Mẹ tẹ jiroro nọ mẹ rẹ siọ uzuazọ yena ba re mẹ rọ eva mẹ kpobi gọ Jihova. Anwọ oke yena ze, me muẹrohọ nọ Jihova o bi yo olẹ mẹ gaga.”

20. Eme u fo nọ ma re gbe ru vrẹ ọvo?

²⁰ Ọso-ilezi jọ ọ so nọ: “Jọ eva e were ohwo nọ whọ salọ je si te oma re ọ rria ighẹ ra.” (Ol. 65:4) Joma jọ wọhọ Joshua nọ ọ ta nọ: “Rọkẹ omẹ avọ ahwo uwou mẹ, Jihova ma rẹ gọ.”—Jos. 24:15.