UZOẸME UWUHRẸ 23
OLE AVỌ 2 Jihova Họ Odẹ Ra
Epanọ Odẹ Jihova U Wuzou kẹ Omai Te
“‛Whai họ isẹri mẹ,’ ere Jihova ọ ta.”—AIZ. 43:10.
OWARE NỌ A JARIẸ TA KPAHE
Oware nọ ma re ru re ma ru odẹ Jihova fo je dhesẹ nọ eme nọ Ẹdhọ ọ ta kpahe iẹe na yọ erue.
1-2. Eme o lẹliẹ omai riẹ nọ odẹ Jihova o jọ Jesu oja gaga?
JESU ọ rehọ odẹ Jihova zaro vievie he. Ọye họ ohwo nọ ọ mai ru odẹ Ọsẹ riẹ fo kpobi no. Wọhọ epanọ ma ta evaọ uzoẹme nọ o vrẹ na, Jesu ọ rọwo nọ o re whu re ọ sai ru odẹ Jihova fo je dhesẹ nọ eware kpobi nọ Jihova o bi ru i kiehọ. (Mak 14:36; Hib. 10:7-9) Nọ Jesu o te su odu-ikpe no, o ti no isuẹsu na kẹ Ọsẹ riẹ re odẹ Jihova o sae jọ fuafo. (1 Kọr. 15:26-28) Eware nọ Jesu o ru gbe eme nọ ọ ta e lẹliẹ ahwo riẹ oghẹrẹ nọ ọ kẹle Ọsẹ riẹ te. I dhesẹ nọ o you Ọsẹ riẹ, yọ ọ gwọlọ nọ oware ovo u gbe odẹ Ọsẹ riẹ ku hu.
2 Nọ Jesu ọ ziọ otọakpọ, odẹ Ọsẹ riẹ ọ rọ nyaze. (Jọn 5:43; 12:13) O wuhrẹ ilele riẹ odẹ Ọsẹ riẹ. (Jọn 17:6, 26) Odẹ Ọsẹ riẹ o je ro wuhrẹ ahwo je ru iruo igbunu. (Jọn 10:25) Jesu ọ lẹ se Jihova nọ jọ ọ sẹro ilele riẹ ‘fiki odẹ riẹ.’ (Jọn 17:11) Otẹrọnọ odẹ Jihova o jọ Jesu oja tere, kọ ohwo ọ sae ta nọ ọyomariẹ olele Kristi yọ ọ riẹ odẹ Ọsẹ Jesu hu, hayo ọ riẹ odẹ na rekọ o re sei hi?
3. Eme ma te ta kpahe evaọ uzoẹme nana?
3 Mai Ileleikristi, ithihi Jesu ma re lele. Epanọ odẹ Ọsẹ na o jọ Jesu oja na, ere o rẹ jọ omai oja re. (1 Pita 2:21) Uzoẹme nana o te lẹliẹ omai riẹ nọ odẹ Jihova a re ro vuhu ahwo nọ a be ta “usi uwoma Uvie na.” (Mat. 24:14) Ma te jẹ jariẹ wuhrẹ epanọ u fo nọ odẹ Ọghẹnẹ o rẹ jọ omai kpobi oja te.
JIHOVA Ọ “REHỌ AHWO KẸ ODẸ RIẸ”
4. (a) Taure Jesu o te ti zihe kpobọ odhiwu, eme ọ ta nọ ilele riẹ a ti ru? (b) Enọ vẹ ma sae nọ fiki iruo yena nọ ọ ta nọ a ti ru na?
4 Taure Jesu o te ti zihe kpobọ odhiwu, ọ ta kẹ ilele riẹ nọ: “Wha ti wo ogaga nọ ẹzi ọfuafo na o te bru owhai ze no, wha ve ti se isẹri kpahe omẹ evaọ Jerusalẹm, evaọ Judia soso gbe Sameria, je rite oria nọ o mai thabọ evaọ otọakpọ na.” (Iruẹru 1:8) Onana u dhesẹ nọ orọnikọ orẹwho Izrẹl ọvo a te jọ ta usi uwoma na ha. Rekọ a te tae kẹ ahwo erẹwho otọakpọ na kpobi re ahwo erẹwho efa a sae jọ ilele Jesu re. (Mat. 28:19, 20) Nọ Jesu ọ ta nọ ilele riẹ a ‘ti se isẹri kpahe ọyomariẹ’ na, kọ a ti wuhrẹ amọfa odẹ Ọghẹnẹ re, binikọ nwanọ odẹ Jesu na ọvo a ti se isẹri kpahe? Iku nọ e rrọ obe Iruẹru Ikọ izou 15 o lẹliẹ omai riẹ uyo onọ yena.
5. Eme ikọ gbe ekpako nọ e jọ Jerusalẹm a ta kpahe odẹ Jihova? (Rri uwoho na re.)
5 Evaọ ukpe 49 C.E., ikọ gbe ekpako nọ e jọ Jerusalẹm, a gba ẹgwae kpahe ẹme oyawo, sọ u fo re ahwo nọ a rrọ ahwo Ju hu nọ a kurẹriẹ ze a yawo taure a tẹ te kẹ ae uvẹ nọ a jọ Ileleikristi. Okenọ a je ku ẹme na họ, Jemis oniọvo Jesu ọ tẹ ta nọ: “Simiọn (koyehọ Pita) ọ romatotọ gbiku kẹ omai no kpahe orọ ọsosuọ nọ Ọghẹnẹ ọ rọ rẹriẹ ovao rri erẹwho na re ọ jọ udevie rai rehọ ahwo kẹ odẹ riẹ.” Odẹ vẹ Jemis ọ be ta na? O fi ẹme jọ nọ Emọs ọruẹaro na ọ ta ba ẹme na inọ: “Re ahwo nọ a kiọkọ a sae rọ eva rai kpobi gwọlọ Jihova, te ai te ahwo erẹwho na kpobi, ahwo nọ a rọ odẹ mẹ se, ere Jihova ọ ta.” (Iruẹru 15:14-18) Ẹme yena o dhesẹ nọ a ti wuhrẹ ilele ekpokpọ na odẹ Ọghẹnẹ, yọ a te ‘rọ odẹ na se ai.’ Koyehọ, uzedhe odẹ Ọghẹnẹ a te rọ riẹ ae, odẹ na a te hai ro vuhu ai.
Nọ ikọ gbe ekpako na a jẹ gba ẹgwae, a ruẹ nọ u fo re a rọ odẹ Ọghẹnẹ se Ileleikristi (Rri edhe-ẹme avọ 5)
6-7. (a) Fikieme Jesu ọ rọ ziọ otọakpọ na? (b) Eme ọfa ọ mai wuzou nọ ọ rọ fiki riẹ nyaze?
6 Otọ odẹ Jesu họ “Jihova Họ Esiwo.” Yọ ọye Jihova o vi ze re ohwo kpobi nọ o fi ẹrọwo họ iẹe, o wo esiwo. Jesu ọ nyaze ti whu kẹ ahwo-akpọ re a sai wo esiwo. (Mat. 20:28) Ọ rehọ uzuazọ riẹ ta omai no igbo re ma sai wo uzuazọ ebẹdẹ bẹdẹ.—Jọn 3:16.
7 Fikieme a ro vi Jesu ze ti siwi omai? Fiki oware nọ o via evaọ ọgbọ Idẹn a ro vi ei ze. Ma jọ uzoẹme nọ o vrẹ na ta nọ ọsẹgboni ọsosuọ mai Adamu avọ Ivi a keke aro fihọ raha uzi Ọghẹnẹ. O tẹ whae ze nọ te ai te emọ rai a gbe wo uzuazọ ebẹdẹ bẹdẹ hẹ. (Emu. 3:6, 24) Rekọ u wo oware ofa jọ nọ o rro vi uzuazọ ebẹdẹ bẹdẹ nọ Jesu ọ rọ fiki riẹ nyaze. Oye họ odẹ Jihova nọ a raha. (Emu. 3:4, 5) Fikiere, re emọ Adamu avọ Ivi a sai wo esiwo, a rẹ kaki ru odẹ Jihova fo tao. Jesu họ ohwo nọ Jihova o vi ze ti ru oware nọ o mai wuzou re odẹ riẹ o sae fo. Fikiere odẹ Jihova o jariẹ uzou.
Kọ ohwo ọ sae ta nọ ọye olele Kristi yọ ọ riẹ odẹ Ọsẹ Jesu hu, hayo ọ riẹ odẹ na rekọ o re sei hi?
8. Eme u fo nọ ahwo kpobi nọ a fi ẹrọwọ họ Jesu a rẹ riẹ?
8 Ahwo kpobi nọ a fi ẹrọwọ họ Jesu, te a rrọ ahwo Ju, te a rrọ ahwo erẹwho efa, u wuzou gaga re a riẹ oria nọ esiwo na o bi ti gine no ze te ai obọ, koyehọ Jihova Ọghẹnẹ nọ ọ rrọ Ọsẹ Jesu na. (Jọn 17:3) U te no ere no, u fo nọ a rẹ rọ odẹ Jihova riẹ ae wọhọ epanọ a rehọ odẹ na riẹ Jesu na. A rẹ jẹ riẹ nọ u wuzou gaga re a ru odẹ na fo, keme a gbe ru ei fo ho, a sai wo esiwo ho. (Iruẹru 2:21, 22) Fikiere ilele Jesu kpobi a re wuhrẹ kpahe Jihova gbe Jesu. Oyejabọ okenọ Jesu o je ku olẹ nọ ọ lẹ evaọ Jọn izou 17 na họ, ọ tẹ ta nọ: “Me dhesẹ odẹ ra via kẹ ae no yọ me ti gbe dhesẹ iẹe via, re a ruẹsi dhesẹ oghẹrẹ uyoyou nọ who wo kẹ omẹ na, mẹ vẹ jọ usu kugbe ae.”—Jọn 17:26.
“WHAI HỌ ISẸRI MẸ”
9. Eme o rẹ mae jọ omai oja, kọ ẹvẹ ma re ro dhesẹ nọ oware nọ o mae rrọ omai oja oye?
9 Ohwo kpobi nọ ọ ginẹ rrọ olele Jesu, oware nọ o rẹ mae jariẹ oja họ, re o ru odẹ Jihova fo. (Mat. 6:9, 10) Ọ rẹ riẹ nọ odẹ Jihova ọ rro vi odẹ ofa kpobi. Yọ ọ rẹ rọ uruemu riẹ dhesẹ iẹe. Kọ ẹvẹ ma sai ro ru odẹ Jihova fo, je ru re ahwo a riẹ nọ eme nọ Setan ọ ta kpahe Jihova na kpobi erue?
10. Oghẹrẹ ẹdhọ okọto vẹ a ta ẹme kpahe evaọ Aizaya izou 42 rite 44? (Aizaya 43:9; 44:7-9) (Rri uwoho na re.)
10 A jọ obe Aizaya izou 42 rite 44 ta ẹme te epanọ u wuzou te re ma ru odẹ Jihova fo. A ta ẹme na wọhọ ẹdhọ nọ a bi gu evaọ okọto, yọ enọ a tu ẹdhọ na họ eghẹnẹ nọ ahwo a be gọ. Jihova ọ ta nọ jọ ọghẹnẹ kpobi ọ nya lahwe re o dhesẹ oware nọ o kẹ riẹ udu nọ o ro se omariẹ Ọghẹnẹ. Ọ tẹ jẹ ta nọ jọ a rehọ isẹri rai ze. Rekọ ọvuọvo o vi uzou lahwe he!—Se Aizaya 43:9; 44:7-9.
Eware buobu e riẹ nọ i dhesẹ nọ a bi gu ẹdhọ jọ nọ o te omai re (Rri edhe-ẹme avọ 10-11)
11. Eme Jihova ọ ta kẹ ahwo riẹ evaọ Aizaya 43:10-12?
11 Se Aizaya 43:10-12. Jihova ọ tẹ ta kẹ ahwo riẹ nọ: “Whai họ isẹri mẹ, . . . yọ mẹ họ Ọghẹnẹ.” Ọ tẹ jẹ nọ ahwo riẹ nọ: “Kọ Ọghẹnẹ ọfa jọ ọ rrọ u te no omẹ no?” (Aiz. 44:8) Obọnana, mai họ ahwo nọ a rẹ sae kẹ uyo onọ yena. Te ẹme nọ ma be ta, te eware nọ ma bi ru ma sai ro dhesẹ nọ Jihova ọvo họ Ọghẹnẹ uzẹme na. Odẹ riẹ o rro vi edẹ efa kpobi. Joma gbẹ hae rọ ẹme gbe uruemu mai dhesẹ nọ ma you Jihova. Ẹdhọ ọ tẹ be make rọ ebẹbẹ fa omai ovao, joma gbẹ hai ru oware nọ u dhesẹ nọ ma you Jihova. Ma te bi ru ere, yọ ma bi ru odẹ Jihova fo.
12. Oghẹrẹ vẹ eruẹaruẹ nọ e rrọ Aizaya 40:3, 5 i ro rugba?
12 Ma te dikihẹ inọ a gbe ru odẹ Jihova fo ho oja ona, yọ ma be rọ aro kele Jesu Kristi. Aizaya ọ ruẹaro nọ ohwo jọ ọ te nyaze te “ruẹrẹ edhere Jihova kpahe!” (Aiz. 40:3) Kọ ẹvẹ eruẹaruẹ na i ro rugba? Jọn Ọhọahwo-Ame na ọye ọ ruẹrẹ edhere họ kẹ Jesu. U kri hi, Jesu ọ tẹ rọ odẹ Jihova nyaze, ọ tẹ jẹ rọ odẹ Jihova ta ẹme. (Mat. 3:3; Mak 1:2-4; Luk 3:3-6) U wo oware ofa jọ nọ Aizaya ọ ruẹaro nọ o te via. Anọ: “A ti dhesẹ oruaro Jihova via.” (Aiz 40:5) Kọ ẹvẹ o rọ via? Nọ Jesu ọ ziọ akpọ na, nwanọ oghẹrẹ nọ Jihova o re ru eware o je ru. O wọhọ ẹsenọ Jihova ọvo ọ nyaziọ otọakpọ na.—Jọn 12:45.
13. Eme o re dhesẹ nọ ma be rọ aro kele Jesu?
13 Epanọ Jesu o je se isẹri kẹ Jihova na, ere ma bi se isẹri kẹ Jihova re. Ma bi dhesẹ odẹ riẹ gbe emamọ eware nọ o bi ru kẹ ohwo kpobi nọ ma ruẹ. Re ma sai ru ei ziezi, ma re wuhrẹ ahwo epanọ Jesu o bi ro ru odẹ Jihova fo. (Iruẹru 1:8) Jesu họ Osẹri Jihova nọ ọ karo, ma te bi lele iei. (Evia. 1:5) Kọ eme ma re ru nọ u re dhesẹ nọ odẹ Jihova ọ rrọ omai kpobi na ọvuọvo oja?
EPANỌ MA RE RO DHESẸ NỌ ODẸ JIHOVA O RRỌ OMAI OJA
14. Wọhọ epanọ Olezi 105:3 o ta, ẹvẹ ma bi ru odẹ Jihova na?
14 Ma rẹ rọ odẹ Jihova seha. (Se Olezi 105:3.) Oma o rẹ were Jihova nọ ọ tẹ ruẹ nọ ma be rọ odẹ riẹ seha. (Jeri. 9:23, 24; 1 Kọr. 1:31; 2 Kọr. 10:17) Re ma “rehọ Jihova seha” u dhesẹ nọ ma be rehọ iẹe ya-oma inọ Ọghẹnẹ mai na yọ Ọghẹnẹ ologbo. Ma re rri rie nọ ọghọ ologbo a bru họ omai oma nọ a ro se omai ze re ma kẹe orro, je dhesẹ kẹ ahwo nọ Jihova o woma wo umuo ho. Jọ oma o vuọ omai hi re ma vuẹ ahwo nọ ma gbe bi ru iruo, emọ eklase mai, gbe ahwo nọ e be rria kẹle omai inọ mai yọ Isẹri Jihova. Ẹdhọ ọ gwọlọ nọ ma gbẹ ta ẹme kẹ ahwo kpahe odẹ Jihova ha. (Jeri. 11:21; Evia. 12:17) Setan avọ eruẹaro erue riẹ a gwọlọ nọ odẹ Jihova o thọrọ ahwo ẹro no. (Jeri. 23:26, 27) Rekọ odẹ na o be were omai oma, yọ o be lẹliẹ eva were omai “ẹsikpobi.”—Ol. 5:11; 89:16.
15. Eme u dhesẹ re a se odẹ Jihova?
15 Joma gbẹ hai se odẹ Jihova na. (Joẹl 2:32; Rom 10:13, 14) Nọ a ta nọ ma hai se odẹ Jihova na, kọ thakpinọ ma riẹ odẹ na no, kọ esese ọvo? Ere he. U fo nọ ma rẹ riẹ oghẹrẹ ohwo nọ ọ rrọ, ma ve je fievahọ iẹe. Ma rẹ rẹroso ẹe nọ o ti fiobọhọ kẹ omai. Ma vẹ jẹ rọwo nọ jọ ọ vuẹ omai oware nọ ma re ru. Ma rẹ vuẹ ahwo kpahe odẹ na gbe oghẹrẹ ohwo nọ Ọghẹnẹ ọ rrọ. Ma vẹ jẹ ta kẹ ae nọ jọ a kurẹriẹ re a ru oware nọ o rẹ were Jihova.—Aiz. 12:4; Iruẹru 2:21, 38.
16. Ẹvẹ ma sai ro dhesẹ Setan fihọ ọtọrue?
16 Ma rọwo nọ ma rẹ ruẹ uye dede fiki odẹ Jihova. (Jem. 5:10, 11) Ma te tilẹmu oreva Jihova dede nọ uye o be bẹ omai, yọ ma bi dhesẹ nọ Setan yọ ọtọrue. Evaọ oke Job, Setan ọ ta nọ: “Ohwo o re siobọno eware nọ o wo kpobi fiki uzuazọ riẹ.” (Job 2:4) Ẹme nọ Setan ọ be ta na họ, okenọ eware i te bi woma kẹ omai ọvo ma rẹ rọ gọ Jihova, uye o tẹ nwani te omai, ma dhẹ no. Rekọ dede nọ uye u te Job, o kru ẹrọwọ riẹ, o te dhesẹ Setan fihọ ọtọrue. Joma ru epọvo na re. Joma dhesẹ kẹ Setan nọ u wo oware ovo nọ o re ru nọ o rẹ lẹliẹ omai nyasiọ Jihova ba ha. Jọ u mu omai ẹro nọ Jihova ọ te sẹro mai fiki odẹ riẹ.—Jọn 17:11.
17. Oghẹrẹ ofa vẹ ma sae rọ wha orro se odẹ Jihova wọhọ epanọ 1 Pita 2:12 ọ ta?
17 Ma rẹ rọ adhẹẹ kẹ odẹ Jihova. (Itẹ 30:9; Jeri. 7:8-11) Fikinọ odẹ Jihova o rrọ omai uzou, yọ ma bi wuhrẹ ahwo kpahe Jihova, oware nọ ma ru o sae lẹliẹ ahwo jiri odẹ Jihova hayo la odẹ na eka. (Se 1 Pita 2:12.) Fikiere ma rẹ daoma gaga re oware kpobi nọ ma bi ru gbe ẹme kpobi nọ o bi no omai unu ze o jọ onọ a rẹ rọ fiki riẹ jiri odẹ Jihova. Ma tẹ ginẹ daoma, dede nọ ma gba ha, ma ti ru oware nọ o rẹ wha orro se odẹ Jihova.
18. Oghẹrẹ ofa vẹ ma sai ro dhesẹ nọ odẹ Jihova o rrọ omai oja gaga? (Rri ẹme-obotọ na re.)
18 Odẹ Jihova o rẹ jọ omai oja vi odẹ mai. (Ol. 138:2) Fikieme odẹ Jihova o rẹ rọ jọ omai oja vi odẹ mai? Keme ẹsejọ nọ ma te bi ru oware nọ o rẹ wha orro se odẹ Jihova, o sae raha odẹ mai hayo o sai ru nọ ahwo a rẹ rọ rehọ ekpehre ubiẹro rri omai.a Rekọ ma re ru ei ghele fikinọ odẹ Jihova o rrọ omai oja gaga. Epọvo na Jesu o ru. Ọ rọwo nọ o re whu uwhu omovuọ fiki epanọ odẹ Jihova o rro riẹ obọ te. Ọ daezọ họ inọ a se rie ekpehre ohwo. Ebaibol ọ ta nọ ọ “daezọ omovuọ họ,” koyehọ ọ daezọ epanọ ahwo a ti rri rie he. (Hib. 12:2-4) Oware nọ o jariẹ oja họ epanọ o re ro ru oreva Ọghẹnẹ.—Mat. 26:39.
19. Ẹvẹ who rri odẹ Jihova, kọ fikieme who ro rri rie ere?
19 Ma be rọ odẹ Jihova gọlọ. Ọghọ riẹ ọ rro kẹhẹ nọ a ro se omai Isẹri Jihova! Ahwo a tẹ be make la omai eka, ma re se eme rai gbe ọda ha. Epanọ ma rẹ rọ kpare odẹ Jihova kpehru oye o rrọ omai oja orọnikọ epanọ a re ro jiri omai hi. Fikiere, joma ta kẹ omamai nọ, epanọ Setan o kpokpo omai te kẹhẹ, ma ti gbe jiri odẹ Jihova. Ere ma sai ro dhesẹ nọ odẹ Jihova o rrọ omai oja gaga, wọhọ epanọ o jọ Jesu Kristi oja na.
OLE AVỌ 10 Jiri Jihova Ọghẹnẹ Mai!
a Makọ epanọ Job o wo ẹrọwọ te na, nọ ezae esa nọ e nyabru ei ze a ta ẹme oyoma kpahe iẹe, o te je roro kpahe omariẹ ga hrọ. Okenọ emọ riẹ a whu, gbe okenọ a tho erao riẹ je kpe idibo riẹ no, “Job ọ raha uzi hi, yọ ọ fuọ Ọghẹnẹ nọ o ru oware jọ thọ họ.” (Job 1:22; 2:10) Rekọ okenọ a sei ohwo omuomu o ro mu “eme izuehọ” họ ẹta. Kọ epanọ o re ro dhesẹ nọ ọye emamọ ohwo o mae jariẹ oja vi epanọ o re ro ru odẹ Ọghẹnẹ fo hayo dhesẹ nọ Ọghẹnẹ o ru oware ovo thọ họ.—Job 6:3; 13:4, 5; 32:2; 34:5.