Epanọ Odẹ Jihova U Wuzou kẹ Jesu Te

1-2. (a) Eme Jesu o ru evaọ aso urere nọ ọ rọ jọ kugbe ikọ riẹ na? (b) Enọ vẹ ma te kẹ iyo rai evaọ uzoẹme nana?

EVAỌ owọwọ Edene-Oka nọ o kiefihọ Nisan 14, evaọ ukpe 33 C.E., Jesu avọ ikọ riẹ nọ e talamu ei a kokohọ ubruwou obehru jọ. Oke u thabọ no, yọ okenọ a ti ro vivie Jesu o be kẹle no. A te rehọ iẹe guẹdhọ, a ve ti brukpei, gboja kẹe, je kpei no. Nọ Jesu avọ ikọ riẹ a re Emu Owọwọ na no, ọ tẹ ta ẹme nọ u re ru ẹrọwọ ikọ riẹ ga. Taure a te ti no evaọ uwou na, Jesu ọ tẹ lẹ obọdẹ olẹ jọ. Jọn ukọ na o kere olẹ na fihotọ. Whọ rẹ ruẹ e riẹ se evaọ obe Jọn izou 17.

² Ma te rri eme nọ Jesu ọ ta evaọ olẹ na, eme ma sae ta nọ o jariẹ oja oke yena? Eme ọ ta evaọ olẹ na nọ o lẹliẹ omai riẹ oware nọ o mae jariẹ oja evaọ okenọ ọ rọ jọ otọakpọ? Ma te kẹ iyo enọ nana.

“ME DHESẸ ODẸ RA VIA KẸ AE NO”

3. Eme Jesu ọ ta nọ o ru kpahe odẹ Jihova no, kọ eme họ otọ ẹme riẹ na? (Jọn 17:6, 26)

³ Jesu ọ jọ olẹ na ta nọ: “Me dhesẹ odẹ ra via kẹ ae no.” Isiava soso ọ jọ olẹ na ta nọ o dhesẹ odẹ Jihova kẹ ilele riẹ no. (Se Jọn 17:6, 26.) Kọ ẹme nọ Jesu ọ be ta na họ, o se odẹ Jihova kẹ ilele riẹ fikinọ a riẹ odẹ na vẹre he? Ijo. Ilele Jesu na yọ ahwo Ju. Fikiere a riẹ nọ odẹ Ọghẹnẹ họ Jihova no vẹre. Odẹ na o romavia isia idu buobu evaọ Ikereakere Hibru na. Fikiere orọnikọ uzedhe odẹ na dẹẹ Jesu ọ be ta nọ o dhesẹ via kẹ ilele riẹ na ha, rekọ oghẹrẹ nọ ohwo nọ o wo odẹ na ọ rrọ. Oghẹrẹ ohwo nọ Jihova ọ rrọ, eware nọ Jihova o ti ru, eware nọ o ru no, te uruemu riẹ, Jesu o dhesẹ i rai kpobi kẹ ilele riẹ. Yọ omọfa nọ ọ rẹ sae riẹ Jihova dhesẹ te Jesu ọ riẹ hẹ.

4-5. (a) Oriruo vẹ u dhesẹ epanọ whọ rẹ riẹ ohwo ziezi orọnikọ odẹ riẹ ọvo ho? (b) Eme o soriẹ ze nọ ilele Jesu a rọ riẹ odẹ Jihova kodo vi epaọ ọsosuọ?

⁴ Ma rọ oriruo jọ dhesẹ oware nọ ma be ta na. Ma rehọ iẹe nọ ọkpako ukoko jọ evaọ ukoko ra yọ edọktọ. Yọ odẹ riẹ Devidi. Nẹnẹ akpọ whọ rọ riẹ oniọvo na ha. Ẹdẹ jọ, ẹyao o te kru owhẹ idudhe, ẹyao na ọ jọ gaga. A tẹ wọ owhẹ kpobọ ọspito nọ oniọvo na o bi jo ru iruo. Fikinọ ọ riẹ iruo gaga, o te siwi owhẹ, whọ tẹ zọ. No umuo ẹdẹ yena vrẹ, who te yo odẹ oniọvo na, eme iroro ra e te dhẹ kpohọ? Edọktọ nọ o siwi owhẹ ẹdẹ na, binikọ ere he? Whọ te gbẹ rọ ubiẹro ọkpako ukoko ọvo ro rri rie he.

⁵ Ere ọvona re, ilele Jesu a riẹ odẹ Jihova no vẹre. Rekọ okenọ a rọ jọ kugbe Jesu na kpobi, u te ru nọ a rọ riẹ odẹ Jihova viere. Ẹvẹ ma rọ ta ere? Keme uruemu Jesu nọ a jẹ ruẹ na, nwanọ oghẹrẹ uruemu nọ Jihova o wo oye. Eme nọ Jesu ọ jẹ ta gbe eware nọ o je ru kpobi e nwani dhesẹ oghẹrẹ ohwo nọ Jihova ọ rrọ. O tẹ whae ze nọ ilele Jesu a rọ “riẹ” Jihova ziezi fiki onaa nọ Jesu o je ro wuhrẹ ahwo gbe oghẹrẹ nọ o je lele ahwo yeri.—Jọn 14:9; 17:3.

“ODẸ RA NỌ WHỌ KẸ OMẸ”

6. Nọ Jesu ọ ta nọ Jihova ọ rehọ odẹ riẹ kẹe na, eme ọ be ta na? (Jọn 17:11, 12)

⁶ Jesu ọ lẹ roro ilele riẹ nọ: “Sẹro rai fiki odẹ ra nọ whọ kẹ omẹ.” (Se Jọn 17:11, 12.) Kọ ẹme nọ Jesu ọ be ta na họ, odẹ Jihova a te hai ro se ọyomariẹ? Ijo. Kareghẹhọ nọ, nọ Jesu ọ jẹ ta ẹme kpahe odẹ Jihova evaọ olẹ na, ọ ta nọ “odẹ ra.” Fikiere nọ Jesu ọ ta nọ a kẹ riẹ odẹ Ọsẹ riẹ na, orọnikọ ọ be ta nọ Jihova họ odẹ nọ a te hai se ọyomariẹ hẹ. Kọ eme ọ be ta na? Ma rẹ kareghẹhọ nọ Jesu ọ jọ Ọtota Jihova. Jihova họ ohwo nọ o vi rie ziọ otọakpọ, yọ odẹ Jihova o je ro ru ikpeware nọ o ru na. (Jọn 5:43; 10:25) Oware ofa họ, odẹ Jesu na, otofa riẹ họ “Jihova Họ Esiwo.” Koyehọ odẹ Jihova o rrọ evaọ odẹ Jesu na.

7. Kẹ oriruo nọ u dhesẹ epanọ Jesu ọ rọ rehọ odẹ Jihova ta ẹme.

⁷ Oriruo jọ nọ u ti gbe ru ẹme na vẹ họ, osu nọ o wo ọtota. Osu na o re vi ọtota riẹ na nyae ta ẹme. Odẹ osu na ọtota na ọ rẹ rọ ta ẹme. Fikiere a rẹ rehọ ẹme nọ ọtota na ọ ta ze inọ osu na ọye ọ ta ẹme na. Ere ọvona re, Jesu ọye Jihova o vi ze, yọ odẹ Jihova ọ jẹ rọ ta ẹme kẹ ahwo.—Mat. 21:9; Luk 13:35.

8. Taure Jesu ọ tẹ te ziọ otọakpọ, fikieme Jihova ọ rọ ta nọ odẹ riẹ o rrọ uzou Jesu? (Ọnyano 23:20, 21)

⁸ A se Jesu Ẹme na keme Jihova ọ rehọ e riẹ ta ẹme kẹ ikọ-odhiwu gbe ahwo-akpọ no jẹ vuẹ ae oware nọ a re ru. (Jọn 1:1-3) O wọhọ nọ Jesu họ ukọ-odhiwu nọ Jihova o vi re ọ rẹrote ahwo Izrẹl nọ a je kpobọ Ẹkwotọ Eyaa na. Okenọ Jihova ọ jẹ ta kẹ ahwo Izrẹl nọ a yoẹme kẹ ukọ-odhiwu yena, ọ ta kẹ ae nọ: “Keme odẹ mẹ o rrọ uzou riẹ.”a (Se Ọnyano 23:20, 21.) Odẹ Jihova o rrọ uzou Jesu keme Jesu họ ọtota riẹ yọ ọye họ uzedhe ohwo nọ o ru odẹ Jihova fo.

“ỌSẸ, KẸ ODẸ RA ORUARO”

9. Ẹvẹ odẹ Jihova o jọ Jesu oja te?

⁹ Wọhọ epanọ ma ta no ẹsejọ na, odẹ Jihova o jọ Jesu oja gaga makọ evaọ oke nọ ọ re ziọ otọakpọ na ha dede. Oyejabọ nọ Jesu ọ jẹ hai ro ru oware nọ o rẹ wha orro se odẹ Jihova evaọ oware kpobi nọ o bi ru. Nọ oke nọ Jesu o ti ro whu o kẹle no, ọ tẹ ta nọ: “Ọsẹ, kẹ odẹ ra oruaro.” Ọsẹ riẹ ọ tẹ nwane rọ urru ulogbo nọ o wọhọ egbrara ta ẹme no obọ odhiwu ze kẹe nọ: “Mẹ kẹ riẹ oruaro no yọ mẹ te wariẹ kẹe oruaro.”—Jọn 12:28.

10-11. (a) Oghẹrẹ vẹ Jesu ọ rọ kẹ odẹ Jihova oruaro? (Rri uwoho na re.) (b) Fikieme u ro fo nọ a re ru odẹ Jihova fo je dhesẹ nọ eware nọ a ta kpahe iẹe na erue?

¹⁰ Jesu ọ jẹ hae kẹ odẹ Ọsẹ riẹ oruaro. Oghẹrẹ vẹ o je ro ru ei? Edhere jọ nọ o ro ru ei họ, ọ jẹ hai wuhrẹ ahwo emamọ uruemu nọ Ọsẹ riẹ o wo gbe eware iwoma nọ o bi ru. Rekọ oyena ọvo o rẹ sae wha oruaro se odẹ Jihova ha. U fo nọ a re ru odẹ Jihova fo, a ve je ru re ahwo kpobi a riẹ nọ a be fake raha odẹ riẹ gheghe.b Okenọ Jesu o je wuhrẹ ilele riẹ epanọ a rẹ lẹ, o dhesẹ nọ odẹ Jihova nọ a re ru fo u wuzou gaga. Ọ ta nọ: “Ọsẹ mai nọ ọ rrọ obọ idhiwu na, jọ odẹ ra o jọ fuafo.”—Mat. 6:9.

¹¹ Fikieme u ro fo nọ a re ru odẹ Jihova fo je dhesẹ nọ a bi mu odẹ riẹ raha gheghe? Keme Setan Ẹdhọ na o gu erue fihọ Jihova uzou evaọ ọgbọ Idẹn, ọ tẹ raha odẹ Jihova Ọghẹnẹ. Setan ọ rọ ẹme nọ ọ ta dhesẹ nọ Jihova o bi gu ọrue, yọ ọ be rọ emamọ oware jọ gbọ Adamu avọ Ivi ogbọ. (Emu. 3:1-5) Setan ọ tẹ jẹ ta eme nọ i dhesẹ nọ oghẹrẹ nọ Jihova o bi ro ru eware u woma ha. Setan ọ rọ eme nọ ọ ta na raha odẹ Jihova. Uwhremu na, evaọ oke Job, Setan ọ tẹ jẹ ta nọ oware nọ o be lẹliẹ idibo Jihova gọe kpobi họ, fiki eware iwoma nọ o bi ru kẹ ae. Ọrue yena nọ o gu na u te je dhesẹ nọ ohwo ọvo ọ riẹ hẹ nọ o you Jihova te epanọ ọ rẹ gbẹ rọ gọe nọ o te wo ẹbẹbẹ. (Job 1:9-11; 2:4) Re a riẹ nọ eme nọ Setan ọ ta na kpobi erue, o rrọ oware ẹdẹ ọvo ho.

“ME BI SIOBỌNO UZUAZỌ MẸ”

12. Fikinọ o rrọ Jesu oja gaga inọ o re ru odẹ Jihova fo, eme o ru?

¹² Jesu o you Jihova gaga. Fikiere o je ru epa kpobi nọ ọ sai ro ru odẹ Jihova fo je dhesẹ nọ a rẹ ruẹ obọ Jihova ha. Jesu ọ ta nọ: “Me bi siobọno uzuazọ mẹ.” (Jọn 10:17, 18) Fikinọ o jọ Jesu oja gaga inọ o re ru odẹ Ọsẹ riẹ fo, ọ tubẹ rọwo nọ o re whu dede.c Adamu avọ Ivi nọ Jihova ọ kake ma fihọ akpọ na, nọ a jọ gbagba a no abọ Jihova, a tẹ ruọ abọ Setan. Rekọ Jesu ọ wọhọ e rai hi. Ọ rọwo nọ o re no obọ odhiwu ziọ otọakpọ o ve ru oware nọ u dhesẹ nọ o you Jihova. O yoẹme kẹ Jihova evaọ oware kpobi, onọ u dhesẹ nọ o gine you Jihova. (Hib. 4:15; 5:7-10) O te je kru ẹrọwọ riẹ bẹsenọ o ro whu evaọ ure-oja. (Hib. 12:2) Kọ enẹ o ro dhesẹ nọ o you Jihova, inọ ọ rọ odẹ riẹ zaharo vievie he.

13. Ono ọ mae riẹ Jihova kpobi, kọ eme o ru nọ u dhesẹ nọ Jihova ọ rrọ epanọ Ẹdhọ o bi dhesẹ iẹe na ha? (Rri uwoho na re.)

¹³ Oghẹrẹ nọ Jesu o yeri uzuazọ riẹ u dhesẹ nọ erue Setan o gu fihọ Jihova uzou na. (Jọn 8:44) Ohwo ọvo nọ ọ riẹ Jihova te Jesu ọ riẹ hẹ. O hae jọ nọ umuzẹme jọ o rrọ ẹme nọ Setan ọ ta kpahe Jihova na, Jesu ọ hae te riẹ. Jesu o no abọ Jihova ha, o dhesẹ nọ Jihova ọ rrọ epanọ Ẹdhọ o bi dhesẹ iẹe na ha. Makọ okenọ o rọ wọhọ nọ Jihova ọ nyasiọ Jesu ba no, Jesu ọ siọ oware nọ o rẹ were Ọsẹ oyoyou riẹ na ba eru hu. Ọ tubẹ rọwo nọ o re whu.—Mat. 27:46.d

“ME RU IRUO NỌ WHỌ KẸ OMẸ RE NO”

14. Eme Jihova o ru kẹ Jesu fikinọ Jesu o kru ẹrọwọ riẹ?

¹⁴ Evaọ olẹ nọ Jesu ọ lẹ evaọ aso nọ ọ rọ jọ kugbe ikọ riẹ re a te ti mu ei na, ọ ta nọ: “Me ru iruo nọ whọ kẹ omẹ re no.” O fievahọ Jihova inọ ọ te hwosa kẹe fikinọ o kru ẹrọwọ riẹ te urere. (Jọn 17:4, 5) Yọ Jihova ọ ginẹ hwosa kẹe. Nọ Jesu o whu no, Jihova ọ kuvẹ re Jesu o gbo kufiẹ evaọ uki na ha. (Iruẹru 2:23, 24) Ọ kpare Jesu ze. Ọ tẹ kẹe ọkwa nọ ọ rro gaga evaọ obọ odhiwu. (Fil. 2:8, 9) Uwhremu na, Jihova ọ tẹ rọ Jesu mu ovie Uvie riẹ. Kọ eme Uvie yena u ti ru? Nọ Jesu o je wuhrẹ ahwo oghẹrẹ nọ a rẹ lẹ, ọ ta nọ jọ a lẹ nọ: “Jọ Uvie ra o ze. Jọ oreva ra u rugba evaọ otọakpọ na, wọhọ epanọ o rrọ evaọ obọ odhiwu.”—Mat. 6:10.

15. Eme Jesu o ti ru?

¹⁵ Kẹle na, Jesu o ti lele ewegrẹ Ọghẹnẹ fi ẹmo. O ve ti kpe ahwo omuomu kpobi no evaọ ẹmo Amagidọn. (Evia. 16:14, 16; 19:11-16) Jesu o ve ti gbolo Setan fihọ “ọgọdọ odidi na.” Oyena u dhesẹ nọ Setan ọ te gbẹ sai ru oware ovo ho, ọ te wọhọ ohwo nọ o whu no. (Evia. 20:1-3) Jesu o ve ti su odu-ikpe. O ti ru nọ udhedhẹ o te rọ jọ akpọ na, yọ o ti ru nọ ahwo-akpọ a te rọ jọ gbagba. Ọ te kpare ahwo nọ a whu no ze. O ti ru otọakpọ na kpobi fihọ aparadase. Oware nọ Ọghẹnẹ ọ gwọlọ u ve ti rugba.—Evia. 21:1-4.

16. Nọ Esuo Odu-Ikpe Kristi na o te kuhọ no, irere vẹ i ti noi ze?

¹⁶ Kọ eme o te via nọ Jesu o te su odu-ikpe na gba no? Oke yena, uzioraha gbe oruthọ nọ o rrọ omai oma na o gbẹ te jọ họ. Oke yena, ma te gbẹ lẹ nọ jọ Jihova ọ rọvrẹ omai fiki idhe ẹtanigbo na ha. Yọ o te gbẹ gwọlọ nọ Jesu avọ ahwo nọ a ti lele iei su na a rẹ jọ izerẹ kẹ omai re ma sae kẹle Ọghẹnẹ hẹ. Oke yena “a ti si uwhu, ọwegrẹ urere na no otọ,” koyehọ uwhu nọ ma reuku riẹ mi Adamu na. Iki e te jọ ifofe keme ahwo nọ a whu no vẹre, a kpare rai ze no. Ohwo kpobi evaọ otọakpọ na oke yena ọ te jọ gbagba.—1 Kọr. 15:25, 26.

17-18. (a) Eme ọ te via nọ Jesu o te su odu ikpe no? (b) Nọ oke nọ a kẹ Jesu inọ o ro su u te re no, eme o ti ru? (1 Ahwo Kọrint 15:24, 28) (Rri uwoho na re.)

¹⁷ Eme ọfa ọ te via nọ Esuo Odu-Ikpe na o te kuhọ no? Oware jọ nọ u wuzou gaga o te via. Ẹme nọ ọ rrọ otọ anwẹdẹ kpahe odẹ Jihova na, a ti ku ei họ. Evaọ oghẹrẹ vẹ? Evaọ ọgbọ Idẹn, Setan ọ ta nọ Jihova yọ ọtọrue, yọ ọ be rọ uyoyou su ahwo-akpọ họ. Anwọ oke yena ze, ahwo nọ a be kẹ Jihova adhẹẹ a ru odẹ riẹ fo no unuẹse buobu. Nọ Jesu o te su odu ikpe no, yọ a ru odẹ Jihova fo no tẹtẹtẹ. Oke yena yọ u mu ohwo kpobi ẹro no nọ Jihova Ọsẹ obọ odhiwu mai na o you omai.

¹⁸ Oke yena, a te ruẹ nọ eme nọ Setan ọ ta kpahe Jihova na kpobi erue. Kọ oke nọ a kẹ Jesu inọ o ro su u te re no, eme o ti ru? Kọ ọ te rọ aro kele Setan wọso Jihova? Ijo. (Se 1 Ahwo Kọrint 15:24, 28.) Jesu o ti zihe esuo na kẹ Ọsẹ riẹ. Ọ te kuvẹ re Jihova o su ei. Jesu ọ wọhọ Setan he, o re siobọno oware kpobi fikinọ o you Jihova.

19. Ẹvẹ Jesu o rri odẹ Jihova?

¹⁹ Jihova ọ riẹ nọ Jesu ọ te ginẹ riẹ eware kpobi ru. Oyejabọ nọ ọ rọ rehọ odẹ riẹ kẹ Jesu. Yọ Jesu omariẹ o gine ru oware nọ u dhesẹ nọ Ọsẹ riẹ na yọ emamọ ọsẹ. Kọ oghẹrẹ vẹ Jesu o rri odẹ Jihova? Ọ rọ odẹ na zaro vievie he. Oye o mai wuzou kẹe. Ọ tubẹ rọwo nọ o re whu fiki odẹ Jihova. Yọ nọ o te su ahwo-akpọ odu-ikpe no, ọ te rọwo nọ o re zihe isuẹsu na kpobi kẹ Jihova. Kọ ẹvẹ ma sae rọ rehọ aro kele Jesu? Ma te kẹ uyo onọ yena evaọ uzoẹme notha.