U Woma re Ma Hai Bikẹle Ohwohwo!

1-2. Eme o rẹ were Jihova gaga, kọ eme ọ gwọlọ nọ ma ru?

NỌ MA te bi ru eware kẹ inievo mai, o tẹ make rọnọ emeware nọ ma rri nọ i te oware ovo ho o rẹ were Jihova gaga. Jesu ọ ta nọ ma you ọrivẹ mai wọhọ epanọ ma you omobọ mai. (Mat. 22:37-39) Oyena u dhesẹ nọ ma re ru eware iwoma kẹ ahwo nọ a be gọ Jihova ha re. Nọ ma te ru ere u dhesẹ nọ ma be rọ aro kele Jihova Ọghẹnẹ. Keme Jihova o bi “ru ọre riẹ va ze kẹ ahwo oyoma gbe ahwo owoma, je bi ru oso rrọ kẹ ahwo okiẹrẹe gbe ahwo nọ a kiẹrẹe he.”—Mat. 5:45.

² Jihova o you ahwo kpobi. Rekọ ahwo nọ a bi ru oware nọ o rẹ were iẹe ọ mai you. (Jọn 14:21) Yọ ọ gwọlọ nọ ma ru epọvo na re. Jihova ọ ta kẹ omai nọ ma wo “uyoyou ogaga” kẹ inievo mai. Ọ ta re nọ ma wo “uyoyou-inievo” kẹ ohwohwo. (1 Pita 4:8; Rom 12:10) Nwane wọhọ epanọ ma re you egbẹnyusu hayo imoni mai nọ ma gbe bi ru kugbe ziezi na, ere uyoyou nọ ma be ta ẹme riẹ na o rrọ. Nọ ma te you inievo mai ere, omarai o rẹ were omai miọmiọmiọ.

3. Eme họ uyoyou nọ ma be ta ẹme riẹ na?

³ Wọhọ epanọ ma rẹ rẹrote ododo nọ ma kọ re ọ seba ewhu no na, ere u fo nọ ma re ru eware jọ re uyoyou nọ ma wo kẹ inievo mai u gbe whu no ho. Pọl ukọ na ọ ta nọ: “Wha gbẹ hai dhesẹ uyoyou-inievo.” (Hib. 13:1) Jihova ọ gwọlọ nọ ma se obọ họ họ, ọ gwọlọ nọ ma gbẹ hai ru eware nọ i dhesẹ nọ ma you ahwo. Ma te jọ uzoẹme nana ta oware nọ u ro fo re ma go kẹle inievo mai ziezi gbe oghẹrẹ nọ ma sai ro ru ei.

OWARE NỌ U RO WOMA RE MA HAI GO KẸLE OHWOHWO ZIEZI

4. Eme ma re ru re okugbe nọ a ta ẹme te evaọ Olezi 133:1 na o gbẹ jọ udevie mai? (Rri iwoho na re.)

⁴ Se Olezi 133:1. Uzẹme ọvo o rrọ ẹme nọ ọso-ilezi na ọ ta na. Nọ ahwo nọ a you Jihova a tẹ ginẹ rrọ kugbe ohwohwo, u re “woma jẹ were kẹhẹ.” Rekọ ma gbẹ riẹ ru hu, okugbe nọ ọ rrọ udevie mai na, ma gbe ti sei gbe oware ovo ho. Ma rọ oriruo jọ dhesẹ iẹe. Ẹdẹ ọsosuọ nọ ohwo ọ tẹ ruẹ ure nọ ọ rrọ ruaro, u re gbei unu ọvo, o ve bi rri rie. Rekọ nọ ọ tẹ ruẹ ure na te ibrẹse no, o re gbe se ure na gbe oware ovo ho. Ere ọvona re, ma rẹ ruẹ inievo mai ẹsikpobi, ẹsejọ dede, ma rẹ ruẹ e rai te ibrẹse evaọ oka. Kọ eme ma re ru re ma hai gbe rri inievo mai ghaghae? Ma tẹ be hae romatotọ roro kpahe epanọ oniọvo kpobi ọ ghare omai obọ te gbe obọ nọ o bi fihọ evaọ ukoko na, ma ti you rai gaga.

5. Nọ ahwo a tẹ ruẹ okugbe gbe uyoyou nọ ọ rrọ udevie mai, eme o sae lẹliẹ ae ru?

⁵ Nọ ahwo jọ nọ a re ziọ ewuhrẹ ẹdẹvo ho a tẹ nyaze, oware nọ o rẹ mae were ae họ, uyoyou nọ o rrọ udevie mai. Ejọ e vẹ nwane ruẹ nọ egagọ uzẹme na a ruẹ no na. Jesu ọ ta nọ: “Ẹkwoma onana ahwo kpobi a te rọ riẹ nọ whai yọ ilele mẹ, otẹrọnọ wha te wo uyoyou evaọ udevie rai.” (Jọn 13:35) Oware nọ ma be ta na o via kẹ ọmọtẹ jọ nọ a re se Chaithra nọ o je kpohọ iyunivasiti. Oniọvo jọ o je wuhrẹ iẹe Ebaibol. Nọ a zizie iei kẹ okokohọ ologbo, ọ tẹ ginẹ nya. Nọ ọ nya ẹdẹ ọsosuọ okokohọ na no, ọ tẹ vuẹ oniọvo nọ o bi wuhrẹ iẹe Ebaibol nọ: “Ọsẹgboni mẹ a re gbalọ omẹ ẹdẹvo ho. Rekọ okokohọ nọ mẹ nya na, inievo na a gbalọ omẹ gaga. Isia udhuvẹ gbe ikpegbivẹ (52) soso a gbalọ omẹ evaọ ẹdẹ ọvuọvo. Oghẹrẹ nọ inievo na a ru omẹ o lẹliẹ omẹ riẹ nọ Jihova o you omẹ. Mẹ gwọlọ nọ me re kuomagbe inievo na gọ Jihova.” Chaithra ọ tẹ te nyaharo te epanọ ọ rọ họ-ame evaọ 2024. Iku nana i dhesẹ nọ ahwo a tẹ ruẹ uyoyou nọ ma wo kẹ ohwohwo, o rẹ lẹliẹ ibuobu ta nọ a rẹ gọ Jihova.—Mat. 5:16.

6. Nọ ma tẹ be hai go kẹle inievo mai, ẹvẹ o rẹ rọ thọ omai?

⁶ Ma tẹ be hae nya kẹle inievo mai, o rẹ thọ omai. Pọl ọ vuẹ Ileleikristi nọ: “Wha gbẹ hae tuduhọ ohwohwo awọ kẹdẹ kẹdẹ . . . re ogaga eviẹhọ uzioraha o gbẹ lẹliẹ udu rai ọvuọvo jọ gaga ha.” (Hib. 3:13) Ẹsejọhọ ẹrọwọ mai ọ gbẹ ga tere he. U tube te epanọ ma be te rọ gwọlọ mu eware nọ e rẹ dha Jihova eva họ eru no. Jihova ọ sai ru nọ oniọvo jọ nọ o re fiẹrohotọ ọ sai ro muẹrohọ omai, ọ vẹ tuduhọ omai awọ. (Ol. 73:2, 17, 23) Uduotahawọ utioye na u re fiobọhọ kẹ omai gaga.

7. Ẹvẹ inievo mai nọ ma re you o sae rọ lẹliẹ omai wo okugbe? (Ahwo Kọlọsi 3:13, 14)

⁷ Mai idibo Jihova ma be ginẹ daoma gaga re ma dhesẹ nọ ma you ohwohwo. Yọ eghale buobu i bi te omai. (1 Jọn 4:11) Fikinọ ma you inievo mai, ma bi “thihakọ kẹ ohwohwo.” U te ru nọ okugbe o rọ rrọ udevie mai. (Se Ahwo Kọlọsi 3:13, 14; Ẹf. 4:2-6) Fikiere nọ ma te kpohọ ewuhrẹ, eva ọvo e rẹ were omai. Whọ rẹ jọ oria ofa evaọ akpọ na ruẹ oware utiona ha.

WHA RỌ ỌGHỌ KẸ OHWOHWO

8. Ẹvẹ Jihova o bi ro wuhrẹ omai re ma gbe wo okugbe?

⁸ Oghẹrẹ okugbe nọ mai idibo Jihova ma wo u gbunu gaga. Jihova o ru nọ ma bi ro lele ohwohwo riẹ yeri na dede nọ ma re ru ohwohwo thọ ẹsejọ. (1 Kọr. 12:25) Ebaibol ọ ta nọ “Ọghẹnẹ o wuhrẹ [omai] nọ [ma] you ohwohwo.” (1 Tẹs. 4:9) Jihova ọ jọ Ebaibol vuẹ omai oware nọ ma re ru re ma sae kẹle inievo mai ziezi. Fikiere ma tẹ romatotọ wuhrẹ Ebaibol je ru eware nọ ma wuhrẹ, kiyọ “Ọghẹnẹ o wuhrẹ” omai no. (Hib. 4:12; Jem. 1:25) Nwanọ oware nọ mai Isẹri Jihova ma be daoma ru oye.

9. Eme ma wuhrẹ no obe Ahwo Rom 12:9-13 ze nọ o rẹ lẹliẹ omai kẹ ohwohwo ọghọ?

⁹ Ẹvẹ eware nọ ma jọ Ẹme Ọghẹnẹ wuhrẹ e sai ro fiobọhọ kẹ omai go kẹle ohwohwo ziezi? Pọl ọ ta ẹme jọ kpahe oware nana evaọ obe Ahwo Rom. (Se Ahwo Rom 12:9-13.) Ẹme jọ ọ rrọ etẹe na nọ u fo nọ ma re muẹrohọ gaga. Ẹme na họ, “evaọ ọghọ ọrọkẹ ohwohwo, kobaro.” Eme họ otọ ẹme yena? Ma rẹ daoma kobaro evaọ uyoyou-inievo nọ ma re dhesẹ kẹ ohwohwo. Ma rẹ rọvrẹ ohwohwo, ma re dede inievo na rehọ jẹ ghọ ae, ma re ru ae ọghọ je ru eware efa nọ i dhesẹ nọ ma you rai. (Ẹf. 4:32) Orọnikọ whọ rẹ hẹrẹ nọ oniọvo jọ ọ nyabru owhẹ ze tao ha. Rekọ whọ rẹ “kobaro,” koyehọ whọ rẹ kpama who ve bikẹle iẹe. Who te ru ere, who ti wo evawere nọ Jesu ọ ta ẹme te na. Ọ ta nọ: “Ẹkẹ evawere e mae rrọ vi emio.”—Iruẹru 20:35.

10. Eme o re dhesẹ nọ ma be ginẹ daoma evaọ “ọghọ ọrọkẹ ohwohwo”? (Rri uwoho na re.)

¹⁰ Nọ Pọl ọ ta nọ ma kobaro evaọ ọghọ nọ ma rẹ kẹ ohwohwo no, ọ tẹ ta nọ ma “goma iruo,” anọ ma “moyẹlẹ hẹ.” Ẹme yena o kiehọ gaga keme ohwo nọ ọ goma iruo ọ rẹ rọ ajọwha ru oware, yọ o re ru iruo gaga. A tẹ kẹe oware inọ o ru, ọ rẹ romatotọ ru ei. Obe Itẹ 3:27, 28 o vuẹ omai nọ: “Whọ siọ ewoma ba eru kẹ enọ u fo nọ who re ru ei kẹ hẹ otẹrọnọ who wo ogaga nọ whọ sai ro fiobọhọ.” Fikiere ma tẹ ruẹ nọ oniọvo jọ o wo ẹbẹbẹ jọ, ma rẹ daoma re ma fiobọhọ kẹe. Ma du ta ha inọ, ‘Me ti fiobọhọ kẹe, rekọ o du jọ obọnana ha.’ Hayo, ‘Mẹ gbẹ maki fiobọhọ kẹe he, oniọvo ọfa o ti fiobọhọ kẹe.’ Ma du ta ere he.—1 Jọn 3:17, 18.

11. Eme ma re ru nọ ma rẹ rọ kẹle inievo mai ziezi?

¹¹ Edhere jọ nọ ma rẹ rọ kẹ inievo mai ọghọ họ, nọ ma tẹ be hae kake rọvrẹ rai. Obe Ahwo Ẹfisọs 4:26 o ta nọ: “Wha kuvẹ re ọre o kiediwi yọ wha gbe bi mu ofu hu.” Fikieme? Owọ avọ 27 o vuẹ omai nọ ma te gbe bi mu ofu, ma sae rọ ere “kẹ Ẹdhọ uvẹ.” Jihova ọ jọ Ebaibol rọ ẹme erọvrẹ fa ẹgogo kẹ omai, anọ ma hae rọvrẹ ohwohwo. Obe Ahwo Kọlọsi 3:13 o vuẹ omai nọ ma gbẹ hae “rọvrẹ ohwohwo riẹriẹriẹ.” Nọ imava a gbe bi se eware nọ a ru ohwohwo gbe ọda ha, a rẹ kake ruẹ oware nọ o rẹ lẹliẹ usu tọ tei hi. Nọ ma gbe bi se eware kpobi nọ inievo mai a ru omai gbe ọda ha, yọ ma be “yọrọ okugbe ọvo nọ ẹzi na ọ be wha ze evaọ udhedhẹ nọ o be gba [omai] kugbe na.” (Ẹf. 4:3) Erọvrẹ o rẹ whae ze nọ udhedhẹ gbe okugbe o rẹ rọ jọ ukoko na.

12. Ẹvẹ Jihova o bi ro fiobọhọ kẹ omai re ma sae rọvrẹ amọfa?

¹² Ẹsejọ nọ ohwo o te ru omai oware nọ o da omai, o rẹ lọhọ tere he re ma rọvrẹ riẹ. Rekọ ẹzi Ọghẹnẹ ọ sai fiobọhọ kẹ omai rọvrẹ. Ebaibol ọ vuẹ omai nọ ma “wo uvi uyoyou-inievo kẹ ohwohwo” jẹ “goma iruo.” Ọ jọ etẹe ku ẹme na họ họ, ọ ta nọ: “Jọ ẹzi na o fi ọwhọ họ owhai oma.” (Rom 12:11) Ohwo nọ ẹzi na o fi ọwhọ họ oma ọ rẹ rọ ajọwha ru oware nọ Jihova ọ gwọlọ. Ẹzi Ọghẹnẹ ọ rẹ sai fiobọhọ kẹ omai nọ ma sai ro dhesẹ nọ ma wo uvi uyoyou-inievo kẹ ohwohwo, ma vẹ jẹ rọvrẹ ohwohwo no eva ze. Fikiere joma lẹ se Jihova gaga re o fiobọhọ kẹ omai sae rọvrẹ inievo mai.—Luk 11:13.

“WHA JỌ OHẸRIẸ O JỌ UDEVIE RAI HI”

13. Ma gbẹ riẹ ru hu, eme o sae fi ohẹriẹ họ udevie mai?

¹³ “Oghẹrẹ ahwo kpobi” ae a rrọ ukoko na nẹnẹ na, yọ ọvuọ oghẹrẹ riẹ a rọ yọrọ ae notọ ze. (1 Tim. 2:3, 4) Fikinọ ọvuọ oria riẹ ma no ze na, ẹsejọ oghẹrẹ ifimu, ile, hayo ẹgọ gbe osẹ nọ o te were ọjọ o te were ọjọ họ. Hayo oghẹrẹ nọ ohwo jọ o re ro siwi omariẹ nọ ọ tẹ be mọ, u ti kiehọ ohwo ọfa oma ha. (Rom 14:4; 1 Kọr. 1:10) Rekọ nọ orọnọ Ọghẹnẹ o wuhrẹ omai nọ ma you ohwohwo na, ma du ta nọ ọnọ ọ rẹ were omai na oye ohwo kpobi o re ru hu.—Fil. 2:3.

14. Eme u fo nọ ma rẹ daoma ru ẹsikpobi, kọ fikieme?

¹⁴ Oware ofa nọ ohẹriẹ o gbẹ rọ jọ ukoko na ha họ, ma re ru eware nọ e rẹ sasa inievo mai oma, a ve kru egagọ Ọghẹnẹ ga. (1 Tẹs. 5:11) Anwọ oke jọ ze na, ahwo nọ a siọ usi uwoma gbe ewuhrẹ ba no, gbe enọ a si no ukoko a bi zihe ziọ ukoko na gaga. Eva e were omai gaga inọ a bi zihe ze. (2 Kọr. 2:8) Oniọvo-ọmọtẹ jọ nọ ọ siọ ewuhrẹ ba te ikpe ikpe no nọ ọ ziọ ewuhrẹ ọ ta nọ: “Inievo na a dede omẹ rehọ sasasa, yọ a so omẹ obọ.” (Iruẹru 3:19) Kọ ẹvẹ oghẹrẹ nọ a ro dede iei rehọ na u ro fiobọhọ kẹe? Ọ ta nọ, “O lẹliẹ omẹ ruẹ nọ Jihova o kru omẹ obọ o te su omẹ zihe ziọ ukoko na re eva e sae were omẹ.” Nọ ma tẹ be hae sasa ahwo kpobi oma, Jesu Kristi ọ sae rọ omai fiobọhọ kẹ ahwo nọ “e be ruẹ uye, nọ ewha egbẹgbẹdẹ e rrọ uzou.”—Mat. 11:28, 29.

15. Eme ọfa ma re ru nọ okugbe o rẹ rọ jọ ukoko na? (Rri uwoho na re.)

¹⁵ Ma sae jẹ rọ ẹme nọ ma be ta rọ wha okugbe fihọ ukoko na. Obe Job 12:11 o ta nọ: “Kọ ogbẹrọnọ ozọ o rẹ dawo ẹme wọhọ epanọ ẹrọo ọ rẹ dawo emu na?” Ohwo nọ ọ riẹ ẹbẹ ethere gaga ọ rẹ dawo emu na no tao, nọ ọ jẹ ruẹ nọ ọ were, ọ vẹ tẹ te jẹe kẹ amọfa. Ere u fo nọ ma rẹ romatotọ roro ẹme mai te re ma tẹ te tae. (Ol. 141:3) Ma tẹ gwọlọ ta ẹme, joma ruẹ nọ ẹme nọ ma te ta na o te sasa ahwo oma jẹ tuduhọ ahwo awọ, yọ o te “wha erere se enọ i bi yoi.”—Ẹf. 4:29.

16. Amono jọ u fo nọ a rẹ daoma gaga re a ta ẹme nọ ọ rẹ sasa amọfa oma?

¹⁶ U fo re ezae uwou-orọo gbe esẹgbini a ma ẹme rai te gaga re o jọ ẹme nọ o rẹ sasa ahwo oma. (Kọl. 3:19, 21; Tait. 2:4) Ekpako ukoko a wọhọ ithuru-igodẹ. A rẹ ta eme nọ e rẹ sasa igodẹ Jihova oma. (Aiz. 32:1, 2; Gal. 6:1) Obe Itẹ o vuẹ omai nọ: “Ẹme nọ a ta evaọ ẹruoke o re woma kẹhẹ!”—Itẹ 15:23.

‘MA RẸ RỌ IRUO DHESẸ UYOYOU MAI VIA, YỌ U RE NO OMAI EVA ZE’

17. Eme ma re ru re uyoyou nọ ma wo kẹ inievo mai u no obotọ eva mai ze?

¹⁷ Jọn ukọ na ọ vuẹ omai nọ “uyoyou mai o rẹ jọ orọ ẹmeunu hayo igbenu hu, rekọ ma rẹ rọ iruo dhesẹ iẹe via, yọ u re no omai eva ze.” (1 Jọn 3:18) Ma gwọlọ nọ uyoyou nọ ma wo kẹ inievo mai u re no obotọ eva mai ze. Kọ ẹvẹ uyoyou mai o sae rọ jọ ere? Ma tẹ be hae jọ kugbe inievo mai je lele ai ta ẹme, ma rẹ kẹle ohwohwo gaga. Yọ ma ti you ohwohwo gaga. Fikiere hai ru epanọ whọ rẹ rọ jọ kugbe inievo na je lele ae ta ẹme. O sae jọ nọ obọ ewuhrẹ hayo ẹsenọ wha tẹ rrọ usi uwoma. Hai te obọ uwou rai. Ma te bi ru ere, yọ ma bi dhesẹ nọ “Ọghẹnẹ o wuhrẹ [omai] nọ [ma] you ohwohwo.” (1 Tẹs. 4:9) O vẹ te whae ze nọ mai ọvo ma te rọ ruẹ nọ “u woma jẹ were kẹhẹ re inievo e rria kugbe evaọ okugbe!”—Ol. 133:1.