Oghẹrẹ Vẹ Ẹdhọ Ọ Rrọ?

Uyo nọ Ebaibol na Ọ Kẹ

Ẹdhọ yọ omama ẹzi, onana u dhesẹ nọ o wo ugboma nọ ma rẹ ruẹ hẹ.—Ahwo Ẹfisọs 6:11, 12.

Oghẹrẹ nọ a be hae drọ Ẹdhọ evaọ iwoho buobu, avọ efọko othethei nọ o kru họ obọ. Ọ wọhọ ẹwe nọ o wo izei avọ uweli.

A be hae drọ Ẹdhọ evaọ iwoho buobu wọhọ ẹwe nọ o wo izei avọ uweli, yọ o kru efọko othethei jọ họ obọ. Ahwo jọ a ta nọ ahwo nọ a rẹ drọ eware nọ a rria evaọ oware wọhọ ikpe odu ọvo (1,000) nọ i kpemu a kake drọ Ẹdhọ oghẹrẹ utioye, yọ iku esia oke anwae i ru nọ a rọ drọ riẹ ere na.

Oghẹrẹ vẹ Ebaibol na o dhesẹ Ẹdhọ?

Ebaibol na ọ rọ eware sa-sa ro dhesẹ Ẹdhọ. Onana u re fiobọhọ kẹ omai riẹ oghẹrẹ uruemu nọ Ẹdhọ o wo orọnikọ oghẹrẹ nọ ọ rrọ evaọ ugboma ha. Eware jọ nọ Ebaibol na o ro dhesẹ Ẹdhọ họ:

Ukọ-odhiwu elo. Onana u dhesẹ nọ Ẹdhọ ọ rẹ faki ru wọhọ ẹsenọ o bi ru wuhrẹ ahwo emamọ eware re ọ sai ru ahwo rọwo iwuhrẹ na, viukpọ iwuhrẹ Ọghẹnẹ.—2 Ahwo Kọrint 11:14.
Okpohrokpo nọ o bi do enu. Onọ u dhesẹ nọ ọ rẹ wọso ahwo nọ a be gọ Ọghẹnẹ avọ ofu.—1 Pita 5:8.
Araomuomu idudu ologbo. Ẹdhọ o re muozọ, o wo ogaga, yọ ọ rẹ wha ọraha ze.—Eviavia 12:9.

Eria Ebaibol nọ e ta kpahe Ẹdhọ

2 Ahwo Kọrint 11:14: “Setan omariẹ ọ be hae ku oma eviẹhọ họ ro ru omariẹ wọhọ ukọ-odhiwu elo.”

Oware nọ oyena u dhesẹ: Setan ọ rẹ faki ru wọhọ ẹsenọ o wo emamọ eva re ọ sae viẹ ahwo họ rọwo iwuhrẹ riẹ, viukpọ erọ Ọghẹnẹ.
Ahwo Ẹfisọs 6:11: “Wha whẹ ẹgọ-ẹmo ọsoso nọ o no obọ Ọghẹnẹ ze na họ oma re wha sai dikihẹ ga wọso iruẹru ẹghẹ Ẹdhọ.”

Oware nọ oyena u dhesẹ: Ẹdhọ ọ rẹ rọ idhere ẹghẹ viẹ ahwo họ re a ghẹmeeyo kẹ Ọghẹnẹ.
Jemis 4:7: “Wha rehọ omarai kẹ Ọghẹnẹ; rekọ wha wọso Ẹdhọ, ọ te dhẹ siọ owhai ba.”

Oware nọ oyena u dhesẹ: Nọ ohwo o te bi yoẹme kẹ Ọghẹnẹ, orọnikọ Ẹdhọ họ, ọ rẹ sai fi Ẹdhọ kparobọ.
1 Pita 5:8: “Ọwegrẹ rai, Ẹdhọ, ọ be nya kpenẹ avọ enẹ wọhọ okpohrokpo nọ o bi do enu, be gwọlọ ohwo nọ ọ rẹ re no.”

Oware nọ oyena u dhesẹ: Ẹdhọ o mukpahe ahwo kpobi nọ a bi yoẹme kẹ Ọghẹnẹ, yọ ọ gwọlọ raha usu okpekpe nọ a wo kugbe Ọghẹnẹ no.