UZOẸME UWUHRẸ 15
OLE AVỌ 30 Ọsẹ Mẹ, Ọghẹnẹ Mẹ
‘Ọghẹnẹ nọ Ma re Si Kẹle U Woma’ kẹ Omai!
“Rọkẹ omẹ, Ọghẹnẹ nọ me re si kẹle u woma kẹ omẹ.”—OL. 73:28.
OWARE NỌ A JARIẸ TA KPAHE
Epanọ ma sae rọ kẹle Jihova ziezi gbe irere nọ i re te omai nọ ma te ru ere.
1-2. (a) Ẹvẹ imava a sai ro zihe ruọ egbẹnyusu ekpekpe? (b) Eme ma ti wuhrẹ evaọ uzoẹme nana?
KỌ WHO wo ogbẹnyusu jọ nọ ọ kpekpe owhẹ oma gaga? Ẹvẹ whai imava wha ro zihe ruọ egbẹnyusu? Ẹsejọhọ wha jẹ hae jọ kugbe ohwohwo je lele ohwohwo ta ẹme. Whọ tẹ te riẹ ebẹbẹ nọ o wo, eware nọ e rẹ were iẹe, gbe enọ e rẹ dhae eva. Who te je muẹrohọ emamọ uruemu riẹ nọ whẹ omara whọ gwọlọ wo re. Enana kpobi e tẹ lẹliẹ owhẹ you ogbẹnyusu ra na gaga.
2 Re imava a tẹ te jọ egbẹnyusu ekpekpe, o rrọ oware ẹdẹvo ho, yọ a rẹ daoma riẹ ohwohwo ziezi. Ere ọvona re, re ma tẹ te jọ egbẹnyusu ekpekpe Jihova, o rrọ oware asohẹrioke he. Yọ u wo eware nọ u fo nọ ma re ru. Ma te jọ uzoẹme nana ta kpahe eware nọ ma re ru re ma sai gbe go kẹle Ọghẹnẹ. Yọ ma te jẹ ruẹ irere nọ e rẹ jariẹ te omai. Rekọ ma te kake ta kpahe oware nọ u ro woma re ma kẹle Jihova, ogbẹnyusu mai nọ ọ mai woma.
3. Fikieme u ro fo re ma hai roro kpahe irere nọ i re te omai nọ ma te bi si kẹle Jihova? Rọ oriruo jọ dhesẹ iẹe.
3 Whọ riẹ nọ re ohwo ọ kẹle Jihova gaga, u gine woma. Rekọ ma te gine roro kpahe oware nọ u ro woma gaga re ma kẹle Jihova, o te lẹliẹ omai gbẹ kẹle iẹe viere. (Ol. 63:6-8) Ma kẹ oriruo jọ ro dhesẹ oware nọ ma be ta na. Ma riẹ nọ emamọ emu nọ ohwo ọ rẹ re, oma riẹ nọ o re ru jaja, owezẹ nọ ọ rẹ wezẹ doma, gbe ame nọ ọ rẹ da ziezi, i re fiobọhọ kẹ oma na. Rekọ ahwo buobu a re ru eware nana ha keme a bi gine roro kpahe epanọ i re fiobọhọ kẹ oma na te he. Ma tẹ be hai roro kpahe epanọ eware yena i re fiobọhọ kẹ omai te, ma te hae daoma ru ai. Ere ọvona re, ma riẹ nọ re ohwo ọ kẹle Jihova ziezi, yọ emamọ oware. Rekọ ma tẹ be hai gine roro kpahe irere nọ i ti te omai nọ ma tẹ kẹle Jihova, ma te daoma gaga re ma kẹle iẹe.—Ol. 119:27-30.
4. Ma te rri Olezi 73:28, eme ohwo nọ o kere i rie ọ ta?
4 Se Olezi 73:28. Ohwo nọ o kere Olezi avọ 73 na yọ ohwo Livae nọ ọ jẹ hae so ile evaọ etẹmpol Jihova. Yọ o wọhọ nọ ọ dina gọ Jihova kri no. O make rrọ ere na, ọ ruẹ nọ u fo nọ ọ rẹ hae kareghẹhọ omariẹ gbe amọfa inọ “Ọghẹnẹ nọ [o] re si kẹle” u woma kẹe gbe amọfa. Kọ irere vẹ i re te omai nọ ma tẹ kẹle Jihova ziezi?
‘ỌGHẸNẸ NỌ MA RE SI KẸLE’ O RẸ LẸLIẸ EVA WERE OMAI
5. (a) Fikieme eva e rẹ rọ were omai nọ ma te bi go kẹle Jihova? (b) Who te rri obe Itẹ 2:6-16, eware jọ vẹ areghẹ Jihova ọ rẹ thọ owhẹ no?
5 Epanọ ma daoma kẹle Jihova te, ere eva e rẹ were omai te. (Ol. 65:4) Eware buobu e wha riẹ ze nọ o rọ rrọ ere. Ojọ họ, ma te bi ru oware nọ Ebaibol ọ ta, ma re wo areghẹ. Yọ ma te wo areghẹ yena, ma rẹ kẹnoma kẹ eware nọ e rẹ wha uye se omai gbe ahwo omuomu. (Se Itẹ 2:6-16.) Oyejabọ nọ Ebaibol ọ rọ ta nọ: “Jọ eva e were ohwo nọ o duku areghẹ gbe ohwo nọ o wo orimuo.”—Itẹ 3:13.
6. Eme o wha riẹ ze nọ eva e gbẹ jẹ were ọso-ilezi na ha?
6 Ohwo ọ tẹ make rrọ ogbẹnyusu Jihova, ẹsejọ ọ rẹ jariẹ nọ eva e rẹ were iẹe he. Odibo Ọghẹnẹ nọ o kere Olezi avọ 73 na, oke jọ o jariẹ nọ eva e gbẹ jẹ were iẹe he fiki eware jọ nọ e jẹ kẹe uye evaọ udu riẹ. Ọ jẹ re ahwo omuomu ihri. Ọ jẹ jọ udu riẹ roro nọ ahwo nọ a be gọ Ọghẹnẹ hẹ nọ a be daezọ izi riẹ hẹ, ae eware e be mai woma kẹ. O je roro nọ ahwo ozighi gbe ahwo nọ a re ru omorro, ae a rẹ mai fe, a rẹ kake mọ họ, yọ uye o rẹ kaki te ae oma ha. Rekọ orọnọ ere o rrọ họ. (Ol. 73:3-7, 12) Oware na o kẹ riẹ uye te epanọ o je ro roro nọ Jihova nọ ọ be gọ na dede, oke riẹ gheghe ọ be raha kufiẹ. Oyejabọ ọ rọ ta nọ: “Evaọ uzẹme, me wo erere ọvuọvo ho nọ me ro ru udu mẹ fuafo jẹ wozẹ abọ mẹ fo.”—Ol. 73:13.
7. Eme ma re ru nọ eva e gbẹ be were omai hi? (Rri uwoho nọ o rrọ uke Uwou-Eroro na re.)
7 Ọso-ilezi na ọ se Jihova ba ẹgọ họ dede nọ eva e jẹ were iẹe he. O ru oware jọ nọ u fiobọhọ kẹe. Ọ “ruọ oria aruẹri ologbo Ọghẹnẹ.” (Ol. 73:17-19) Kọ etẹe Jihova o jo fiobọhọ kẹe ruẹ nọ epanọ o bi rri eware na, ere e rrọ họ. Uzẹme riẹ họ, a rẹ ruẹ ogbẹnyusu nọ o woma te Jihova ha. Nọ eva e gbẹ be were omai hi, ọ rẹ riẹ. Ma rẹ lẹ sei nọ jọ o fiobọhọ kẹ omai riẹ oware nọ ma re ru. Ma ve je ru oware nọ ọ be rọ Ẹme riẹ gbe ukoko na wuhrẹ omai. Ma te ru ere, ma te gbẹ sae gọ Jihova vrẹ dede nọ oware jọ o be kẹ omai uye. Nọ ma tẹ make be ruawa gaga dede, Jihova ọ te sasa omai oma je ru udu te omai otọ.—Ol. 94:19.a
Ohwo Livae nọ o kere Olezi avọ 73 na nọ o dikihẹ “oria aruẹri ologbo Ọghẹnẹ” (Rri edhe-ẹme avọ 7)
‘ỌGHẸNẸ NỌ MA RE SI KẸLE’ O RẸ LẸLIẸ OMAI YERI EMAMỌ UZUAZỌ JE WO ẸRUORE
8. Nọ ma tẹ be gbẹ kẹle Jihova, irere vẹ ma re wo?
8 Irere ivẹ efa jọ e riẹ nọ ma re wo nọ ma te bi si kẹle Ọghẹnẹ. Ọrọ ọsosuọ, o rẹ whae ze nọ ma re ro yeri emamọ uzuazọ. Ọrọ avọ ivẹ, ma re wo obọdẹ ẹruore inọ eware i ti woma evaọ obaro. (Jeri. 29:11) Joma ta ẹme kpahe eware ivẹ nana ziezi.
9. Nọ ma tẹ kẹle Jihova, fikieme o rẹ rọ lẹliẹ omai yeri emamọ uzuazọ?
9 Ma tẹ be kẹle Jihova, o rẹ lẹliẹ omai yeri emamọ uzuazọ. Nẹnẹ na, ahwo buobu a be ta nọ Ọghẹnẹ ọ rrọ họ. Fikiere a te bi roro nọ u wo oware ovo nọ ma rọ fiki riẹ rrọ akpọ na ha. A bi roro nọ oke o be tha nọ ohwo ọvo ọ gbẹ te jọ akpọ na ha. Rekọ ma jọ Ebaibol wuhrẹ nọ Ọghẹnẹ “ọ rrọ gbe nọ ọ rẹ hwosa kẹ enọ e be rọ ọwhọ gwọlọ iẹe.” (Hib. 11:6) Oware nana nọ ma wuhrẹ na u mu omai ẹro gaga. Fikiere eva e be were omai keme ma be gọ Jihova Ọsẹ obọ odhiwu mai na. Yọ oware nọ a rọ fiki riẹ ma omai ma bi ru na.—Izie. 10:12, 13.
10. Eme Olezi 37:29 o ta nọ Jihova o ti ru kẹ ahwo nọ a fi ẹruore rai họ iẹe?
10 Ahwo buobu evaọ akpọ na a wo ẹruore ọvuọvo ho. Onọ a riẹ kpobi họ, epanọ a rẹ rọ kọ okọ rai, yẹ emọ, je koko igho họ nọ a te rọ rẹrote omarai nọ a te no iruo no. A bi roro kpahe Ọghẹnẹ vievie he. Rekọ idibo Jihova a wo ẹruore. (Ol. 25:3-5; 1 Tim. 6:17) Jihova Ọghẹnẹ nọ ma si kẹle na, ma fievahọ iẹe. Yọ ma rọwo nọ eware nọ ọ ya eyaa rai kpobi na, o ti ru ai. Oware jọ nọ o ti ru kẹ omai họ, o ti ru nọ ma te rọ gọe bẹdẹ bẹdẹ evaọ Aparadase.—Se Olezi 37:29.
11. Nọ ma tẹ be daoma kẹle Jihova, eme o re ru kẹ omai, kọ ẹvẹ Jihova o ti rri omai nọ ma te bi ru oware nọ o rẹ were iẹe?
11 Irere efa e riẹ nọ i re te omai nọ ma te go kẹle Ọghẹnẹ. Ọjọ họ, Jihova ọ ta nọ ahwo nọ e kẹle riẹ oma, a tẹ raha uzi nọ a je kurẹriẹ, ọ rẹ rọvrẹ rai. (Aiz. 1:18) Nọ Jihova ọ tẹ rọvrẹ omai no, ma re gbe kpokpo udu mai hi fiki eware nọ ma ru oke jọ. (Ol. 32:1-5) Ere ọvo ho, nọ ma te bi ru oware nọ o rẹ were Jihova, eva e rẹ were omai. (Itẹ 23:15) Ma riẹ nọ who ti roro te irere efa nọ ma re wo nọ ma tẹ kẹle Jihova gaga. Kọ ẹvẹ whọ sae gbẹ rọ kẹle Jihova ziezi?
EPANỌ MA SAI GBE RO SI KẸLE ỌGHẸNẸ
12. Eware jọ vẹ who ru no nọ e lẹliẹ owhẹ kẹle Jihova?
12 Otẹrọnọ whọ họ-ame no, kiyọ whọ ginẹ daoma kẹle Jihova gaga no. Who wuhrẹ eware buobu kpahe Jihova Ọghẹnẹ avọ Jesu Kristi no. Who kurẹriẹ no izieraha nọ whọ jẹ raha no. Who wo ẹrọwọ ọgaga. Yọ whọ be daoma gaga re who ru oware nọ o rẹ were Ọghẹnẹ. Rekọ re whọ sae gbẹ kẹle Ọghẹnẹ viere, whọ rẹ gbẹ hai ru eware yena.—Kọl. 2:6.
13. Eware esa vẹ ma re ru re ma gbẹ kẹle Jihova?
13 Kọ eme ma re ru re ma hae gbẹ kẹle Jihova? Ọrọ ọsosuọ, ma rẹ hai se Ebaibol jẹ romatotọ wuhrẹ iẹe. Yọ nọ ma bi sei na, orọnikọ thakpinọ ma riẹ emeware elọlọhọ jọ kpahe Ọghẹnẹ ọvo ho. Rekọ ma re wuhrẹ re ma riẹ oghẹrẹ nọ Ọghẹnẹ o re rri eware, gbe ehrẹ riẹ nọ e rrọ Ebaibol na. Ma ve je ru oware nọ ọ gwọlọ. (Ẹf. 5:15-17) Ọrọ avọ ivẹ, ma rẹ hai roro kpahe eware buobu nọ i dhesẹ nọ Jihova o you omai, keme o rẹ lẹliẹ ẹrọwọ mai ga. Ọrọ avọ esa, ma rẹ hai mukpahe eware nọ e rẹ dha Jihova eva. Ma vẹ jẹ kẹnoma kẹ ahwo nọ a re ru eware itieye na.—Ol. 1:1; 101:3.
14. Re ma sai ru oware nọ obe 1 Ahwo Kọrint 10:31 o ta, eware jọ vẹ ma re ru ẹsikpobi nọ e rẹ were Jihova? (Rri iwoho na re.)
14 Se 1 Ahwo Kọrint 10:31. O roja gaga re ma hae daoma ru eware nọ e rẹ were Jihova. Orọnikọ ma te kpohọ ewuhrẹ gbe usi uwoma no yọ u re no ho. Ma re ru oware nọ o rẹ were Jihova evaọ oware kpobi nọ ma bi ru kẹdẹ kẹdẹ. Wọhọ oriruo, nọ ma tẹ be ta uzẹme evaọ oware kpobi je ru ọghọ, eva e rẹ were Jihova. (2 Kọr. 8:21; 9:7) Jihova ọ tẹ jẹ gwọlọ nọ ma rri uzuazọ ghaghae. Eware jọ nọ i re dhesẹ nọ ma rri uzuazọ ghaghae họ, ma rẹ re emu hayo da idi bu hrọ họ, yọ ma re ru eware efa nọ ma sae rọ rẹrote ugboma mai. Ma te bi ru eware nana, ma rẹ kẹle Jihova nọ ọ kẹ omai uzuazọ na. Evaọ oware kpobi nọ ma bi ru, makọ emeware esese dede, ma tẹ be daoma ru oware nọ o rẹ were Jihova, eva mai e rẹ were iẹe gaga.—Luk 16:10.
Nọ ma gbẹ be dhẹ ugbẹdhẹ hẹ, nọ ma tẹ be hae ru oma mai jaja jẹ re emamọ emu, je ru ọghọ, eva mai e rẹ were Jihova (Rri edhe-ẹme avọ 14)
15. Ẹvẹ Jihova ọ gwọlọ nọ ma ru amọfa?
15 Jihova ọ be riẹ ahwo kpobi ru, te enọ i kiẹrẹe, te enọ i kiẹrẹe he. (Mat. 5:45) Ọ gwọlọ nọ ere ma re ru re. Edhere jọ nọ ma sai ro ru ere họ, ma rẹ “ta ẹme oyoma kpahe ohwo ọvo ho,” yọ ma rẹ “jọ wolẹ evaọ kabọ kabọ kugbe ahwo kpobi.” (Tait. 3:2) Onana u dhesẹ nọ ma re rri ohwo ọvo tọtọtọ họ fikinọ ọ rrọ ukoko na ha. (2 Tim. 2:23-25) Ma tẹ be riẹ ahwo kpobi ru, ma rẹ kẹle Jihova gaga.
MA SAI “SI KẸLE” ỌGHẸNẸ NỌ OWARE O TẸ MAKE THỌ OMAI OBỌ
16. Ẹvẹ ohwo nọ o kere Olezi avọ 73 na o je rri omariẹ evaọ oke jọ?
16 Kọ whọ tẹ gọ Jihova te oria jọ no, nọ who je bi roro nọ Jihova o gbe you owhẹ hẹ fiki izi nọ whọ raha oke jọ, eme who re ru? Wọhọ epanọ ma ta no vẹre na, oghẹrẹ oware utioye o via kẹ ohwo nọ o kere Olezi avọ 73. Ọ ta nọ: “Awọ mẹ ọ joma nyathọ no vẹre; ithihi mẹ e joma whra no.” (Ol. 73:2) Ọ ta nọ eva riẹ e “tẹ ke no,” yọ ọ “jọ ohwo nọ ọ kare iroro,” ọ tẹ jẹ “jọ wọhọ arao nọ o wo areghẹ hẹ” evaọ aro Jihova. (Ol. 73:21, 22) Kọ fikinọ ọso-ilezi na o roro thọ na, ọ ta nọ Jihova o ti gbe you rie he?
17. (a) Okenọ eva e jẹ were ọso-ilezi na ha, eme o wọhọ nọ o ru? (b) Eme ma wuhrẹ no oware nọ o ru na ze? (Rri iwoho na re.)
17 Otẹrọnọ ọso-ilezi na o roro nọ Jihova o ti gbe you rie he, u kri hi re o te ti si iroro yena no udu riẹ. Dede nọ o kẹ riẹ uye inọ o roro thọ, ọ ruẹ nọ u fo re o gbe go kẹle Ọghẹnẹ ziezi. Ọ ta nọ: “Rekọ obọnana mẹ rrọ kugbe owhẹ ẹsikpobi; who kru obọze mẹ no. Whọ be rọ ohrẹ ra su omẹ, kẹsena who ve ti su omẹ kpohọ oruaro.” (Ol. 73:23, 24) Epọvo na re, nọ udu mai u te bi brukpe omai fiki eware nọ ma ru oke jọ, ma rẹ lẹ se Jihova re ọ kẹ omai ẹgba. (Ol. 73:26; 94:18) Ma tẹ make nyathọ dede evaọ omoke jọ, ma sai zihe bru Jihova ze keme ma riẹ nọ ọ “ruẹrẹ oma kpahe re [ọ] rọvrẹ.” (Ol. 86:5) Okenọ eva e be rọ were omai vievie he na, oke yena o mae tubẹ gwọlọ nọ ma re go kẹle Ọghẹnẹ mai na ziezi.—Ol. 103:13, 14.
Nọ oware jọ o tẹ be kẹ omai uye, joma gbẹ daoma ru eware nọ ma re ru evaọ egagọ Jihova, ma te kẹle Jihova gaga (Rri edhe-ẹme avọ 17)
JOMA “SI KẸLE” ỌGHẸNẸ BẸDẸ BẸDẸ
18. Fikieme ma rọ ta nọ u wo oghẹrẹ ọvo nọ ma re go kẹle Jihova te nọ o jẹ ga hrọ họ?
18 U wo oghẹrẹ ovo nọ ma rẹ kẹle Jihova te nọ o jẹ ga hrọ họ. Yọ ma sae riẹ Jihova re he. Ma ta ere keme Ebaibol ọ ta nọ “a rẹ sae gwọlọ idhere [Jihova] via ha,” te areghẹ riẹ gbe eriariẹ riẹ.—Rom 11:33.
19. Eme obe Ilezi o lẹliẹ omai riẹ nọ ma ti ru bẹdẹ bẹdẹ?
19 Olezi 79:13 o ta nọ: “Mai ahwo ra gbe uthuru ra nọ whọ be ko, ma ve ti yere owhẹ bẹdẹ bẹdẹ; ma ve ti jiri owhẹ no oge te oge.” Jọ u mu owhẹ ẹro nọ, nọ whọ be daoma gbẹ kẹle Ọghẹnẹ na, whọ te rria bẹdẹ bẹdẹ je wo eghale buobu. Yọ whọ sae ta ọkpọ ẹme nọ ọso-ilezi na ọ ta inọ: “Ọghẹnẹ họ ọnọ o bi ru udu mẹ ga, ọye họ ẹkẹ mẹ bẹdẹ bẹdẹ.”—Ol. 73:26.
OLE AVỌ 32 Jọ Abọ Jihova!
a Ohwo o te bi bru udu hayo jọ ọkọkora kri ga hrọ no, ọ sae nyabru edọktọ re o fiobọhọ kẹe. Whọ tẹ gwọlọ gbẹ riẹ kpahe ẹme nana, rri Uwou-Eroro Na, Ọrọ 1 2023.